مصر موتورز مجتمع السيارات - عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

مصر موتورز مجتمع السيارات (https://www.masrmotors.com/vb/index.php)

- تعديل السيارات العــام (https://www.masrmotors.com/vb/forumdisplay.php?f=5)

رد: عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

ممكن اعدل ايه فى موتور شاهين 1400
وكمان فى الفرامل

رد: عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

لو الموتور أنجكشن, ركب فلتر هواء أسبور k&n أصلى, وهيحسن معاك سحب العربية وأستجابة الموتور جدا بس ده غالى ومش أقل من 300 جنيه, وممكن سيموتا أوصينى ب 60 جنيه لو الميزانية مش عالية.

نضف البوابة بتاعت الموتور كويس, وحساس ال tps وكده علشان تسترجع القدرة المفقودة وتلاقى العربية أستريحت أكثر, وياريت تغير فلتر البنزين لو ماتغيرش من فترة.

وركب سلوك بوجيهات وبوجيهات سبليت فاير, هيقللوا المقاومة للشرارة ويخلوا سحب العربية أقوى وأنعم, بس مالهاش لازمة لو الفلوس مش كتير لأن سعر الأثنين هيكون فى حدود 500 الى 600 جنيه.

ركب هيدرز وعلبة ديفل ومواسير شكمان أكبر, لو مش عايز تغير الشكمان كله على الأقل علبة ديفل نضيفة ب 350 الى 450 جنيه هتعمل شغل كويس, وغير الصوت الرياضى.

ولو الزيت بقاله فترة غيره:)

دى التعديلات البسيطة والسهلة اللى تقدر تعملها فى مصر, وهتحسن سحب العربية بس مش لدرجة خيالية, لو عايز أكثر ممكن بقى تسقط موتور 1600 أو حتى 2000 سى سى من أى مواتير فيات زى اللانشيا مثلا, وعزبة شلبى فى القاهرة مليانة مواتير فيات, او الحرفيين.

بس التربو طبعا حرام على الموتور ده, لأنه هيكلف كتير أوى وهيجهد الموتور جامد.

أما بالنسبة للفرامل, فالتعديل عليها عايز معرفة ميكانيكية كبيرة, وميكانيكى محترف, ووقت فراغ رهيب, وأنا مقدرش أنصح حضرتك الصراحة فى الموضوع ده علشان خبرتى على قدى فى الشاهين.

وكمان لو حاولت تبعد عن سكة التعديل بالقطع الأستيراد من العربيات, متهيألى صعب تلاقى شركة تعديل بتصنع ديسكات وكاليبرات سبور للشاهين, بس ممكن حاجة لعربية مماثلة تركب عليها, وهنا تأتى الحاجة للخبرة الميكانيكية والميكانيكى الشاطر, وممكن تتصل بعادل وجدى tps اللى فى الحرفيين أو حتى من البروفايل بتاعهم على الفيس وتسأل.

بس أهتم بتغيير التيل فى مواعيده, بتيل نضيف ومتسترخصش, ولو عرفت تلاقى عند محلات التعديل المشهورة تيل أسبور ليها زى ebc أو بريمبو يبقى تمام أوى.

وأهتم بتغيير زيت الفرامل برضه لما تزيد درجة أتساخه, علشان بيؤثر على كفاءة النظام ككل, وسحب الهواء منه طبعا.

ولو عايز كفاءة أعلى برضه, ركب كاوتش أو جنط المداس بتاعه أعرض من اللى عندك, مساحة سطح الكاوتش الأكبر هتخلى العربية تفرمل أحسن وأسرع من الكاوتش الرفيع, ده غير الثبات طبعا.

وخلى بال حضرتك أنك لو أخترت تعدل على الفرامل برضه, كده كده هتضطر تركب جنط أكبر, لأن الديسكات الجديدة غالبا مش هتسمح بتركيب الجنط القديم.

وربنا يوفقك.

رد: عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

لو سمحت كنت عايزة اسأل عن ال dvd للسيارات انا عندى عربية كيا سيراتو 2010 وعايزة اركب فيها dvd اشترية منين وبكام ؟؟؟؟
لو سمحت حد يرد عليا بسرعة

رد: عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

ارجو من الاخوة اعضاء المنتدى افادتى اية احسن ماتور يركب على الشاهين لان زهقت من الماتور الى معايا صوتة عالى وبيسخن قوى وغير متوافق مع الغاز مبيشتغلش على الاتنين لو اتظبت بنزين يبقى علطول بنزين لو اتظبط غاز يبقى غاز على طول يعنى لازم اروح للمكانيكى علشان اظبط كل مرة , ودى عربية تاكس اجرة والغاز اجبارى على الاجرة ينفع ماتور البيجو ولا التمبرا وشكرا".

رد: عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

دمياطى باشا اشتريت عربيه 125 وصاحبها كان لسه مركبلها موتور 131 وانا اشترتها لاكن اكتشفت ان هى كل شويه تقطع قاعدة موتور وكمان كان فى صوت فى الكردان والفتيس ولاسف انى مختش معايا متخصص لفحص السيارة وكانت كل شهر تقطع فلنشه كردان لاكن فى صنايعى غيرلى الكردان والحمد لله صوت الكردان راح وفلنشة الكردان مبقتش بتقطع لاكن لسه موضوع قاعدة الموتور ياريت تساعدنى ودلنى اعملها فين مع العلم انى من القاهره ولك الف شكر