المشاركة الأصلية كتبت بواسطة gad_fcis (المشاركة 411906)

أولاً أنا أسف على التأخير


ثانياً أخيراً العربية جت امبارح و الملاحظ إن طريقة تعامل مدير المعرض اتغيرت شوية للاحسن و إن كانت لسة مش على المستوى المتوقع من مدير معارض


بس فيه حاجة للأسف هتأخر الإستلام و هي إن اجراءت البنك هتاخد وقت عشان تمشي و كمان إن لسة موافقة هيئة الإستثمار أو جواب المرور بتاع العربية مجاش و هيجي على حساب كلام مدير المعارض كمان 3 أو 4 أيام


على أي حال المهم انها جت ، و هقلكوا ملاحظتي عليها سواء عيوب أو مميزات :


المميزات :
1- تقفيل العربية كويس أوي إلى حد كبير بإستثناء بعد الحاجات حقولها في العيوب
2-العربية جاية بسماعتين ورا ، يعني كدا العربية 4 سماعات مش سماعتين في الباب بس
3- تقفيل العربية كان أحسن من اللي شفتها في معرض الأهرام (كانت مستوردة من الصين)

4-كل ال كماليات اللي في العربية تعمل بكفاءة (الزجاج الكهربائي و المرايات و فتحة السقف و الأنوار )

-تكييف العربية ممتاز و متحسش بصوت علو الموتور و إنت قاعد جوا العربية
5-حسيت و أنا جوا العربية اني فعلاً أحسنت الإختيار الحمد لله







العيوب :
1-شنطة العربية لازم تترزع رزعة محترمة عشان تقفل
2-الحتة اللي بتعمل كونترول منها على فتحة السقف حسيت انها مش ثابتة كويس في مكانها ، يعني تحس إن فيه فرق بسيط بين البلاستيك و السقف
3-كعادة كل عربية BYD f3 فيه تقوس بسيط من النص في الإكسدم الخلفي
4-كان فيه فيشة واقعة مابين الإكسدام و الرادياتير كانت جانب الكلاكس، أنا مش خبير أوي في العربيات بس أنا يتهيئلي انها حساس و المشكلة اني لما سألت الولد اللي كان بيفرجني على العربية لقيته بيقولي تلاقيها فيشة زيادة ، أموت و أعرف بيجبوهم منين و بيعينوهم على أي أساس ، ازاي كلمة زي ديه تطلع من واحد المفروض إنه شغال في مجال السيارات (أنا خايف أطلع أنا اللي جاهل و تكن فعلاً فيشة زيادة :))


أخيراً أحب اشكر كل اللي ساعدني في إختيار العربية و كل اللي قدملي نصيحة و واساني من وقت كتابة هذا الموضوع


ملاحظة أخيرة عشان أكون صادق معاكو ، مدير المعرض وراني ورق لعملاء تبع البنك الوطني للتنمية (اللي أنا هقسط تبعه) و بيقولي إن الورق خلص من غير ماتكون العربية موجودة ، كل اللي حصل إن البنك خد رقم شاسيه و موتور و الورق مشي لحد ما العربية تيجي ، بيقولي البنك الوحيد اللي بيشترط إن العربية تكون موجودة هو بنك ناصر ، هو بيقولي كدا عشان أنا كنت مصر على وجود العربية عشان ورقها يمشي في البنك زي ما مندوب البنك أكدلي ، أنا مش عارف بقى هل كل مندوب ولا كل فرع بيمشي بمزاجه ولا إيه؟ و خصوصاً إن كدة ميعتبرش إسلامي على حد علمي

المشاركة الأصلية كتبت بواسطة gad_fcis (المشاركة 412034)

حضرتك أخجلتني بكلامك والله، أنا متشكر جداً على المشاعر النبيلة ده و أنا ليا الشرف اني أعرف واحد ذي حضرتك


بالنسبة للتقرير بعد إستلام العربية، دة أكيد هيحصل إن شاء الله ، بس لحد ما استلم أحب أقول لحضرتك اني ابتديت أفكر في العربية من نص أكتوبر أو أول نوفمبر اللي فات و لحد دلوقتي أنا ثابت على مبدأ انها Best Value For Money ، أنا مش هشكر فيها كتير عشان محدش يقول اني بشكر فيها عشان أنا جيبها بس على الأقل أنا مقتنع بإختياري لها 1000000 في ال-100 و أنا كنت لسة بكلم باسم إن احنا نعمل مقابلة بعد استلامي للعربية و أكيد يشرفنا إن حضرتك أو أي حد تاني من أعضاء المنتدى (مش شرط قسم BYD) يكون موجود

المشاركة الأصلية كتبت بواسطة mmffor (المشاركة 412056)

مفيش عربية صيني تحقق مبدأ value for money
لان ببساطة الصينيين فهلوية

المشاركة الأصلية كتبت بواسطة gad_fcis (المشاركة 411906)

أولاً أنا أسف على التأخير

- انا متابع الموضوع من بدايتة

بس فيه حاجة للأسف هتأخر الإستلام و هي إن اجراءت البنك هتاخد وقت عشان تمشي و كمان إن لسة موافقة هيئة الإستثمار أو جواب المرور بتاع العربية مجاش و هيجي على حساب كلام مدير المعارض كمان 3 أو 4 أيام

- احساس طبيعى انك تبق مستعجل لاستلام العربية وان شاء الله تستلمها قريب

العيوب :
1-شنطة العربية لازم تترزع رزعة محترمة عشان تقفل
- ممكن يبقى طبيعى فالبداية وحصل معى فالانسر انها تحتاج الى خبطة شديدة وانت ماسك الشنطة من المنتصف
- لكن فالتوكيل اتعملت فى 5 دقائق امامى واصبحت ممتازة
4-كان فيه فيشة واقعة مابين الإكسدام و الرادياتير كانت جانب الكلاكس، أنا مش خبير أوي في العربيات بس أنا يتهيئلي انها حساس و المشكلة اني لما سألت الولد اللي كان بيفرجني على العربية لقيته بيقولي تلاقيها فيشة زيادة ، أموت و أعرف بيجبوهم منين و بيعينوهم على أي أساس ، ازاي كلمة زي ديه تطلع من واحد المفروض إنه شغال في مجال السيارات (أنا خايف أطلع أنا اللي جاهل و تكن فعلاً فيشة زيادة :))

- غالبا ً دة فيشة الشبورة خاصة لو العربية بدون شبورة و بينزل منها بشبورة لان الضفيرة بتيقى كاملة حتى الاسبويلر الخلفى بتكون فيشتة موجودة ( لو موديل العربية بة نفس الاوبشن )
- اما جهل مندوب المبيعات فهذة فنيات وخبرة مع الوقت وان كان من المفروض ان يذاكر العربية جيدا ً ويستعد لاى استفسار