مصر موتورز مجتمع السيارات - شبيك لبيك .... الأوبترا بين ايديك

السلام عليكم ورحمة الله وبركاته
آسف للتأخير

بعد ما فحصنا السيارة فحص دقيق بالصور
نأتي الي الأهم وهو التقييم
الأول ح اعمل درجات للتقييم عشان الامور تبقي واضحة
جيد
جيد جدا
ممتاز
رائع

انا طبعا ما حطيتش متوسط وسيئ لأن ما اعتقدش ان سيارة زيرو ومن ماركة محترمة ممكن يكون فيها شيئ يوصف بالسوء ... مش بس الاوبترا لكن جميع الماركات المعروفة والمحترمة ذات التاريخ

نبدأ بالشكل : شكل العربية يتراوح من ممتاز .. الي رائع ... وده بيرجع للنظرة الشخصية وانت عاوز عربية انطباعها اية .. شبابي والا عائلية والا وقورة
العربية مافيهاش بهرجة اكتر من اللازم ..ومافيهاش زوايا حادة كتير ... يعني انسيابية ... بالنسبة لعمري و لطبيعة شغلي فهي مناسبة تماما ... يعني انا عمري 45 سنة .. لازم العربية تكون مناسبة لي .. ما ينفعش اركب جين 2 مثلا ... مش ح تكون لايقة عليه

السيارة من الداخل : ممكن تاخد درجة ممتاز .... زاوية الرؤيا الامامية رائعة .. وانت قاعد بتكون شايف الدنيا كويس جدا ... الرؤيا الخلفية جيد جدا ... لكن مش محتاج تركب بارك سينسور ... يمكن انا متعود على الشاهين اللي زاوية الرؤيا فيها رائعة
انا بآخد علي السيارة من الداخل ان الفرش والتابلوة والابواب لونها ثابت في السيارة المانيوال مهما كان لونها الخارجي ... انا عربيتي لونها بيج والفرش رمادي برضه ...

الكابينة مريحة جدا تاخد ممتاز ... اضاءة التابلوه رقيقة جدا ومناسبة ومش متعبة للعين وكل الكماليات في متناول يدك ... ما عدا ازرار تحكم المرايات ... بتكون بعيدة شوية ... لو كانت عند المخدع اللي علي ايدك الشمال مع زراير الزجاج كانت ح تكون احسن

الكماليات ممكن تتقيم بجيد جدا ... مش ممتاز ... ليه ؟؟
المفروض كان فية شوية حاجات تكون موجودة .. لكن عشان يضغطو التكاليف ويقدرو ينزلو السيارة بسعر منافس يظهر انهم طنشوا ...زي اييييه ؟؟؟ مثلا
مافيش تحكم بمستوي الاضاءة في الفوانيس الامامية واقصد الاضاءة لأعلي واسفل مش بشدة الاضاءة
السنتر لوك مالوش زرار خاص به ... يعني لازم تفتح السنتر وتقفله من السقاطة بتاعت باب السائق ودي انا شايف انها حاجة رخمة جدا

ما فيش اي تحكم الكتروني من عجلة القيادة ... مافيش تحكم في الصوت مثلا والا الراديو .. مافيش حاجة تقولك استهلاك البنزين شكله ايه ... مافيش ترموميتر لقياس الحرارة في الداخل والخارج

مافيش كشافات شبورة في المانيوال ... موجودة في الاتوماتك بس
مفيش CD في الكاسيت ... وان كان الكاسيت رائع وفية امكانيات رائعة .. والايريال المدمج في الزجاج الخلفي دة رائع وعاجبني جدا ... مش محتاج الايريال يطلع وينزل ويعطل ويتعب وعاوز ايسانسير ..الخ

التكييف ممكن ياخد من ممتاز الي رائع شأنه شأن التكييفات في الكوري عموما .. هو بكرة مش تاتش لكن أداءه رائع ومخارج الهواء مناسبة جدا ... لكن مافيش مخارج هواء في الكنبة الخلفية .. العربيات الشيك بيكون فيها مخارج هواء بين الكرسيين الاماميين .. عند الطفاية كدة لكن في الفئة بتاعة الاوبترا اعتقد ان ده مش موجود في كل السيارات
لكن اللي جالس ورا بيشعر بالتكييف بيكون متكيف ومش حران ... عموما التكييف زي الفل

عزل الصوت داخل الكابينة ممتاز لكن مش رائع ... يعني هي زيها زي منافسيها سواء النيسان او السيراتو او الماتريكس .... مفيش فرق ملحوظ

اجمل ما في الكابيتة هو المساحة دي تاخد اكتر من رائع .. الكابينة واسعة جدا سواء من الامام او الخلف او الشنطة

اماكن التخزين رائعة وكتير وأماكنها مناسبة وخاصة ان التابلوه اللي علي اليمين مكيف .. لو معاك دوا .. انسولين ... حاجة ساقعة .. بيبقي عملي جدا

عموما الكماليات اللي موجودة في العربية بالنسبة لي كافية جدا وانا كنت عارف الكماليات دي قبل الشراء ..

نيجي بعد كدة للموتور
السحب زي الفل ياخد ممتاز
الموتور ياخد ممتاز صوته هادي لكنه مسموع ... يعني صوته لذيذ .. تشعر انه .. بيزأر ...مش بيستغيث ...
انا عموما مش متضايق من صوته .. صوته بيعطيك شعور بالقوة والثقة ... لكن الموتور عموما له صوت .... مش صامت زي الياريس او السيريون
لكن من ناحية السحب .... زي الفل

الفرامل برغم انها مش abs لكنها قوية جدا .... تاخد رائع

الفتيس سلس جدا وياخد من ممتاز الي رائع ... المارشدير بجانب الغيار الاول وله سوسته لأعلي بصباعك عشان ما تنقلش غلط
انا عموما مش خبير أوي في المحركات فطبعا ح اسيب الحكم علي فنيات المحرك لمن هم اكتر خبرة مني

نيجي بقي للثبات دي بقي تاخد رائع
السيارة ثابتة الي درجة رائعة علي السرعات وخاصة في الملفات ... انا لما حبيت اجرب الموضوع دة مشيت علي 150 وأخدت ملفات بالسرعة دي في طريق السخنة الجديد .. العربية زي الفل ومغرية للسرعة ... عن لسان واحد صديقي كان راكب مع واحد صاحبه اوبترا وماشي بيها 190 والعربية زي الفل وثابتة وما فيهاش مشاكل ... لكن ان عمري طبعا ما ح امشي بالسرعة الخزعبلية دي انا كبيري 120 وبعد كدة بأشد اللحاف واستغطى كويس .... وانام
لكن الثبات بيكون في الطرق الممهدة ... اما في المطبات والطرق الوعرة ..... العربية بتتنطط .. لأن العفشة مش ناعمة والعربية عالية وهي طبعا مش معمولة للطرق الوعرة او غير المرصوفة

العفشة بتاعت العربية مش ناعمة اوي زي الكورولا مثلا ..لكن هي تاخد ممتاز مش رائع ودة بسبب ارتفاعها عن الارض ووزن العربية
ارتفاع السيارة عن الارض ممكن ياخد رائع ... بصراحة انا تعمدت آخد بيها مطبات صناعية متعددة وكان في السيارة 5 كبار فوق ال90 كيلو وطفلين منهم واحد شقي جدا ....والتاني كان لابس برنيطة ... وبرعم كدة ما فيش ولا حكة ... الكلام ده كان في كفر الشيخ والمطبات هناك يظهر ان عليها عروض مجانية ...... كل 3 مطبات معاهم مطب مجاني .......
والنقطة دي بتحقق معادلة صعبة جدا .. هي ان السيارة عالية عن الارض وفي نفس الوقت ثابتة في الملفات وعلي السرعات

الباور بتاع العربية ممتاز وسلس جدا

استهلاك البنزين زي اي عربية 1600
جوه البلد 180 / 200 كم في الصفيحة حسب الاحوال والزحام
علي الطريق بسرعة 90 / 100 بتوصل لأكتر من 300 كم في الصفيحة
علي الطريق بسرعات 120 / 150 بتبقي 200 / 240 كم في الصفيحة
وجميع القياسات دي بالتكييف طبعا

اخيرا .................

انا حاولت أكون محايد وما أجاملش عربيتي .. وأقول السلبيات قبل الايجابيات وأتمنى اكون وفقت في ذلك

من الآخر
انا مش ندمان علي اني اشتريت العربية دي
لو حد عنده أي استفسار انا تحت امركم
شكرا لجميع الزملاء اللي شرفوني سواء بالمرور او التعليق او التشجيع [IMG]http://www.**********.com/Nile/images/smilies/set1_b/sweatdrop.gif[/IMG]

آخر حاجة احب اضيفها ان العربية موديل 2008 وقد تكون هناك بعض الاختلافات عن 2009 والله اعلم

والسلام عليكم ورحمة الله وبركاته