المشاركة الأصلية كتبت بواسطة AboNoRa (المشاركة 220965)

اهلاً بيكى فى مصر موتورز ومبروك على افتتاح الموقع
فقط اسمحيلى استعرض مع حضرتك بعض النقاط اتمنى ايصالها الى ادارة الشركة للعمل بها حتى تخرج الفكرة بالشكل الائق ان شاء الله

اولاً يجب توضيح طبيعة التمويل بمنتهى الشفافيه بالاضافة للهدف من الخدمة ككل وطبيعتها
الواضح بالنسبالى ان الشركة تهدف لجمع قدر كبير من افكار المشروعات تقوم بتسويقها وعرضها على مجموعة ممولين وغير معلوم بشكل واضح طبيعة علاقة الشركة بالممولين
بمعنى اوضح هل الشركة هتبيع فكرة المشروع للمول وبس ولا هتديله بيانات صاحب الفكرة للاتصال بيه وبس (بدون الكشف الكامل عن الفكرة) ولا هتاخد نسبه من الممول او حتى الممول وصاحب الفكرة كمان ؟

ثانياً الشركة لا تتيح الخدمة بشكل كامل الا بعد ان يقوم صاحب الفكرة بدفع مبلغ 20 دولار
طبعاً مفيش مانع ان الموقع ياخد مقابل خدمة بيعملها بس الاول عايزين نعرف بالظبط ايه الخدمة اللى بيعملها ! او بمعنى اصح انا لما ادفع المبلغ ده هحصل على ايه بالظبط
اكيد انا مش هدفع المبلغ ده بس فى مقابل انى اديكم فكرة مشروعى اللى هتاخدوها تبيعوها لحد تانى مثلاً !!؟

ثالثاً وبالاضافة لما سبق اسلوب الدعاية للموقع وتصميمة المتواضع شكلياً وبرمجياً والبحث عن معلنين فى المساحات الاعلانية للموقع كل ده يضر بشكل الموقع ومدى جديته ومصداقيته

رابعاً من الحاجات الغريبة برضو البانر اللى مكتوب فيه 100 الف فرصة تمويل
طيب فرص التمويل ديه محسوبه بناء على ايه ؟ ومين بيقدمها ؟
لو بنقول ان الشركة شغلتها تسوق مشروعات الاعضاء للمولين عموماً ماشى لكن فيه ممولين فعلاً يبقى الافضل توضح الشركة طبيعة الممولين دول مين عارف مش يمكن ممولين يهود ولا حاجة

خامساً وده الاهم الموقع لا يقدم اى ضمانه للإعضاء بالحفاظ على سرية وخصوصية معلوماتهم وكان من الواجب ان يظهر الموقع وثيقة سياسة الخصوصية
بل يجب ايضاً ان يقدم لاصحاب المشروعات ضمانات كافيه تضمن الحفاظ على افكارة الخاصة بالمشروع من السرقة او اسائه الاستغلال والا انا اضمن منين انى مكتبش فكرة مشروع ناجح وحد تانى يستغلها ونفذها بدون مراعاه لحقوق الملكية الفكرية لصاحبها الاصلى

يعنى بصراحة الموقع يعكس وبكل وضوح عدم احترافيه وتواضع شديد فى التخطيط ليه والميزانيه بالاضافة لما قد يثيرة من شكوك نظراً لعدم وضوح الكثير من النقاط الهامة

اتمنى الا تضيق صدوركم بما اسلفت فقط اتمنى ان تكون النيه صادقة لديكم لخدمة الشباب العربى بالجدية والاحترافيه الائقه لهذه العمل