رد: العربية بتنتش على الاول
 

استاذ احمد على : تم عمل الاتى
1- تغيير زيت فتيس نوعه فالفولين
2- تغيير البوجيهات
3- تركيب علبة البيئه لانها كانت مش متركبه والميكانيكى قال انها مهمة
4-تنظيف تانك البنزين وفحص الطرمبه والموتور ولا يوجد عيوب بهم

لازالت العربيه بتنتش على الاول وعلى السلانسيه وممكن تبطل احيانا .

انا حاسس ان الصنايعية مش فاهمين وكل واحد يقولى رأى - اخر ميكانيكى قالى ده عيب رشاشات وسألت عليهم لقيتهم ب 800 جنيه

مش عايز اغيرهم والاقى نفس المشكلة برضو.

ممكن حضرتك تقولى اعمل ايه علشان زهقت والعربيه لسه عامل بيها حادثة بسبب التنتيشه دى كلفتنى رفرف جديد .

شكرا مقدما لحضرتك

رد: العربية بتنتش على الاول
 

مش العربية عند حضرتك اوتو ؟ ولا جبت زيت اسمة كدة فالفولين؟


عداد الـ RPM على السلانسية بيكون كام لفة / دقيقة ؟

رد: العربية بتنتش على الاول
 

العربيه اوتوماتيك موديل 2004

نوع الزيت اسمه فالفولين زى موبيل وشيل بس الميكانيكى قالى ده انضف واحسن.

عداد ال RPM على السلانسيه بيكون تحت الالف لفه بشرطه (يعنى ممكن تقول 800 او 900) اول ما ادور.
بعد ما ادور واسيبها دقيقه مثلا بلاقيها بدأت ترعش وتتبرجل كده ساعتها ال RPM بيقل وممكن يوصل 500.

بضطر ازود وانا على السلانسيه علشان الرعشه دى تروح.

الموضوع ده برضو بيحصل على السرعات البطيئه يعنى تقريبا على الغيار الاول (اول ما امشى بيها أو لو بعدى مطب أو لما اركن).

على فكرة كان فى خرطوم مفكوك من الاول (وانت فاتح الكبوت بيكون على الشمال فوق) .... سألت الميكانيكى عليه قالى ده بتاع المنافول وبعدين ركبه بعديها بيومين او تلاته الموضوع ده حصل .... ممكن يكون ليه تأثير؟؟
شكرا مقدما

رد: العربية بتنتش على الاول
 

مع انى مقدرش احدد الخرطوم تبع ايه بس متهياليش هو السبب لان لو كان السبب كان بان على طول

و برضه انا عارف انها متاخرة علبة البيئة ملهاش تاثير غير على البيئة دا غير ان اكيد اللى ركبت مش علبة بيئة لان تمنها لوحدها يعدى ال 1500 جنيه

طالما ال rpm قليل كده قوى يبقى ضرورى ميكانيكى خبرة ينضف صمام الايدل و البوابة

سؤال مهم بقى : هل فى لمبة صفراء اسمها check منورة فى التابلوه ؟

رد: العربية بتنتش على الاول
 

500 لفة / دقيقة قليل جدا كما تفضل وقال استاذنا "احمد على " لازم العربية وهى سخنة يكون 900لفة / دقيقة ......بغض النظر وهى باردة على كام لفة / دقيقة
لازم السلانسية يعلى شوية من مسمار الرجلاش بتاع البكرة
ويا ريت تصور خرطوم اللى داخل على المانيفولد او البوابة لانى شاكك انة خرطوم الفايظ

رد: العربية بتنتش على الاول
 

بص نظف الرشاشات و بعدين لو انت على N و بعدين جبت D فالنتشه ديه عادية فى الاتوماتيك انا معايا فيرنا اتوماتيك بتعمل كدة و كمان ركبت RB اتوماتيك بتعمل كدة بردة بس البرجلة و الحاجات ديت ابقى شوف الرشاشات و نظفها و البوابه كمان و الحساسات

رد: العربية بتنتش على الاول
 

شكرا لكل الردود والاهتمام بالمساعدة .

بالنسبه للاستاذ احمد على : العلبة انا جبتها ب 650 جنيه ومفيش لمبه check منورة فى التابلوه .
انا ان شاء الله هاروح للميكانيكى النهاردة واكشف على العربيه على الاسكانر وهاقوله ينضف صمام الايدل والبوابه. بس بصراحة انا معرفش اذا كان الميكانيكى ده بيفهم ولا لأ خصوصا انى انا اساسا مش بفهم قوى فى صيانة العربيات.

بالنسبة ل mr- astra انا هاصور الخرطوم علشان تقولى ده بتاع ايه.

بالنسبة ل michaelmic : التنتيش مش شرط يحصل لما انقل من NالىD - ده بيحصل على السلانسيه او الغيار الاولانى لما اهدى مثلا او اركن او اعدى مطب - الموضوع مش طبيعى خااالص