|
رد: خطوات وكيفيه تحويل الفيرنا الهاف اوبشن الى الفول اوبشن خطوه بخطوه....
ترررررررررررررررررن....تر ررررررررررن....
خلص وقت الاسئله ..... نبتدى الحلقه التانيه........ تعديل عداد الار بى ام........ المطلوب..... عداد استيراد من الحرفيين ويكون ديجيتال مش انالوج...وفيه ار بى ام وخالى من الخرابيش وبضمان التجربه........... يعمل كام؟ فى حدود 200 جنيه أو أقل ...مش أكتر وأول ما هيتكلم هيقولك 250 جنيه...... نخلى بالنا ان العدادات انواع...... فى نوع بيبقى انالوج ببكر زى الفيفا او اللانوس وده ميركبش عندنا ... والنوع التانى ديجيتال وشكله تحفه الاطار الخارجى قراءه السرعه بالميل والداخلى ما يعادله بالكيلو متر....يعنى زى المسطره ما بتبقى بجنبين جنب بالسم والاخر بالبوصه....شيك وجميل وكل حاجه بس فيه مشكله ..... عداد الكيلو متر او عداد الرحلات هيبقى برضو بالميل..... يعنى ايه المشكله؟ لما تيجى تحسب انت مشيت قد ايه على الزيت ده...أو ميعاد تغيير فلتر الهواء او حتى سير الكاتينه...لازم تجيب اله حاسبه وتحسب دول يعملوا كام كيلو........وانا مش بحب اللخبطه ولا بحب الاله الحاسبه...... النوع الاخير هو الديجيتال اللى السرعه فيه بتكون بالكيلو متر عادى.... طبعا مفهوم انه لو كان مؤشر العداد بيتحرك أو مش على الزيرو أو فى صوت شخلله فى العداد بلاش منه....وراجع على اللمبات اللى راكبه ...متكونش ناقصه ولا حوالين الشاشه البيضا لون اسود او تفحييم حريق لمبه او اى سى او وجود ماس فى اى مكان فى البورده..... تجيب مفك قصير براس صليبه..... صحيح...منا نسيت أولك انك أنت اللى هتركبها على طول من غير كهربائى.....ولا اى خامات ...كل الحكايه مفك صليبه قصير.... أول حاجه هتلاقى الوش الاسود اللى ورا الدركسيون على طول متثبت بمسمارين لفوق فكهم واخلع الوش على مهلك عشان فى زى سنين بيباتو فى الفيبر بتاع التابلوه ...سايسهم عشان ميتكسروش.... بعد ما خلعت الوش هتلاقى العداد قدامك بيقولك فكنى..... هتفك اربع مسامير فى الاربع اركان بتوع العداد..... كده يبقى العداد حر الحركه...... تخرجه بره بالراحه وتبص وراه.... هتلاقى العداد مرتبط بفيشتين...هما يبانوفيشه واحده لكن هما فيشتين.... جمد قلبك ......فكهم .... هات العداد الاستيراد وكب الفيشتين واعكس الخطوات السابقه...... ممكن تنظف العداد عادى بفوطه نظيفه ولو عايز شكله يبقى بيبرق كأنه جديد...هات حته بوليش كريم صغيره ولمع وش العداد ..(الباغه) طبعا بعد التركيب هتقول طب انا كده عملت ايه؟ كده حضرتك اول ما تدور هيبقى معاك الار بى ام شغال بدون اى تعديل فى الاسلاك..... عداد شيك وشكله جميل .... طب فين المشكله بقى؟؟ أقولك...... العداد مسجل الكيلو متر بتاع العربيه الاستيراد اللى كان راكب فيها..... يعنى....انت مثلا عامل 40 الف كيلو متر والعربيع الاستيراد كانت عامله 90 الف كيلو متر هتبقى قرأه العداد عندك 90 الف مش 40 طب الحل..... حاجه من اتنين...... الاول وده اللى عملتو....حسبت الفرق بين عدادى وعداد ااستيراد وضيفته على كل ما سيتم تغييره ...بمعنى ..رحلت الكيلو متر بتاع الصيانه بقيمه الفرق يعنى عدادى كان المفروض هغير زيت على 45 الف....يبقى اغيره على 95 الف على العداد الجديد...... الحل التانى ...مكلف لكن ده حسب إختيارك..... المفروض فى ناس بتوع عدادات وبيبرمجلك العداد على الرقم اللى انتا عايزه...يعنى تغير العداد من 90 الى 40 الف وتكمل عادى والحركه دى بيستخدمها النصابين والتجار فى البيع بالغش...لكن الecu متسجل عليها الكيلو متر الحقيقى للعربيه...وعشان كده احسن مكان تكشف فيه على عربيه...بيبقى التوكيل أى سؤال انا تحت أمركم.......<!-- google_ad_section_end --> _______________ |
رد: خطوات وكيفيه تحويل الفيرنا الهاف اوبشن الى الفول اوبشن خطوه بخطوه....
بصراحة موضوع رائع وشرح تفصيلى مبسط اكثر من رائع
تقبل تحياتى ومبروك عليك الفول اوبشن الجديدة |
رد: خطوات وكيفيه تحويل الفيرنا الهاف اوبشن الى الفول اوبشن خطوه بخطوه....
اشرف ده يا صلاح من اعز الناس الى قلبى زيك كده و الله اخ كبير ليا بجد و ليه مواقف معايا بتبين قد ايه هو راجل بجد
|
رد: خطوات وكيفيه تحويل الفيرنا الهاف اوبشن الى الفول اوبشن خطوه بخطوه....
اقتباس:
اقتباس:
بس لو دماغك زى احمد كار كده...يبقى عليه العوض ومنه العوض...راحت العربيه.......:smileW4: |
رد: خطوات وكيفيه تحويل الفيرنا الهاف اوبشن الى الفول اوبشن خطوه بخطوه....
نكمل .....
الحلقه التالته...... فتح الشنطه من الداخل...... معروف أن الهاف اوبشن مفيهاش شداد فتح الشنطه من الداخل.....شداد غطاء تنك البنزين وبس.... أكتر من مره أبقى عايز أطلع حاجه من الشنطه والعربيه دايره ومنسجم مع سى دى او درس أو خطبه ووصلت لأكتر من نص الدرس....وأضطر أفتح الشنطه لاى سبب .....عايز أجيب حاجه أو تفتيش.......زى كارفور كده لما تيجى تنزل الجراج يقولك إفتح الشنطه للدواعى الامنيه...... أقوم مضطر أخرج المفتاح من الكونتاكت وأنزل من العربيه عشان أفتح الشنطه...واللى ورايا طبعا شغال تيت ....تيت ....تيت أقوم متنرفز عليه......أصبر يا ابن التييييييييييييييت..... وكمان الاغنيه أو الدرس بعد ما خلص نصه يرجع يعيد من الاول....حاجه تخنق....... طب أيه الحل.... الاول...قلت هركب شداد استيراد بالمقبض بتاعه وأوصله بكالون الشنطه... بتاع الكوالين لاقيته بيشتغلنى وحسيت ان الحوار مش تمام...كمان صعب قوى تلاقى الوير كامل وسليم لانه بيقطع العربيه الاستيراد من النص فبيضيع الوير ده مع القطع بالصاروخ.....ولو لاقيته بيبقى مبالغ قوى فى سعره.... فى حل اسهل واشيك وارخص..... تحول فتح الكالون كهربا....يعنى عمل وحده سنتر للشنطه....وزرار فتح وقفل فى التابلوه وممكن تزود خاصيه الفتح بالريموت بتاع الانزار للشنطه..... أولا تروح لواحد كهربائى او فنى تركيب سنتر وإنذار.... وتركب سنتر للشنطه..... الفنى هيقولك بس ده صعب قوى...عشان يشتغلك فى المصنعيه والبقشيش.... الموضوع أسهل ما يمكن.... بيفك الكالون اللى فى الشنطه من فوق.... الكالون بيبقى محمى بطبقه بلاستيك للحمايه من الصدأ والميه وكده... بيفك الكالون ببيبه طويله زى حرف التى كده.... بيكسر طرف البلاستيك ده عشان يوصل الشوكه بتاعه السنتر بلقمه القفل....اللى المفروض تبقى متصله بالوير بتاع الشداد...... بيعمل شوكه او سلك رفيع او وير لتوصيل الكالون بوحده السنتر... بيركب صباع السينتر بصوره موازيه للكالون وعلى مسافه على قد طول الوير المتصل بكالون الشنطه وبيثبت وحده السنتر..(صباع السنتر ) بالبرشام او مسمار بريمه..... بيعدى بقى سلك ...فرده واحده بس لان الارضى بيتوصل بجسم الشنطه وبيعمل ارضى.. السلك بيمر من خلال الفتحات اللى فى جسم الشنطه ومن تحت الفرش ورا الكنبه ... بيفك الفيبر بتاع العتب ويعدى السلك من تحته لغايه علبه الفيوزات اللى بتبقى تحت الدركسيون..... أقولك على حاجه حلوه..... خليه طالما هيوصل فرده للسنتر يوصل فرده تانيه يعنى فردتين بدل واحده..... طب ليه؟ عشان الفرده التانيه نخليها لتشغيل لمبه فتح الشنطه فى العداد الموجوده فى التابلوه جنب علامه البنزين.....لكن عم غبور استخسر يحط 5 متر سلك ومشغلهاش.... بعد كده...إختار المكان اللى تحب تحط فيه زرار الفتح للشنطه....وبيفك الفرش بتاع المكان ده ويركبلك المفتاح فيه..... بس خليه مكان ما تخبطش فيه ولا تدوس على الزرار بالخطء فتفتح الشنطه وانت ماشى لا قدر الله..... وتبقى ليله يا عمده.... كده يبقى عندك زرار تدوس عليه يفتح الشنطه من غير ما تنزل ولا تطلع المفتاح من الكونتاكت.... وكمان ممكن تزود خاصيه فتح الشنطه بالريموت على جهاز الانزار...... بيكلف كام الموضوع ده؟؟ بص... هو الوحده بتاع السنتر دى من 20 الى 25 ... الباقى من ال60 جنيه ما بين مصنعيه وحركات من مقدم الخدمه..... يعنى تروح على بتاع كوالين وضبط ابواب ......أو كهربائى نظيف....او حد بتاع سنتر وإنذار..... تقوله عايز اعمازرار وأفتح الشنطه من الزرار والريموت...... وهو هيتعامل .......ويقولك 60 جنيه وده عشان خاطر انت زبونى وحاجتك كلها بتعملها عندى وكده.......حاول ما تدفعش اكتر من 50 جنيه.....شامله وحده السنتر (الصباع ) والاسلاك والفيوز والتركيب.... كده خلصت حلقه تحويل الشنطه الى كهرباء بدلا من الشداد....... |
رد: خطوات وكيفيه تحويل الفيرنا الهاف اوبشن الى الفول اوبشن خطوه بخطوه....
و هو انا دماغى فيها ايه منك له هو صحيح فيها صراصير بس مفيده
|
رد: خطوات وكيفيه تحويل الفيرنا الهاف اوبشن الى الفول اوبشن خطوه بخطوه....
نكمل.....
تركيب السنتر والانذار..... بعد لف ودوران وسؤال الأهل والاصحاب وذوى الخبره من المنتدى وخارجه..... وصلت لنتيجه واحده...... كله زى بعضه....... يعنى ..... واحد يقولك على النوع الفلانى ممتاااااازوزى الفل...... التانى يقولك ركبته ورميته بعد اسبوعين وجبت نوع كذا......ممتاااز وزى الفل.... التالت يقولك يا عم كذا ايه دا كان راكب فى عربيه والدى وكان قارفنا وبيعلق السنتر وزهقنا لغايه ما غيرناه..... وهكذا.....وناس تقولك بلاش الصينى خليك فى التايوانى وناس تقولك التايوانى اساسا صينى بس مكتوب عليه تايوانى.... والدنيا أخر لخبطه.... طب ايه القول الفصل فى الموضوع ده..... السنتر والانذار ....نصيب... ممكن اتنين يشتروا نفس الماركه ويركبوهم عند نفس المكان وواحد يقول فل وواحد يقول زفت..... خلاص يبقى سيبك من الماركه... أجيب 2way ولا عادى..... سألت صديقى أحمد إسماعيل بصفته من الرواد المستخدمين للإنزار ال 2 way لاقيته فعلا حلو ...بس انا العربيه دايما بتبقى بعيده عنى بمسافه كبيره...فالمدى بتاع ال 500 متر دول مش هيفرق معايا فى حاجه.... فتوكلت على الله ووقع اختيارى على انى اركب سنتر وإنذار وولف.... إشمعنى؟ لان الماركه دى بتتصنع فى مصر وليها وكيل ومركز خدمه وبتاخد على الانذار ضمان 5 سنوات والسنتر سنه... وعندهم كمان خدمه التركيب وبيزود على الضمان ضمان ضد أخطاء التركيب وليس فقط عيوب الصناعه.... يعنى لو ركبت عندهم مينفعش تروحلهم عشان تصلح حاجه فى الضمان يقولولك دا عيب تركيب..... دا موقع الشركه... www.wolfegypt.comا التكاليف.... السنتر تمنه 60 جنيه بضمان سنه وبالتركيب يبقى 100 جنيه الانذار ب 175 جنيه وبالتركيب 200 جنيه وحده الرفع لرفع اتنين زجاج بالضمان 70 جنيه بالتركيب وطبعا لو عايز تركب وحدتين لرفع ال 4 زجاج ب 140 جنيه بالتركيب... أما السماعات والكاسيتات والدى فى دى فشكلها مش عاطفى خالص.... نيجى بقى للتركيب...... وصلت للمركز بتاعهم اللى فى سوق القنال وطلبت تركيب سنتر وانذار الساعه حوالى 4 او 4 ونص... إخترت الشكل اللى عجبنى فى اشكال ريموتات الانذار... ولاقيتهم فى ثوانى فضوا مكان للعربيه وجابولى الفنى والمساعد بتاعه .. فك الاربعه فرش بتاع الابواب..... رفض يستخدم الضفيره اللى كانت متقسمه بالفعل فى الابواب عشان أخد الضمان بالتركيب. (كنت عملتها عند الراجل اللى عملت عنده الزجاج الكهرباء على اساس انى مفكش فرش العتب والفيبر تانى..) . قسم الضفيره ......يعنى قسم مجموعه الاسلاك الملونه اللى بتبقى ملفوفه فى العلبه الى مجموعات...وكل مجموعه خاصه بباب بالطول المناسب ويقص الزياده ويلف المجموعه بشريط لحام.....(أثناء ما كان المساعد بيفك الفرش بتاع البيبان). جاب شاكوش وحته حديده من بتوع السمكرى واستعدل الطرف الايمن العلوى لكل باب فى الناحيه الداخليه المقابله لأكره الباب....وده عشان الصباع لتاع السنتر بيركب على السطح المستوى وليس البومباى.... لف عليهم باب باب وركب وحده الينتر ووصل الكتاوت بتاعته وبعدين جابوا الإنذار.... وبدأ يشتغل فى الضفيره تحت الدركسيون ...طبعا المنظر مخيف جدا..بس لانى شايف الفنى فاهم جدا وحافظ هو بيعمل ايه زى ما يكون ريبوت شغال...قلت إتطمن.....(شكلك فاهم يا نصه !!) طبعا كعاده الصنايعيه فى مصر..بمجرد ما المهندس الكبير بتاعهم مشى الدنيا بقت فرى خالص.... والحاجه التانيه أن البقشيش او الشاى بلغتهم أهم عنده من اى شغل... ولو لقى الزبون طيب ومبيتكلمش كتير مفيش مانع من إشتغاله صغننه..... يعنى لفت انتباهه ان الشنطه عندى كهربا وعايز افتحها بالريموت .... قام قللى دا هيتطلب نزود كتاوت تانى وهيدفعوك عليها 50جنيه... أيه ....ليييييييييييه؟ بلاش منها طب انا ممكن اتصرفلك فى كتاوت من عندى فى الحنين كده..عشرين جنيه ...ماشى؟ لأ مش ماشى.....متعملهاش كفايه الزرار افتح واقفل بيه....بص يا فلان..انا محبش اللى يشتغلنى ....خد اللى انت عايزه بس عايز الشغل الصح ... طبعا صاحبنا بقى بيشتغل زى المكوك وشغل الشنطه على الريموت ..ومن غير كتاوت زى ما كان بيقول....... مميزات السنتر والانذار ايه بقى؟ لو حضرتك بيركب معاك ناس فى العربيه كتير لازم تلف كل ما تسيب العربيه تراجع على الابواب المفتوحه..وكتير انسى باب مفتوح ورا وانزل..واسيب العربيه.... اللمبه بتنور لما الانذار يكون مفعل...فالحرامى المبتدئ هيخاف.... العربيه مش هتدور الا لو اتفك الانذار..يعنى لما تفتح من الريموت... الفتح والقفل بالريموت اسهل واسرع من المفتاح... وفى مزايا كتير ممكن تفكر فيها بنفسك... نيجى بقى لوحدات الرفع..... ميزه وحدات الرفه فى العربيه المتعدله زى عربيتى ...إن الزجاج الكهربائى لا يعمل الا والكونتاكت مفتوح..... يعنى بعد ما تبطل العربيه مش هتقدر تفتح ولا تقفل الزجاج.... بينما فى الفول اوبشن بيكون فيها انك تقفل او تفتح الزجاج لمده قصيره حوالى 15 ثانيه بعد ما تبطل العربيه...... فوحده الرفع هنا تخلى الزجاج يترفع اتوماتيك مع الانذار لما يشتغل....وخصوصا لو معاك اطفال بيسيبوا الزجاج وكنت بليل ....مش هتاخد بالك وهتلاقى الزجاج مفتوح تانى يوم الصبح...وتحمد ربنا ان العربيه ما اتقلبتش او اختفت تماما..... دا تركيب السنتر والانذار...ووحدات الرفع كمان... |
| الساعة الآن 09:20 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017