مصر موتورز مجتمع السيارات - رسيت على العربيتيين دول ايهما افضل

اقتباس:

المشاركة الأصلية كتبت بواسطة بدر بسيونى (المشاركة 240721)

واخيرا اعتقد ان الفيرنا حتساعدك على اختيار زبائن افضل ومشواير افضل خصوصا التكييف والقاعدة وشكلها اعتقد انا لو حشاور لتاكسيين الاول لادا والتانى فيرنا كزبون حختار الفيرنا

السلام عليكم و رحمة الله و بركاته

أنا طبعا معاك فى المقارنة الموضوعية اللى بين اللادا و الفيرنا, بس أنت فكرتنى بحاجة ضحكتنى, بحكاية أنك تشاور لتاكسيين و تقف تختار تركب أنهى واحد فيهم ,لأن عندنا هنا فى المنصورة -أنا معرفش الوضع فى القاهرة ايه- التاكسى هو اللى بيختار و بينقى بين الزباين بالشكل الآتى :

الزبون أيا كان راجل أو ست , كبير مش قادر يقف فى الشارع فى الحر أو واحدة ست و شايلة عيل على ايديها, بيشاور للتاكسى اللى جاى عليه و أول ما التاكسى يقرب, بيبقى فاتح الشباك اللى عاليمين أودام و هنا يبدأ الزبون فى الانحناء و يسأل سواق التاكسى ادا كان يوافق أنه يوصله المكان الفلانى ولا لأ و بعد كده يقف من انحنائه منتظرا بكل لهفة نتيجة الامتحان قصدى السؤال و النتيجة بتكون اما أن السائق بيرحم الزبون و يوافق على توصيله و ده الزبون بيفهمه بأن سواق التاكسى بيقف بضعة أمتار بعيد عن الزبون وهنا, تظهر على الزبون علامات الفرحة و السعادة الغامرة بأنه لقى توصيلة الى مشواره و بيجرى عالتاكسى لأنه مش هيصدق أن سواق التاكسى وافق الا لما يركب فى التاكسى فعليا, أو أن الاجابة التانية بتكون أن سواق التاكسى رافض توصيل الزبون و ده الزبون بيعرفه بأن سواق التاكسى بيسيبه و يمشى و مابيعبرهوش و هنا يبدأ الزبون بشكل أوتوماتيكى و دراماتيكى بالدوران الى اليسار بزاوية 90 درجة, وبالاشارة ثانية لأول تاكسى قادم و تبدأ فصول المأساة من جديد.

طبعا الموضوع ده بيحصل بالنهار فى وسط الأسبوع لما بيكون الناس قصدى الزباين كتار, أنا بقه بفتكر الموقف ده و أقارنه بالموقف التالى:

يوم الجمعة الصبح الساعة 7 أو 8 مثلا أو بعد الساعة 2 بالليل فى المنصورة فى الشتا مش الصيف, أنا لأنى ساكن فى مساكن الجامعة , أول ما أخرج من باب المساكن ماشى على رجلى , تلاقى التاكسيات اللى ماشية فى الشوارع بتدور على زبون و كل سواق تاكسى ييجى جمبك و يهدى أو ييجى قصادك و يديك كلاكس, معناه , أنت مش عاوز تاكسى؟؟؟؟ , أقول سبحان مغير الأحوال.

على العموم ده بيحصل عندنا هنا فى المنصورة, ممكن يكون الوضع فى القاهرة مختلف عن هنا .

طبعا, أنا مش هقارن التاكسيات فى مصر بالتاكسيات اللى فى كندا لأنها هتبقى مقارنة غير عادلة من ناحية كل شئ , بداية من ماركة العربية التاكسى نفسها, لمعاملة صاحب التاكسى, للشوارع , لكل حاجة .

عالعموم لو أنا مكانط كنت اختارت اللادا, لأنها هى العربية اللى أنا شايف أنها تتحمل الشوارع المكسرة الللى هنا فى مصر المهروسة و المطبات و تخبيط العربيات التانية فيك و كده .

شكرا و آسف جدا للاطالة .

MERCEDES S550