مصر موتورز مجتمع السيارات - اسعار طازة لقطع واجزاء ريـجاتا من الوكالة وعزبة شلبي بتاريخ اليوم

اقتباس:

المشاركة الأصلية كتبت بواسطة waledahmed (المشاركة 386249)

السلام عليكم بفكر اجيب عربيه اجيب اه في حدود 15000 الف

حضرتك لو تقصد ريجاتا للاسف مفيش ريجاتا بالمبلغ دة .. لكن ممكن 128 حالة ممتازة جدا

اقتباس:

المشاركة الأصلية كتبت بواسطة michohat (المشاركة 385931)

هوا حضرتك بتنزل كتير هناك ؟ لو مش فيها صعوبه على حضرتك ممكن بعد اذنك تسأل على بعض الحاجات ( هيا مش ميكانيكيه )
الفوانيس الخلفيه للفيات 131 اللى هيا بالمنظر ده http://3.bp.blogspot.com/_7IhKWjDc9w...Tail_light.JPG
الفوانيس مش موجودة فى الوكالة انما موجودة جديدة بـ 200ج الجمب الواحد او الفانوس الواحد باللمبات بتاعتة بالفيش صناعة تركي سألت لحضرتك علية امبارح
العازل الحراري اللى بيكون فى صدر العربية ما بين الماتور والكابينه وبيتركب من جهه الماتور مش من الصالون
العوازل ممكن تشتريها بالمتر من التوفيقية المتر بيبدء من 5 ج ودة اضعف حاجة ومش عازل وفية 10ج لحد 25 ج المتر للنضيف وخامتة اتخن .. خلي السروجى يعملك القصة دى مش هتتكلف 70 ج بالمصنعية لو هتعمل صدر العربية بس
الفبره اللى بتكون حوالين عمود الدركسيون ( بسموها العلبه ) وهيا عباره عن 2 قطعه بيدخلوا فى بعض لتغطيه عمود الدركسيون و الكونتاكت
العلبة هسألك عليها انهاردة بأذن الله
تلبيسة فبر بداخلها اسفنج بتكون تحت الدركسيون وفوق البدالات
هسألك عليها انهاردة بأذن الله

القوائم البلاستيك اللى فى الصالون ( جنب البرابريز الامامي و قوائم الصالون )
مش فاهم النقطة دى لكن هسألة اكيد هو فاهم

الحتت اللى راكبه فى العتب وتحت الاكصدام اللي باللون الفضي http://3.bp.blogspot.com/_7IhKWjDc9w...131_Racing.jpg
وهل الماتور الابارث ال 2000 ده موجود ولا مش بينزل عندنا

سألت على الموتور فى محلين بس وللاسف غير موجود بس ملفتش يعنى معنى كدة انك محتاج لفة حلوة وتقريبا كدة طالما الاتنين دول بالذات معندهمش يبقى فية احتمال مش تلاقية .. وفية محل قالى ايوة موجود يا باشا تعالى دخلت لقيت موتور لانشيا علماَ ان الابارث معرفش شكلة لكن هقرأ الانجلش المكتوب علي الموتور وهعرف ان كان هو من الكتابة او لاء لقيت لانشا قلت لة دة لانشيا قالى هو دة حلو .. حلو على مزاجة هو .. عموما دة اللى وصلت لة

-------------------
محلوظة ومعلومة جديدة ف المصنعيات قد تكون مهمة لك :

اولا .. اسمحولى اشكر كل الناس اللى اتصلت بيا وعرفونى بنفسهم وشكرونى على حاجة فى استطاعتى وانى فعلا افدت حضراتكم واذكر منهم على وجه الخصوص " استاذ احمد " سبيد بيرد تقريبا ان لم تخوننى الذاكرة .. استاذ احمد اللى مكالمتة كانت مميزة نوعاَ ما .. استاذ احمد اتصل بيا علشان يشكرنى
وليس لطلب السؤال عن شيئ علشان كدة مكالمتة كانت مميزة شوية .. اشكرك استاذ احمد وتشرفت
بالتعرف على شخصية زى حضرتك

* اعتذر لعدم تذكر بعض الاسماء الاتصالات كانت كتيرة وبعضها مكنتش بسمع صوت الموبايل اساسا
واحب اوضح لحضراتكم نقطة مهمة جداَ . انا مش شغال فى الوكالة يا جماعة زى ما بعض الناس متخيلة كل ما فى الامر انى بنزل الوكالة لمرات عديدة .. ان شاء الله اخر يوم ليا ف الوكالة هو انهاردة الخميس 31 مارس - اتمنى يكون اخر يوم .. سبب انى بروح كدة ان السروجى مثلا طلب حاجات .. السمكري طلب حاجات .. وانا عايز حاجات واخوكم العبد الفقير الى الله ذاكرتة ف الضياع رغم انى شاب لذلك لما بفتكر حاجة بروح اجيبها .. وفى نفس الوقت كتير منكم يعرف نظام الصنيعية .. فلما بطلب منة حاجة يقولي فين اللى هقيس علية ! ال يعنى خلاص الواد شغال بالمقاس
شغل تلاكيك فعلشان امنع التلاكيك دى بنزل اجيب لة حاجتة واحطة امام الامر الواقع . بس دة السبب
غير انى متسرع .. يعنى بنصح حضراتكم بعدم التسرع بالشراء ومش بنصح نفسى ! بجري اجيب الحاجة اللى محتجها .. خصوصـــاَ ان الوكالة ممكن تنقص منها قطع معينة حد يشتريها ف لحظة .

هقول لحضراتكم معلومات اخري بعد الللف عند تجار الجملة والمحلات الكبيرة اللى بتبيع للصنيعية :) جامدة دى صح
هقول لحضراتكم مثلا .. " متر الجلد بتاع الارضية السروجى بيشترية بكام ؟ اسعار بتبدء من 10 ج وفية 8 ج المتر
شوفتو الهنا ؟ متر جلد الكراسى بيبدء من 20 ج الخامة المتوسطة .. يعنى بحسبة بسيطة كدة السروجى لو اخد منك ألف ج
علشان يظبط لك فرش العربية مصاريفة كلها بالكتير حسب تقديري هتكون 300 ج بزيادة والباقى مصنعيتة 700 ج !!
وصلت النقطة ؟؟ امبارح السروجى اتفاجئ لما بقولة المتر من دة بـ 8 ج اية القرف اللى انت جايبهولى دة . والله العظيم
يا جماعة الراجل ابتسم وتنح شوية وقالى طب دة ؟ قلت لة كبيرو عندى 20 ج المتر .. كنت طلبت منة الاتى :

تفصيل فرش قطيفة للكراسى ومخادع وحاجة ناسى اسمها كمان معاهم + جلد ارضية محترم + جلد كساء للتابلوة والرف الخلفي
فرش للابواب قطيفة + سقف قطيفة + ارضية شنطة جلد + عوازل للكابوت وصدر العربية وتحت الارضية
طبعا مرضاش بكل دة الدماغ الصعيدي اشتغلت وقلبت شوي وقلت لة المتر بكذا مش هيكلفك كتير مش للدرجة .

نروح للسمكري .. تكلفتة حسب المرمات اللى محتجاها العربية .. لذا منقدرش نتكلم عن السمكري غير ان متر الصاج
بيتراوح سعرة تقريبا 10 ج و 13 ج .. يعنى لو قلنا مثلا هيعمل مرمة صغيرة هتتكلف علية على ما اعتقد 10 ج لحام وصاج
بدون مصنعية دى تكلفتة هو .. وحضرتك بتدفع مثلا 50 ج لمرمة .. يبقى مصنعية حوالي 30 ج وممكن ف بعض الاحوال تكون 20 ج

الدوكو بقى : انواع كتيرة واسعار مختلفة .. فى وجهة نظري وعلى حسب طلباتى لعربيتى تكاليف شغلة هيكون :
800 ج ودة بزيادة كمان كتيرة يعنى دة سعر تقديري وبزيادة .. وباقي المبلغ اللى طلع من بوقة مصنعية لة .

جبت 3 متر فرش بلك .. نسيت والله سعر المتر بس تقريبا 15 ج .. فرش البلك دة بيعمل عازل وبيحمى الصاج من الصداء
شكلة عامل زى الورق فى رول .. بيتم تقطعية وفرشة على ارضية العربية مثلا .. ثم بعد ذلك تسخينة .. طبعا دة كان طلبي
من السمكري وكان عايز يرش بلك بالمكنة رفضت وطلبت الفرش دة لانة احسن وخامة انضف ولا يصلح مقارنتة بالتانى ابداَ

كدة حضراتكم عرفتو تقريباَ تكاليف كل واحد كام بدون مصنعيات وبدون حاجات قد يحتاجها السمكري او البوهيجي
اي انها ليست مقياس ولكنها ارقام تقديرية . حسب حسبتى مثلا السروجى مصنعيتة 700 ج طبعا السروجى مش بيقولك
انا مصنعيتى كذا وتكلفتى كذا ! لاء .. هو بيطلب مثلا 1000 ج لشد العربية تمام ؟ هـدفي من اللى انا كتبة دة انك تعرف
هياخد كام من الالف جنية وهيصرف كام .. لانة طبعا مش هيقولك التفاصيل دى ومش هيقولك انة هيشتري حاجات بكذا

دى صورة فى الوكالة وهما بيفكولي حاجات من نص ريجاتا .. ادعـــولي اخلص شد العربية على خير .. وان شاء الله
http://img101.herosh.com/2011/03/31/712787620.jpg

هيكون فية تقرير وصور للعربية وتكاليفها وهقولكم صرفت عليها كام بالظبط من ساعة مجبتها لحد اخر حالة . بأذن الله
لما تخلص حتى تكون لها افادة لجميع الاعضاء بمشيئة الله .. لا تـنسونى من دعاء بظهر الغيب