مصر موتورز مجتمع السيارات - ارشيف الاستراحة 2010

http://www.box.net/index.php?rm=box_...id=f_142856589

- ممكن حضرتك تطفي السيجارة
# ليه في حاجة
ـ أصل التدخين ممنوع
# ليه هو احنا في مترو الإنفاق ولا في سينما
ـ التدخين ممنوع في كل مكان
# ليه بقي
ـ ربنا اللي قال كده
# ونعم بالله ... بس في ناس كتير بتدخن ومنهم ناس لها احترامها يعني كلهم غلط
ـ طيب مش الخمر حرام
# ايوة
ـ طيب ما في ناس لها احترامها زي ما بتقول بتشربها ... نشربها احنا كمان!
# لا
ـ ليه؟
# عشان ربنا قال " يَا أَيُّهَا الَّذِينَ آمَنُواْ إِنَّمَا الْخَمْرُ وَالْمَيْسِرُ وَالأَنصَابُ وَالأَزْلاَمُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ (90)" [المائدة]
ـ ما شاء الله ... أنت جبت المفيد
# ازاي
ـ الخمر حرام ليه
# لانها بتسكر الإنسان وتذهب عقله
ـ طيب و زيها الدخان يسكر الإنسان ويذهب عقله
# لا لا ما بيحصلش حاجة من دي خالص
ـ طيب براحة ... في اول مرة شربت فيها دخان حسيت بأيه
# حسيت بشعور غريب كأني فرحان ودماغي في وادي تاني
ـ وبعدين .... مرة في مرة خدت عليها وما بقتش تحس بكده ... صح
# صح
ـ طيب اللي بيشرب خمره أول مرة بتكون حالته في الضياع ومرة بعد مرة ولا عشر كاسات يأثروا معاه ... صح
# كلام مظبوط ... بس برضه مش مقتنع بأنه حرام
ـ طيب ... فلوسك بتخلص علي الدخان ولا لا
# لا ... الحمد لله معايا فلوس بتكفينا وازيد
ـ طيب لما ربنا اعطاك فلوس تكفيك وازيد تولع فيها بالدخان اللي بتشربه ... مش ده يبقي اسمه تبذير وربنا بيقول {...ولا تبذر تبذيراً إن المبذرين كانوا إخوان الشياطين...} [الإسراء 27]
# ما هو
ـ ما هو ايه مش ده صرف فلوس علي الفاضي وكمان بتصرف فلوسك في حاجة بتضرك قبل أي حد تاني
# الله اكبر ... ما الواحد صحته زي البمب اهيه
ـ يا عم ربنا يحفظك ... يعني انت مش عايز الصحة دي وبتدمرها
# ادمرها ازاي يعني
ـ اضرار التدخين كتير جدا ... تعرف حاجة منهم
# بيسوس السنان
ـ بس كده ده انت غلبان اوي ... خد عندك (( سرطان الرئة - ضيق الشعب الهوائية وتمدد الرئة - جلطة القلب - أمراض الفم والأسنان )) وغيرها كتير
# ايه يا عم ده كله
ـ ومش بس كده ده نسبة الاصابة بالامراض بتزيد عند الشخص المدخن

الــمــرض ------ احتمال الإصابة لغير المدخن --- للمدخن ---- نسبة الوفيات من المرض نتيجة التدخين
تصلب الشرايين ---------- 1 ----------- 2 ---------- 25-43%
الجلطة القلبية ------------ 1 ----------- 5 --------- 75-80%
سرطان الرئة ------------- 1 ----------- 10 --------- 80-85%
ضيق الشعب الهوائية ---------- 1 ----------- 6 --------- 80-90%
الغرغرينة --------------- 1 ----------- 9 --------- 90-98%
الوفيات نتيجة لمختلف أنواع السرطان --- 1 ---------- 2 ---------- 30%

# ده كله
ـ شفت بقه
# لا كده الواحد يفكر في الموضوع
ـ طيب اعمل في حسابك ان الرسول – صلي الله عليه وسلم – قال (( لاضرر ولا ضرار ))
# يعني ايه
ـ الضرر انك تضر نفسك والضرار انك تضر غيرك ... وانت بتعمل الاتنين بالدخان
# لا حول ولا قوة الا بالله
ـ لا وكمان الرسول – صلي الله عليه وسلم – قال ((من قتل نفسه بشيء عذب به يوم القيامة )) [متفق عليه] .... ايه رايك في الدخان بقي
# والله هو كده شكله حرام
ـ شكله ! ... هو حرام وكمان مفتي الديار المصرية أصدر بيان بحرمته واعتقد انك لمحته كتير
# ايوة ... طيب ازاي ابطل الدخان
ـ ممكن عن طريق شوية حاجات
# زي ايه
ـ مش ساعات بتكون مضايق وطهقان
# كتير
ـ ايه اول حاجة بتعملها
# بولع سيجارة
ـ لا المرة دي بدل ما تولع السيجارة اشرب شوية ليمون او لبن يهدي اعصابك
# ليه ؟ شايفني عيل
ـ خلاص متزعلش اشرب فنجان قهوة او نسكافيه او حتي كابتشينو ... المهم ما تولعش السيجارة
# عملت كده ومفيش فايدة
ـ اتصل بواحد صاحبك او الهي نفسك في أي حاجة تضيع الفكرة دي من دماغك
# الوقت بيبقي متاخر وما ينفعش اتصل بحد
ـ ممكن تنزل تتمشي شوية وتشرب حاجة ساقعة
# مش بقولك الوقت بيبقي متاخر انزل ازاي
ـ خلاص قول لنفسك هاولع السيجارة بعد نص ساعة ... كل ما تحس انك عايز تولعها قول كمان شوية
# وبعد الشوية ما يخلصوا
ـ ما انت ما تسبش نفسك لغاية ما يخلصوا اشغل نفسك بحاجة مفيدة
# زي ايه
ـ اقرا في أي كتاب وانشغل مع الموضوع بتاعه
# ما بحبش القراءة
ـ اسمع شريط يكون بيكلم عن حاجة مفيدة
# طيب وانا فشلت برضه
ـ افتكر جو رمضان وانت صايم
# ازاي يعني
ـ حسس نفسك كانك في رمضان وانت صايم وبيكون نفسك في كوبية مياه والدنيا حار نار وما بتفكرش حتي تشربها وانت في عز الحاجة لها وبتقول انا صايم ، اعمل كده مع السيجارة وقولها ان صايم عنك لغاية ما اموت
# وان كنت بالليل
ـ افتكر لما بتكون في المترو او في أي مستشفي
# وان فشلت بعد ده كله
ـ خد قرار واحد ... انك مش هتدخن تاني
# وان ما عرفتش و انت عارف الشيطان
ـ مين اللي خلق الشيطان
# ربنا طبعا
ـ طيب استعن بالله عليه وهو هيبعده عنك
# ازاي
ـ بكل بساطة قول (( أعوذ بالله من الشيطان الرجيم ))
# بالبساطة دي
ـ ايوة بالبساطة دي
# طيب !
ـ ايه مالك شكلك مش مستريح
# خايق ما أقدرش
ـ لا ... إن شاء الله هتقدر
# خايف
ـ اصبر واستعن بالله ... استعن بالله
# لا إله إلا الله
ـ محمد رسول الله
# صلي الله عليه وسلم