|
رد: أوبل فيكترا و دايو لانوس و نوبيرا
اقتباس:
بس الاستخارة الاول متنساش |
رد: أوبل فيكترا و دايو لانوس و نوبيرا
أنا هتكلم عن النوبيرا بحكم تجربتي معاها لمدة سنتين .... العربية دي فيها مميزات كتير وبعض العيوب برضو لأن مفيش عربية ف الدنيا خالية من العيوب - وأحب أقولك بعض المميزات اللى لقيتها فيها : 1- سحب ممتاز وتسارع جيد جداااا 2- ثبات راااائع ع الطريق وخصوصا على السرعات العالية ( مشيت بيها ع طريق الساحل بين 140 و 160 كيلو ومش حاسس بأي حاجة نهائياااااااااا) 3- صالون واسع جداااا ويستحمل أسرة 4- شنطة واسعة تشيل فيها كل اللى نفسك فيه 5- قطع غيار رخيصة وأسعارها معقولة جداااا والقطع الإستيراد بتاعتها مرطرطة فى كل حتة وهقولك ف نهاية المشاركة بعض أسعار قطع الغيار اللى أشترتها خلال السنتين 6- عربية تناسب كل الأزواق ... يعني تلاقي المستشار راكبها والشاب الجامعي راكبها وقابلة للتظبيط والدلع ( شكمان ديفل - فاميه - جنوط سبور - فوانيس عدسات وزينون - طقم صوت - كاربون فايبر) وتحس بعدها إنك راكب عربية سباق :) أما العيوب اللى شايفها من وجهة نظري الشخصية : 1- عفشة سيئة لو بتمشى بيها ف طرق مهببة ومنيلة ودايما هتحتاج تربيط وظبط وتغيير جلب مقصات وكبالن 2- صوت الموتور عالي جدااا داخل الكابينة 3- فرامل سيئة 4- إستهلاك بنزين عالي خصوصا إنها 1600 سي سي بعض أسعار قطع الغيار اللى فاكر أسعارها : موتور إستيراد كااااامل حالته ممتازة بالفتيس وكباس التكيف والتغذية = 3600 جنيه تيل فرامل أمامى = 45 جنيه طنابير خلفية بالماستر والتيل = 500 جنيه (يعني الطنبورة الواحدة بالماستر والتيل 250 جنيه) مقصات إستيراد = الواحد ب 150 جنيه طقم رشاشات بالمسطرة إستيراد = 175 جنيه كتاوت مراوح الرايديتير = 25 جنيه ذراع فرامل يد = 90 جنيه وطبعا ف النهاية النوبيرا تتفوق على الأوبل من حيث حداثة الموديل وتوافر قطع الغيار ورخصها وسهولة صيانتها تحياتي :) |
رد: أوبل فيكترا و دايو لانوس و نوبيرا
انا كنت فى حيرة حضرتك دى لما العربية الاكسيل اللى معايا بدأت تتعبنى وتفتح بقها قلت اغير وأجيب حاجة تانية
اول ما جه فى بالى فى رينج المبلغ المحدد انى اشترى اوبل فيكترا 95 بحالة حلوة ولقيتها بتعمل من 35 - 40 الف وشفت عربيتين منها , لكنى تراجعت مؤقتا عن تغيير العربية لسببين الأول : ان العربية اللى معايا عملتها وجوان وش السلندر ضرب وفتحت فى عمرة وبالمرة غيرت المساعدين قدام وورا فصرفت مبلغ محترم والعربية اتظبطت شوية وبقت احسن من الأول فقلت ااجل التغيير شوية السبب التانى ان الاوبل رغم اقتناعى التاااااام بيها الا انك تلاقى حاجة كويسة ونظيفه منها بسعر كويس صعب غير انها تقيلة فى البيع بعد كده والسبب الأهم ان ليها صنايعيه مخصوصين يعنى مش اى حد يعك فيها وانا معظم المشى بتاعى بره البلد على طرق سريعة فيمنفعش العربية تعطل وامشى ادور على واحد بيفهم فيها لكن الأكسيل اى حد يشتغل فيها (زى اللانوس) وقطع غيار رخيصه ومتوفرة سواء استيراد او جديد وربنا يوفقك |
رد: أوبل فيكترا و دايو لانوس و نوبيرا
اقتباس:
كلامك كله صحيح وفعلاً تجربة واحد عاش مع النوبيرا لكن انا مش معاك فى النقطتين دول لأن الفرامل لو هتصنفها بالدرجات مقارنة باللانسر مثلاً أديها 7 من 10 فبالعكس انا بيطلعلى مطب على غفلة عالطريق وانا ماشى 120 مثلاً وبفرمل بس مش كبس عشان العربية ماتتزحلقش وبيبقى معقول جداً جداً والحمد لله بس الفرامل عاوزة اهتمام دورى أكيد اما استهلاك البنزين فالجديد فعلاً بيستهلك أكتر من القديم يعنى القديمة كانت بتعمل 9 كيلو فى اللتر أما الجديدة فمش أكتر من 7 أو 8 فى أحسن الأحوال ولو قارنت باللانسر بارضو أو الصنى فهتلاقى المعدل واحد يعنى مش بتاكل بنزين ولا حاجة هى فى المعقول لا هى احسن ولا هى أقل |
رد: أوبل فيكترا و دايو لانوس و نوبيرا
اقتباس:
أى خدمة ياباشا المهم أنى أكون أفدتك ولو بالقليل وبالنسبة لقطع الغيار فللأسف مش هقدر أفيدك قوى لأن اكيد السوق اتغير من أيام الأوبل لأنى أفتكر جبت المراية قبل كده ب650 والفانوس الخلفى كان ب1200 وطبعاً انت عارف الأسعار دى فى التسعينات كانت عاملة ازى وأكيد دلوقتى من بعد الصينى الأسعار دى بقت اقل من النص وكمان انا بقالى فترة مع العربية النوبيرا دى وشغال فى التوكيل عشان الضمان والكلام ده ولسه ما أحتكتش قوى بالسوق لدلوقتى والله لكن آخر حاجة مغير علبة الشكمان خارج التوكيل لأنه كان هيركبهالى ب490 فجبت الأصلية من بره وركبتها ب260 !!! اقتباس:
شهادة ترفع من شأن مشاركتى والله :)) يعنى انا كده ماشى صح ؟؟ أكمل ؟؟ هههههههههههههه |
| الساعة الآن 01:08 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017