رد: تقرير عن شيفروليه لانوس ( كل ما تريد معرفتة)
 

رد: تقرير عن شيفروليه لانوس ( كل ما تريد معرفتة)
 

الأخوة الأفاضل فى المنتدى :

الحمد لله قمت بشراء لانوس 2013 و هى اصبحت شيفورليه كما يعلم الجميع و للأسف فوجئت باشياء لم اكن اتوقعها . العربيه منذ استلامها و بعد السير بها 350 كيلو و بدأت اشعر انها مراجيح هوائية و ليست بسيارة و زادت دهشتى عند الضغط على الفرامل شعرت بارتجاج فى كامل السيارة و اهتزاز غريب
و بالمصادفة اكتشف ابنى الصغير ان السقف من الأمام عند نهايته به عيب تشطيب و غير محكم التقفيل و هنا طلبت منه ان يقوم بالنظر الى نهاية السقف الخلفيه ايضاً و للأسف وجد انه غير محكم التقفيل ايضاً
بمعنى آخر (مفكوك من الأمام و الخلف ) و شراشيب القماش المقصوصه نازله منه . و بما ان العربيه جديده كنت رايح اشترى دواسات جديده طبعا و عند التركيب اكتشفنا ان الموكيت بتاع الأرضيه ناقص . بمعنى آخر

نهايتة عند البدال بتاع الفرامل و البنزين و قابب لبره بتاع 10 سنتى و متقفل ولا كأنه تحت الكوبرى

قولت ما بدهاش انا اروح على التوكيل و اعملهم فضيحة و للحق عندما ذهبت للوتكيل اللى فى شارع الطيران الناس متأخروش و قالولى نكشف و نشوف ايه مشكلة الفرامل طبعا الكلام ده من الساعه 8 و نصف صباحاً على بال ما حضر السيد الدكتور اللى هيكشف على العربيه و ياخدها فى تجربة قياده مأساوية رجع التوكيل و قال دى طنابير اماميه عايزه تتغير . هنا انا اندهشت و قولتله معقوله عربيه عامله 350 كيلو و تقولى طنابير طبعا كنت متضايق جداً ازاى عربيه جديده و يطلع فيها ده . المهم رضخت للأمر الواقع و تم تغيير الطنابير الأمامية و خرجنا فى تجربة مأساوية مره اخرى ( اللى كان بيسوق اظاهر نفسه كان يبقى سواق فى رالى عربيات ) و العيب برضه موجود و بعد تجارب عده قام قايل لا ( دى الطنابير الخلفيه هى اللى عايزه تتغير ) هنا اصابنى الذهول و قولت حسبى الله و نعم الوكيل

يا عالم اذاى اساسا عربيه تطلع من المصنع بالشكل ده و الأخ اللى بيقوم بلصق الملصق (FINAL OK )
بيلزقه على اى اساس ، و اذا كان موظف الجوده المسئول بيعمل كده امال العمال و الصنايعية بيعملوا ايه . المهم احب اقولكو ان التوكيل قالى للأسف الطنابير الخلفيه غير موجوده و هنكلمك اول ما تيجى عشان تيجى تغيرها. و ده بعد يومين

انهرده صحيت من بدرى . بدرى قوى و شديت الرحال على توكيل منصور شيفورليه اللى فى الهرم (انا فى مدينه نصر)
وصلت على الباب الساعه 8 و نص الأمن سالنى فى حجز قولتله لأ بس هيبقى فى حجز ليكم انتم (كنت شايط على الآخر) و طلبت اقابل اى مسئول المهم قابلت شخض مهذب اسمه المهندس محمد مش عارف باقى اسمه حكيتله على اللى حصل قام امر بدخولى و اول حاجه عملها ودانى ورشه الأصلاحات الخاصه بالسروجى (الفرش و ما الى ذلك) ندهو على اسطى من الأسطوات جه بص على الأرضيه قالى يا بيه عادى دى لسه مطبعتشى !!!!! قولتله ايه !!! هى ايه اللى مطبعتشى .. هو انت يتكلم واحد كان سايق كارو مثلا ً و دى اول عربيه فى حياته !!! بقولك الأرضيه قصيره و مش كامله لآخر الصدر من تحت بالضبط زى واحد طويل قوى ولابس بنطلون قصير قوى !!! هنا اتدخل المهندس المسئول عن الورشه و قال عندك حق يا بيه ، قولتله طيب و السقف اللى مفكوك ده قالى لأ ده برضه عندك حق فيه و هناك برضه جربه العربيه و خرج معايا واحد يسوقها و يجربها بس المره دى كان حنين و كويس فى سواقته و كان تقريره كالتالى

العربيه بتحدف شمال .. طارة الدركسيون معوجه يمين ... العجل محتاج ترصيص ووجود رعشه مع الفرامل اللى هيا الطنابير . ارضيه الدواسه مقصرة من قدام .. السقف ساقط من الأمام و الخلف و فى انتظار العرض على مهندس المصنع .

و طلبوا منى اسيب العربيه على ان اتصل بهم غداً لمعرفة ميعاد الأستلام سبت العربيه بالكامل بما تحتويه و خرجت من عندهم و انا محتاس هروح ازاى و انا كلى اصرار بمجرد وصولى اكتبلكم على اللى حصل عشان تاخدوا بالكم و تأكيداً على ان شيفورليه لانوس ولدت لتموت فى ذات الوقت .

احب اوضح لحضراتكم انى كنت امتلك دايو لانوس موديل 2007 و بعتها عروسه و الله و لم اذهب للتوكيل او عملت فيها اى شيء غير الصيانات الدورية العادية على مدار 5 سنين حتى عام 2012 و قررنا نبيعها و جبنا شيفورليه اوبترا .اوتوماتيك . هتقولولى طيب و تنزل من اوبترا اوتوماتيك و تجيب لانوس شيفورليه هقول اتقلبت رابع يوم رمضان الماضى و بعتها خرده و الحمد لله على كل شيء

انا حبيت انقل تجربتى ليكم عشان كل واحد ياخد باله و مستنى اشوف نتيجة الأصلاح ايه لأنى ناويلهم على نيه سوده .. و هشتكيهم فى جهاز حماية المستهلك . و هعلقلهم ورقه كبيره قوى على العربيه من ورا ان لانوس شيفورليه عربيه زباله و توكيلها ازبل و بيدور على الربح من خلال وضع مكونات غير مطابقه لمواصفات الجوده و رخيصة

بصراحه ندمت اشد الندم على شراءها و منصحشى حد يجيبها ولو بتفكر فى لانوس يبقى دايو مستعمل برقبتها و الأحسن تبعدو عن شيفورليه خالص لأنه بكده بيفقد مصداقيته

و اللى حابب يتابع حصل ايه معايا انا موجود .. و ماتنسونيش بالدعاء

رد: تقرير عن شيفروليه لانوس ( كل ما تريد معرفتة)
 

السلام عليكم جميع الاعضاء الكرام
استلمت عربيتى يوم الخميس الماضى (لانوس ls 2013) من مصنع 6 اكتوبر واثناء الاستلام وجدت قطعة ناقصة بجانب عصاية الفتيس وبالفعل تم استكمالها ولكنى ايضا وجدت رائحة تشبة رائحة التيل او الاسطوانة تخرج من السيارة اثناء دوران الموتور فابلغت العامل المسئول عن التسليم فابلغنى بأن هذة الرائحة عادية وستستمر لمدة شهر تقريبا وذلك لان جميع الجوانات وخاصة جوان الشكمان لسة جديدة (وطبعا لم اقتنع) مع العلم ان صديقى كان هو الاخر يستلم سيارتة فى نفس الوقت ولم يكن هناك مثل هذة الرائحة ولكن كان هناك عيوب اخرى فى سيارتة على سبيل المثال وليس الحصر اكرة الباب بتعلق وعند ابلاغ العامل قال (لا مفيش مشكلة حطلها شوية زيت وتبقى تمام) فاستسمحناة ليضع هو الزيت حتى لا نخرج من المصنع والسيارة بها عيوب وبالفعل تفضل بعمل اللازم. نرجع لموضوعنا المهم بعد استلام سيارتى غادرت المصنع متوجة الى الاسكندرية حيث اسكن ففى الطريق قولت اسحب بالعربية اشوف اية اخبارها و فعلا استجابت العربية لكن صوت الموتور عالى جدا جدا بالنسبة لعربية زيرو وايضا عند رفع قدمى من على البنزين صوت العربية يفضل عالى لمدة اربع خمس ثوانى الى ان يهدأ صوت الموتور والبور تقيل مقارنا بعربيات موديلات اخرى .
بصراحة العربية لم تنال اعجابى حتى الان :w6w200504112220146b ولم اشعر برائحة الزيرو فيها مطلقا فبرجاء من لهم خبرة بلانوس افادتى هل سيتغير هذا الوضع مع الاستخدام ام ستستمر على هذا الوضع واسف على الاطالة وشكرا للجميع.

رد: تقرير عن شيفروليه لانوس ( كل ما تريد معرفتة)
 

هي اكيد هتتحسن عشان لسه بتلين بس االعربيه في العموم فيها عيوب كتيره زي الطنابير والفرامل هتحتاج تغيرهم اكتر من مره وعيوب تقفيل كتير جدا غير كمان ان هتلاقي قطع كتير فيها خامتها ردئيه جدا بس حاول تتكيف مع الوضع وياريت تعرفنا انت اشترتها من المصنع ازاي انا اعرف ان المصنع مش بيبع سيارات الموزعين بس اللي بيبعوا فياريت توضح النقطه ديه

رد: تقرير عن شيفروليه لانوس ( كل ما تريد معرفتة)
 

شكرا على اهتمامك
بالفعل انا حجزت العربية من معرض منصور الى فى شارع جامعة الدول وهما الى بعتونى استلم من المصنع .