مصر موتورز مجتمع السيارات - أدعو كافة الاعضاء للقراءة بعقلانية و دون هجوم بدون مبرر

مصر موتورز مجتمع السيارات (https://www.masrmotors.com/vb/index.php)

- الصينى العام (https://www.masrmotors.com/vb/forumdisplay.php?f=42)

رد: أدعو كافة الاعضاء للقراءة بعقلانية و دون هجوم بدون مبرر

معلش يا حازم ماظنش ان العربيات الورق و انعدام عوامل الأمان ممكن تتباع او تنزل اصلا في اسواق اوروبا و امريكا
مش هيقبلوا اصلا يدخلوها السوق

اكيد العربيات اللي بتنزل برا مصر بتتقيد بعوامل امان معينة و اشتراطات و مواصفات محترمة
هنا كله في الكليتش
كفاية ان التوكيل بيشيل الأير باج من العربيات
يا عم دا احنا في الضياع خالص

رد: أدعو كافة الاعضاء للقراءة بعقلانية و دون هجوم بدون مبرر

هو فيه ملحوظة عايز أضيفها خاصة بالأسعار و هى
أولا رخص العمالة الصينى بالمقارنة باليابانى و الأوربى و الكورى حتى
يعنى جزء من الفرق فى الأسعار راجع لتكلفة العمالة (انا بقول جزء بس علشان صناعة السيارات مش بتعتمد على العمالة بنسبة كبيرة)
الجزء التانى هو مصاريف البحوث و التطوير (نسبة محترمة من تكالف الشركات الكبيرة بتكون لتطوير الأنظمة المختلفة فى السيارة - و هى السبب الحقيقى لظهور الإختراعات المذهلة اللى كل شوية تطلعلنا من الشركات الأوربية مثلا) و أعتقد إن الشركات الصينى مريحه بالها من موضوع التطوير ده خالص بتستخدم بس التكنولوجيا الموجودة بدون تعديل أو تطوير فيها ( صحيح ممكن يكونوا بيستخدموا أحدث تكنولوجيا فى السوق) لكن مبيصرفوش كتير علشان يطلعوا ابتكار خاص بيهم يطور عربياتهم (لسه فى ابتدائى يا جماعة)

المهم الشقين اللى فاتوا دول ممكن يأثروا على سعر أى عربية بالإضافة للكلام اللى اتقال قبل كده بخصوص الخامات

رد: أدعو كافة الاعضاء للقراءة بعقلانية و دون هجوم بدون مبرر

اقتباس:

المشاركة الأصلية كتبت بواسطة oldman (المشاركة 48273)

فى هذه المشاركة أدعو كافة الأطراف للقراءة بعقلانية و دون هجوم بدون مبرر على صناعة السيارات الصينية

•السيارات الصينية مثل أى سيارات فى العالم (مفاجأة مش كدة ) طب تعالى نشوف النقاط التالية و هى خلاصة كل نقاط هجوم الأعضاء على الصينى و بعدين أترك الحكم للأعضاء:

1-بعض الأخوة ينتقدوا تقليد السيارات الصينى لبعض الموديلات السابقة لسيارات أخرى !!

لماذا لم تنتقدوا الأكسنت و الأكسيل عند بداية ظهورها و هى تقليد للهوندا سيفيك والأكورد دا حتى إسم هيونداى نفسه تقليد (يعتى الصينيين لم يصلوا لتقليد الإسم كمان)
لماذا لم تنتقدوا ميكروباصات النيسان الجديدة والهيونداى و هى نسخة من التويوتا موديلات التسعيتيات

هيونداي كلمة كورية تعني ..... الحديثة
و مش فاهم ايه الميكروباصات اللي شكل بعضها دي !!!

2-البعض ينتقد وجود أكثر من توكيل لنفس الشركة (مثل الشيرى) و يقولون أن ذلك لأجل المبيعات!!
إخوان مقار هو توكيل الأوبل فكترا و منصور أوبل هو توكيل الأسترا (ولا تعلبق)

الصراحة معرفشي المعلومة دي و مش مصدقها

اعتقد مقار مجرد موزع و مركز خدمة معتمد

3-آخرين يقولون أن تقفبل الصينى أى كلام !!
هل رأيتم السوزوكى سويفت (عند بداية نزولها) و دى يابانى و هل يعجبكم أوى تقفيل الشاهين والأكسنت المجمعة فى مصر (بصراحة بعض الصينى أنضف منهم وشوف تفقيل الشيرى مثلا) وهل تعلم أن أحد معارفى كان معاه دايهاتسو سيريون و مفتاح أتوماتيك الشباك باظ بعد 6 أشهر ولم يستطع التوكيل حل المشكلة لعدم توفر قطعة الغيار (هذا الموضوع بقاله 4 أشهر و مازال الشباك مفتوح)

متفق معاك في دي مش كل الصيني تقفيله وحش و بحس ان الناس اول ما بتقعد في عربية صيني بيتفلحسوا فيها بزيادة

4-بعض الناس يقولون أن معامل الأمان ضعيف فى الصينى!!
هل رأيتم إختبارات الأمان فى الانوس 2002 و الفيرنا (وهى معروفة بإسم الأكسنت بالخارج) والأفيو 2005

دي عربيات تكنولوجيا قديمة و موديلات قديمة انتهي تصنيعها في الخارج و اللي بيشتريها عارف كده ، لكن العربيات الصيني الغالي و الرخيص و القديم و الجديد كه ضايع في اختبارات الامان ( حتي الآن )

5-مشكلة عدم توفر قطع الغيار!!
العديد من الموديلات الأخرى بها نفس المشكلة مثل المازدا والانشيا والسيتروين و لكن ما يميز الصينى أن موديلاته هجين من عدة موديلات يعنى تقدر تولف عليه أى قطع غيار

و كل الموديلات دي مش ناجحة في السوق و معالهشي اقبال و مالهاش اعادة بيع

6-الببعض ينتقد الصينى ويقول أن السيارات رقيقة و هشة !!
هذه النقطة فى أغلب السيارات الحديثة و ذلك لأغراض تجارية ولزيادة سرعة السيارة مع تقليل قدرة المحرك وأعتقد أن الأكسنت والانوس و الكيا و حتى التويوتا ليست بها صاج 8 مم مثل الشيرى

متفق معاك فيها

7-النقطة الأخيرة وهى أن البعض يقول أن توكيلات الصينى فى مصر سيئة!!
هذا العيب عندنا نحن وليس الصينين لهم ذنب فيه و على فكرة توكيل الدايهاتسو اليابانى و السيتروين الفرنسية من أسوأ التوكيلات فى مصر لعدم توفر أغلب قطع الغيار عندهم

بس في كل الأحوال محدهش من توكيلات السيارات العالمية ذات الأسم المعروف بيقفل او بيبيع شروة و يخلع زي ما حصل للعربيات الصيني وحتي لوده حصل تاني يوم خمسين واحد هيتاخنقوا عشان ياخدوا التوكيل ،

هذا هو ملخص إنتقادات الأعضاء و أعتقد أن النتيجة فى النهاية ( السيارات الصينية مثل أى سيارات فى العالم)

وأنا أتقبل الردود من الأعضاء وياريت ننظر فى الجانب المشرق لهذه السيارات ذات الأسعار المناسبة

منقول

الردود في الاقتباس

رد: أدعو كافة الاعضاء للقراءة بعقلانية و دون هجوم بدون مبرر

بصراحة انا غير ناس كتير ممكن يكونوا بيبصوا على اسم العربية كماركة قبل اى حاجة

انا ببص على تاريخ العربية وعلى تصميمها واعتماديتها واقتصاديات تشغيلها فى طرقنا وقيمتها فى السوق وانتشار قطع غيارها وصيانتها

اى حاجة تانية ثانوية بالنسبالى

علشان كده عندى استعداد اشترى عربية زى الانوس او فيرنا او كيا برايد او جين تو او لايونسيل حتى ولو تجميع او تقفيل كولالمبورى مش صينى او مصرى كمان

المهم التصميم عربية زى الايونسيل الصينى هى هى الانسر كريستالة يعنى بعد 100 الف كم على اقل تقدير يعنى بعد خمس سنين اللى هيوقع منها هلاقيلة قطع غيار يابانى وكورى وصينى ومن عزبة شلبى والحرفيين

نفس الكلام على الانوس وعلى الكيا برايد وكل العربيات المعاد انتاجها تصميمات ناجحة حتى مع اعادة انتاجها بخامات اقل جودة مثلا هبقى كسبان مش خسران

ده بالنسبة للتصميمات المعاد انتاجها

بالنسبة للتصميمات الجديدة او بالاحرى التصميمات المجمعة اشى موتور متسوبيشى على عفشة تويوتا على صالون ستروين ديه حسبتها اصعب طبعاً ولازم اكون متاكد من توفر قطع الغيار ديه فى السوق بتاعنا وباسعار مقبولة ولازم اكون عارف ان قطع الغيار التانية (رفارف وكبوت واى اضافات صينية اخرى) سعرها كويس فى التوكيل وياريت تكون موجودة بره التوكيل بسعر معقول

والكلام ده ينطبق على ال frv والشيرى والbyd

ال byd استحالة اشتريها علشان توكيلها سىء جداً عن تجربة
ال frv قطع غيارها غالية ومش متوفرة برة التوكيل
الشيرى (سبيرانزا) التوكيل كويس وخبرتة فى الفئة ديه من العربيات (لانوس سابقاً) تشفع له بالاضافة لان قطع الغيار خرجت من عبائه التوكيل وبقت موجودة عند التجار بره فديه ممكن افكر فيها بس برضو المهم التصميم

اما عن الطعم والمذاق والتقفيل ونوعية الخامات وملمسها والكلام ده مع احترامى مش محلة العربيات الصينى اللى موجودة فى السوق ولا محلة سوقنا اصلاً

العربيات فى الفئات ديه مش مطلوب منها ان يكون لها طعم ومذاق وملمس المطلوب تكون عربية ترضى رغبات صاحبها وصيانتها وقطع غيارها متوفرين وبس

رد: أدعو كافة الاعضاء للقراءة بعقلانية و دون هجوم بدون مبرر

كيف بدأ الصيني في مصر
أول القصيدة كان كفر شيري QQ و مابل ؟؟؟؟؟
البداية الحقيقية كانت مع أبو الفتوح و قام بتجميع شيري تحت اسم اسبيرانزا لتفادي السمعه السيئة و بكده بقي في عدد اتنين توكيل لشيري مقسمين الموديلات بينهم و لو اني اعتقد ان الموضوع مسألة وقت ليستأثر أبو الفتوح بـشيري

طبعا كل من سبقني رد بما لا أنكره و أحب أن أضيف
سمك الصاج لا يعني الأمان بل علي العكس تماما
حتي بداية التسعينات كان هذا هو المفهوم السائد و لكن مع تزايد الاهتمام باختبارات الأمان وجد أن الصاج القوي في الحوادث الجسيمة بمثابة سكاكين تقطع الركاب لذلك تم تعديل التصميمات بوسائل أمان منها
- تخفيف سمك الصاج
- وضع قضبان حماية بتصميم معين حتي لا ينكسر أبدا في منطقة وجود الراكب
- استخدام بعض المواد من البوليمرز كبديل للصاج كما في الرينو ميجان
- استخدام الإيرباجز

السيارات الصينية مازالت تعتمد الفكر القديم في الصاج السميك و هو ما لا يفيد إلا في الحوادث الخفيفة جدا التي لا تتخطي حكة صغيرة

لماذا ، لأن هذا هو التصميم الأرخص و النتيجة أن هذه النوعية من السيارات الصينية لا تدخل أوروبا أو أمريكا

المستقبل:

المستقبل للسيارات الصيني ، في خلال 5 سنوات ستبدأ السيارات الصيني في توقعي باكتساح سوق السيارات في معاقل المصنعين المشاهير في أوروبا و أمريكا
أما الآن و ما ينتج الآن فليس له مستقبل بعد ذلك لانها ستكون حتي بالنسبة لمصانع السيارات الصينية ماضي و انتهي

رد: أدعو كافة الاعضاء للقراءة بعقلانية و دون هجوم بدون مبرر

حبيت بس اوضح ان مفيش فعلاً عربيات صينى فى امريكا واقرب ما وصلت ليه العربيات الصينى هى المكسيك وكانت الشيرى A113 تحت اسم دودج

رد: أدعو كافة الاعضاء للقراءة بعقلانية و دون هجوم بدون مبرر