مصر موتورز مجتمع السيارات - ارشيف الاستراحة 2010

هحكيلكم حكاية تانية
زى ما حضراتكم عارفين من المشاركة اللى فاتت انا عايش حاليا فى الكويت
اشتريت غسالة المفروض انها نوع محترم بس للأسف طلعت بتعطل كتير جدا يعنى مرة كل 4 او 5 شهور ... المهم كان عليها ضمان 3 سنوات و خلال فترة الضمان يوم ما تعطل اتصل بالشركة تانى يوم يبعتولى فنى يصلحها فى ساعتها لو ينفع و لو محتاجة قطعة غيار يجيبها تانى يوم و ييجى و تتصلح و كله تمام بدون اى مشاكل و طبعا بدون اى رسوم..

فى مصر اشتريت غسالة برده من شركة المفروض انها محترمة .. الغسالة اشتغلت مرتين و باظت كلمت الصيانة كل يوم و التانى هنبعت لك واحد و شرف الباشا بعد الخناقات و المحايلة و صلحها و برده باظت بعد يومين تانى و اتصالات تانى و تالت لحد ما جالى الباشا الكبير بتاعهم قلتله انتو ليه بتعذبونا على ما بتيجو ؟؟؟؟ قالى علشان انت المرة اللى فاتت مادفعتش الرسوم (مع ان الباشا اللى قبله ماطلبش الرسوم)... رسوم ايه مش الغسالة فى الضمان قالى لأ فيه رسوم و فيه فلوس قطع غيار كمان قلتله امال ضمان ايه بقى اللى بتقولو عليه.. المهم فك الغسالة و قالى دى محتاجة قطعة غيار بس القطعة مش موجودة فى الشركة ممكن نجيب قطعة مصرى بدالها .. قلتله يعنى الاصلية بايظة و المصرية هى اللى هتشتغل ؟؟؟
قالى ماتقاطعش بس قول ان شاء الله .. قلتله و ان شاء الله هتيجى امتى قطعة الغيار قالى بعد 3 ايام و فضلت 10 ايام اكلمه فى التليفون كل يوم يقول بكرة ....(منتهى النصب و منتهى قلة الأدب) آخر ما زهقت شلت الغسالة ووديتها على المعرض و بدلتها بواحدة تانية و طبعا دفعت الفرق زى الشاطر و حسبى الله و نعم الوكيل .