رد: شويه اسئله علي عفشه الكريستاله
 

انت محير نفسك علي الفاضي يا فاني
العربيه 1300 سي سي او 1500 حتي ال 1600 المايفك بتنزل بجنوط 14
انت ليه عاوز 16 و ناشف و طري و مدخل نفسك في متاهات مالهاش اول من اخر!!!!!
الرأي السليم و العملي لو عاوز تريح دماغك
انزل ابحث عن مساعدين يكونوا استعمل مش حيعملوا اكتر من 300 جنيه
طريقه الكشف علي المساعد الاستعمال:
1.لازم يكون serial number اللي علي الاتنين متتالي علشان يكونوا طالعين من عربيه واحده و تبقي ضامن دا
2.تحط المساعد في وضع عمودي و الراس النيكل تكون لاعلي
3.لازم يكون العمود النيكل مرفوع لاخره و تتاكد من كده انك تشده مش يطلع معاك لو طلع يبقي المساعد دا وحش
4.تضغط علي العمود النيكل بايدك و لازم ينزل معاك تقيل و بسلاسه و مفيش فيه اي وقفه ولو وقف في النص يبقي المساعد دا محجر
5.لحد ما ينزل للاخر تسيبه يطلع لوحده من غير ما تلمسه لحد اخر مشواره و اوعي تحط ايدك علي المساعد لازم تسيبه لحد ما يخلص مشواره مره واحده
6.تعمل الحركه دي في كل مساعد علي حده و بعدين تعملها في الاتنين سوا لضمان ان الاتنين بنفس الكفائه.

بكده يبقي انت اخترت جوز مساعدين بحاله الفابريقه و حيعيشوا معاك ان شاء الله

بالنسبه للجنوط يا تركب 14 و تركب عليه كاوتش 185 /65
او تركب 15 و يركب عليه 195/60

لو ركبت جنط كبير حيملي الفراغ لكن حيعلي العربيه و حيخلي شكلها بايخ من ورا
علاوه علي ان عزم العربيه حيقل و كمان قرايه العدادات مش حتبقي مضبوطه

هو دا خلاصه القول في موضوع العفشه و المساعدين علشان محدش يشتغلك

رد: شويه اسئله علي عفشه الكريستاله
 

حازم باشا تسلملي كيبوردك يارب

عاوز اقولك بس اني المقاس العربيه الاصلي 13/175/70

فقولي بقي المقاسات اللي انتا قلتها دي تاني عشان انا مقاس عربيتي مش 14

انا اللي سألت عليه المقاسات المتوافقه بتاعتي

13/175/70
14/185/60
15/195/50

تمام كده؟؟؟

كل الحكايه اني ممكن اركب جنط واجيب مساعدين
وطريقتك تحفه بصراحه ما شاء الله

بس كلام من الاخر كده انا حيران في التالي

1- لو جبت مساعدين اجيب ايه
مونرو واضحي بفرق السعر والعفشه تبقي ناشفه لو جنطت لاني مش لاقي كاوتش 15 نضيف وطري

2- اجيب kyb وابقي خدت رخيص وطري مش ناشف بس معرض انهم يضربوا زي ما ضربوا قبل كده

3- اضحي وافضي نفسي يوم واروح الحرفيين وبكرر تاني ممعايش حد ولا اعرف حد يروح معايا يختار مساعدين
واطبق الطريقه بتاعتك في اختبار المساعدين بس يارب الاقي التاجر اللي حيسيبني اقعد اختبر كل ده

4- بريدجستون كده فكست ككاوتش لانهم معندهومش حاجه طريه 15
وكومهو مش عاوز اجيبه تاني عشان باظ في العربيه
وبيرللي غالي وبردو ناشف وكونتنينتال غالي جدا ومش حقدر عليه

اجيب كاوتش ايه بقي
انا كنت معتمد اعتماد كلي علي بريدجستون

منتظر ردك ياباشا علي كل الرغي اللي انا رغيته ده
GIFT4UGIFT4U

رد: شويه اسئله علي عفشه الكريستاله
 

ممكن كمان جنط 14 مع كاوتش 195/55/14
بس المشلكة اني سمعت كتير ان المقاس ده نادر

رد: شويه اسئله علي عفشه الكريستاله
 

رد: شويه اسئله علي عفشه الكريستاله
 

انا الكاوتش الاصلي عندي و المكتوب في قايم العربيه كان 155/80 و لما جيت اغير جبت
جنط 14 و كاتوش جوديير ديجارو 185/65
علشان احافظ علي ارتفاع العربيه و كمان علشان العفشه تفضل زي ما هي و يكون وزن الجنط القديم بالكوتش مقارب للجنط الجديد بالكاوتش والعفشه تفضل سليمه
الجوديير بقاله معايا سنه و 20 الف كيلو و بسم الله ما شاء الله ولا كلمه
و المقاس دا افضل مقاس تركبه من غير ما توجع دماغك.
بالنسبه للمساعدين عاوز تجيب زي ما قولتلك مع اني لفتره قريبه جدا عمري ما كنت انصح بعفشه استعمال او اي جزء منها لكن نظرا لعدم وجود مساعدين نضيفه في السوق و الكلام اللي بسمعه كل يوم خلاني افكر في اللاستعمال
رغم ان كان معايا سوفت و جايب اتني kyb و زيرو و قعدوا في العربيه سنتين لحد ما بعتها وكانوا لسه جداد لا زيت ولا كلام من دا ابدا

رد: شويه اسئله علي عفشه الكريستاله
 

المشكله ان المقاس اللي حضرتك بتقول عليه واحد ركبه في كريستاله
والمطبات بقي مش عاوز اقولك
سامع دبدبه وخبط في العفشه
وغالبا بسبب علو الكاوتش زياده عن اللزوم

ممكن عشان مقاس حضرتك الاصلي اصلا اعلي من عندنا فمشيت
بس معتقدش انها تمشي في الكريستاله

انا عارف اني خنقتكو وصدعتكو بالجنوط علي المساعدين
بس الموضوع ده حيبقي مرجع مهم جدا لاي حد ياعيني عاوز يجنط او عنده مشاكل في الجنط
وغالبا حياخد قرار انجكشن

عليا النعمه مانا مجنط ويولع الكاوتش عالعفشه عالمساعدين
ده انا ابيع العربيه اسهل

رد: شويه اسئله علي عفشه الكريستاله
 

يا سيدي الفاضل المقاس عندي /65 مش /60
معني هذا ان ارتفاع الجنب اعلي في المقاس الاول اللي انا مركبه
عن المقاس التاني اللي انت كنت بتتكلم عليهارتفاع الجنب بيقلل ثبات شويه لكن مش بيخليك تحس بالمطبان و النقر علشان وجود هواء بكميات اكبر في الاطار
و الكريستاله كلها واحد و نفس الارتفاع مافيش فرق بين عربيتي و عربيتك و اي عربيه اخري.
لو عاوز تجنط يبقي تسمع كلامي علشان تريح دماغك و ما تتعبش