|
رد: وانت بتركب ابلاتين وكوندنسر لو تاه منك اتجاه الشاكوش تعمل ايه ؟
أستاذنا الفاضل قيست البطارية والعربية مش شغالة القياس طلع 11.70خدت البطارية على عربية تانية شاهين تاكسى وجربتها دارت الشاهين من اول تكه جبت بطارية الشاهين عندى وقيستها عطت قراءة متقاربه 11.60 الى 11.70بس لسوء الحظ الافو اتقطع منى وانا بقيس بكره هقيس بواحد تانى واجيب لحضرتك الشحن بتاع الدينامو المشكلة فى الاصل علشان ما نتوهش فى الكلام أن العربية بتترج على السلانسيه جيت أحاول أحل المشكلة اعتقادا منى انها ابلاتين وكوندنسر فلقيت فعلا انهم لادعين ركبنا ابلاتين جديد وغيرنا بوجيهات وظبطنا الكهرباءبرده العربية بترج لقينا الابلاتين لادع مرة تانية غيرته لغاية دلوقتى اربع مرات وبرده فيه نتشة بسيطة جدا وخصوصا لما تكون العربية بارده ولما العربية تسخن تكاد تختفى الميكانيكى قالى الموبينة راكبه غلط قلتله لاانا ركبتها زى القديمة بالضبط كان الموجب بتاعها رايح للاسبيراتيرقالى لا لازم الاسبيراتير ياخد من ارضى الموبينة مش من الموجب وراح معدل خلى الاسبيراتير واصل على ارضى الموبينة وضبط العربية وضبط كاربيراتير عمل شويه حاجات فى مسمار الهوا والبنزين وعلا السلانسيه بتاع العربية بس العربية لسه بتترج وصوتها مش مضبوط على السلانسيه اختبر البوجيهات لقى فيه بوجيهات ويه وبوجيهات ضعيفة قالى هاتلى طقم بوجيهات الميكانيكى قالى هركبلك مقاومة على الموبينة علشان تحجز الكهرباء الزيادة ايه رأى حضرتك ؟
|
رد: وانت بتركب ابلاتين وكوندنسر لو تاه منك اتجاه الشاكوش تعمل ايه ؟
اقتباس:
لأن واضح من سرد حضرتك للأحداث أن المشكله خاصه بعملية توزيع الشراره على البوجيهات وهنا يجب أن نتوجه تجاه موزع الشرر ( الأسبراتير ) فهل أنت واثق فى الأسبراتير ..............؟ ( حاول تبقى تدور ليلا فى مكان مظلم وأنت فاتح الكبوت وشوف هل هناك شراره هاربه من أمكان إتصال سلوك البوجيهات بالبوجيهات أم لا أو من أى مكان آخر فى دايرة الإشعال ) بالمناسبه ماهى أخبار كشفك على البوجيهات نفسها وشكل حريقها وأريد أن أعرف أيضا هل جربت تكشف على البوجيهات قبل ماتدور وهل المكنه بتاكل زيت ( إلى حد ما ) أم أن زيت المكنه ثابت على المقاس ولا تقوم بتزويده نهائيا |
رد: وانت بتركب ابلاتين وكوندنسر لو تاه منك اتجاه الشاكوش تعمل ايه ؟
استاذى
بالنسبة للاسبيراتير جديد اشتريته من حوالى 4 شهور ماريللى تركى بتفويض من الشركة الايطاليه ومكتوب عليه حفر بدقة ومش مضروب حتى العلية نفسها الكلام الى عليه وشكل الكرتونه لسه الضارب المصرى ما يقدرش يقلدها والى باعهولى مستورد كبير وراجل أمين وقالى على كل الاصناف طلبت الايطالى قالى يبقى الماريللى لان ايطاليا وقفت انتاجها شغال معايا عشرة على عشرة بس المشكلة ظهرت من قريب لما باظ الابلاتين واضطريت أفكه علشان نركب واحد جديد لما العربية بدات تنتش ده بالنسبة للاسبيراتير بالنسبة للبوجيهات هو عمل اختبار قدامى شال بوجيه بوجيه والماكينة شغاله قامت الماكينة اتلخبطت عند بوجيه 2 وبوجيه 4 قالى البوجيهات دى قوية وتمام بدل مكانهم وجاب 1 و3 مكانهم لقى الماكينة مش متأثرة قوى قالى كده بوجيهاتك مش مضبوطة قوى عايز طقم بوجيهات بكره هجيبله الطقم واروحله انما فكرة المقاومة مش هعمله اخذا برأى حضرتك ومش هطاوعه فيها بس دلوقتى هو مش لاقى مشكلة أبلاتين جديد والاسبيراتير جديد والكاربيراتير جديد وضبط الهوا والبنزين على حد كلامه مضبوط الموبينة ايطالى جديدة بك السلانسيه مضبوط على حد كلامه بعدين فيه حاجة غريبة عايز اسال حضرتك عليها بك السلانسيه عندى رقمه 50 رحت لفيت عليه كله يقولى خد 40 جبته لقيت العربية مخنوقة هل البك موجود فى القاهرة وعند مين بك سلانسيه رقم 50 لان البياعين بيقولوا ما فيش 50 وانا قلت ازاى وانا راكب عندى رقم 50 حاجة غريبة مش كده هو انا مش برده عايز فى مصر ولا علشان فى الصعيد ابقى جى من المريخ وازاى حضرتك اقدر احمى الابلاتين بقدر الامكان من اللدع ولا ادور على اسبيراتير الكترونى واريح دماغى ومشكور حضرتك على تعبك معايا ما فيش كلام يعبر عن شكرى ليك |
رد: وانت بتركب ابلاتين وكوندنسر لو تاه منك اتجاه الشاكوش تعمل ايه ؟
نسيت اقول حضرتك
البوجيهات مهببه وسودا تمام بشكل رهيب قالى الكاربيراتير عايز يتضبط واشتغل فيه وعلى كلامه خلال كده ضبط هوا وبنزين بس لسه المشكلة الاصلية موجودة العربية بتترج على السلانسيه وكمان النتشة رجعت تانى وانا رحت اشتريت طقم اسلاك بوجيهات جديد انجليزى اصلى للفيات 128 وركبته وبرده تستمر المشكلة نتشة بسيطة رجه على السلانسيه وسامحنى على الاطالة |
رد: وانت بتركب ابلاتين وكوندنسر لو تاه منك اتجاه الشاكوش تعمل ايه ؟
بالنسبة للزيت
العربية مش بتاكل زيت اطلاقا العربية مضبوطة تمام فى موضوع الزيت |
رد: وانت بتركب ابلاتين وكوندنسر لو تاه منك اتجاه الشاكوش تعمل ايه ؟
اقتباس:
ولكنه يدلل على وجود خلل إما 1- من كابلات البوجيهات 2- عملية توزيع الشراره نفسها القادمه من الأسبراتير اقتباس:
وغالبا سببه مشاكل بدورة الأشتعال أو نوعية البوجيهات نفسها وهل شكل هباب الأربعه زى بعض ...............؟ اقتباس:
ولازم تجيب البيك ال 50 ( بيك السلانسيه غير مسموح بتغيير مقاسه نهائيا ) الغريبه إنك بتقول الكاربوراتير جديد فلماذا غيرت بيك السلانسيه وخليته لعب فى خليط السلانسيه الحقيقه أنا شايف الميكانيكى ده غير كفء لآداؤه لعمله ويجب عليك عرض السياره على ميكانيكى آخر ( أكثر خبره ) |
رد: وانت بتركب ابلاتين وكوندنسر لو تاه منك اتجاه الشاكوش تعمل ايه ؟
واضح أنك بتحب تشتغل بإيدك و دى مهارة أساسية هامة جدا بالنسبة للنتشة ... كوندنسر و تغير كوندنسرات لحد ما تلاقى المضبوط و ممكن النتشة تكون بسبب " لدع جزئى " فى الأبلاتين زمان .. غيرت 5 كوندنسرات فى ثلاثة ايام لأن فعلا قطع الغيار المضروبة أكثر من السليمة الأبلاتين ... لما زهقنى , بقى معايا صنفرة ناعمة ( صنفرة دوكو ) أصنفر الأبلاتين و أمسحة كويس بفوطة نظيفة و يبقى تمام و كذا سنة بنفس الأبلاتين .... بس مهم جدا ضبط الخلوص بتاعه و دى هحاول أوضحها بس بعدين ( لأنى مش فاكر كانت ازاى ... آسف ) لو مافيش مشكلة فى الإدارة صباحا ... يبقى مافيش مشكلة من البوجيهات و الكابلات زى أ/ سمير ما ذكر فى ردوده القيمة ... تبص عليها فى الظلام و تتأكد أن مافيش تهريب كهرباء ( شرارات متناثرة حول الكابلات ) غيرت بيكات كتير لدرجة أنى مش فاكر تغيير بيك السلانسية كان بينتج عنه أيه لكن أعتقد 40 و 50 مش فرق كبير البوبينة الالكترونى ممتازة الاسبيراتير الالكترونى .. لا خبرة لى به أتفق مع أ/ سمير على تغيير الميكانيكى و التقسيم من جديد ثم تتبع مصدر النتشة و بالتوفيق ‘ |
| الساعة الآن 09:05 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017