مصر موتورز مجتمع السيارات - ارشيف الاستراحة 2010

فعلا عندك حق
لازم المعاملة تكون ادميه وده الملحوظة او الانطباع اللي بياخده المتقدم لاداء الخدمه او المجند في اول ايامه في الجيش انه مافيش معامله ادميه خالص
ولكن
انا خدمت سنه في الجيش واتبهدلت واتمرمطت ونضفت وكنست ومسحت وسهرت خدمه بليل وطلعت طوابير لما اتهريت
ولكن بردوا فيه حاجات عاوز اقولها لكل الشباب اللي مستني دوره في التجنيد والاول اقول لصاحب الموضوع ماتزعلش ولما تقرا الكلمتين اللي جايين دول ان شاء الله انت وغيرك مش هاتزعلوا وهتقولوا عادي
الجيش في اي مكان مبني على الطاعة العمياء تنفذ الاوامر من غير مناقشه لان الاوامر بتبقى مع قائد واحد واللي تحت منه كتير اوي فلو استني لما يناقشهم ويسمع اعذارهم مافيش حاجه هاتتعمل
الواحد فينا في مرحلة التقدم للخدمه العسكرية بيكون غالبا خصوصاالمؤهلات العليا بيكون دلوعةالبيت او اقولك بلاش كلمة دلوعه بيكون مرفه او اهله بيعاملوه على انه انجز وخد العالميه
فجاه بيصطدم بالتجنيد في اول مراحله بيلاقي خشونه وعنف وبيحس انه مافيش ادميه انما لما بيدخل الجيش بيبتدي يتحمل ويتعايش مع المعامله دي ومابيحسش بالفرق الكبير بين الملكيه والميري
اخوانا المتمرمطين في الملكية زي العمال وغير المتعلمين الدنيا بتعاملهم بقسوه ف مش بيلاقواالفرق كبير اوي بين جوه الجيش وبره الجيش
زي ما بقولك الهدف من الخشونه دي هوا تعويد المجند على السمع والطاعة طيب هتقولي انا كنت لسه مش مجند او كنت مستني الاعفاء هقولك (بس خليك بحبوح وكوميدي وماتزعلش مني ) هقولك انت وزمايلك اللي طلعتوا اعفا لو كانت المعامله عادي في مركز التجنيد كان زمانكوا عملتوا زفه بلدي وهاتك يا اغاني ورقص فرحانين بقى امال ايه ولو انت مستواك العلمي والاجتماعي يمنعك انك تعمل كده غيرك هايعمل وده ما يصحش في منشات عسكريه
طبعا ماحدش ينكر ان احنا شعب فينا نسبه كبيرة من التسيب والفوضى وده غير مسموح بيه في اي منشاه عسكرية في العالم مش في مصر بس وشوفوا الافلام الامريكي العسكري واقف زي الالف قدام الرتبه الاعلى مابيرمشش
انا مش بدافع عن المعاملة الخشنه اللي انا عانيت منها سنه بحالها واتمنى انهم يخففوا من حدتها شويه لكن بردوا عاوزك انت وباقي الشباب تتفهموا الدوافع اللي بتخليهم يعملوا مع الشباب كده