المشاركة الأصلية كتبت بواسطة MORE83 (المشاركة 53418)

لا لا لا لا لا .... الماروتى دى لعبتى بقى ....
أستاذة شيرى ... انا معايا ماروتى 2008 اشتريتها من سنة بالظبط و أنا ساكن فى مدينة نصر و شغلى فى 6 أكتوبر و رغم إن المشوار كبير إلا انها و للحقيقة مشتكتش منى خالص على الرغم من ان العربية اللى قبلها كانت لادا بمعنى انى كنت " بتعافى " على العربية شويتين بحكم التعود

* مميزات الماروتى
واسعة من جوة بالنسبة لشكلها و حجمها
سحبها جميل و على أد إمكانياتها بتمشى بسرعة
طبعا - بتتركن فى أى مكان
عن تجربة ... قطع الغيار متوفرة و أسعارها كويسة و مناسبة جدا ... دة غير إن ليها كتير من مراكز الصيانة و محلات قطع الغيار اللى منتشرين فى مصر .... صحيح ان عربيتى ماشية بقالها سنة بس لكن كنت بسأل على الحاجات من باب العلم بالشئ
إستهلام البنزين هاااااااايل .... بتستهلك حوالى 20 لتر لكل 420 - 450
بتستقبل مختلف أنواع البنزين مع انى بعاملها كويس و بحط 92 إلا انى لما اتزنقت مرة و حطيت 80 كانت ماشية كويس
سافرت بيها اسكندرية حوالى 5 مرات و مشتكيتش ... مع العلم انى كنت بريحها كل 80 - 100 كيلو ... لمدة 10 دقايق

أما بقى العيوب
لو ربنا هيوفق حضرتك فى شرا الماروتى فلازم تنسى الشنطة تماما - مع ان العربية فيها إمكانية طى الكنبة لكن برضه هتفضل مساحة الشنطة صغيرة حبتين

العربية خفيفة فعلا و أى مطب جامد أو حفرة هتحسى بيهم بجد ... ورغم انهم مش هيأثروا فى العفشة - ودة اللى يثبت ان عفشتها قوية إلى حد ما -

إنعدام وسائل الأمان - ما عدا الحزام طبعا

العربية بتيجى فاضية بمعنى الكلمة ... حتى ان الفرش فى الأرضية لازم مالك العربية يروح بنفسه للسروجى عشان يفك الكراسى و يركبه...... "الفرش بييجى فى شنطة العربية "

الثبات بتاعها مش أد كدة

و فى النهاية دة مش إعلان لبيع عربيتى لا سمح الله ... لكن بأمانة دى عيوب و مميزات العربية من وجهة نظر مجرب ... و على الأقل هى عربية أثبتت كفاءة من سنين على العكس الصينى - اللى مش برتاح له خالص -

و ربنا يوفق حضرتك للى فيه الخير
أشرف