رد: دعوة عامة للجميع00 تجربتى مع سيارة
 

انا هكملكم رحلة كفاحى فى البحث عن الفتيس

انا عايش فى طرابلس بليبيا وهنا فى مكان كبير اسمة الرابش بابو سليم دة اللى فية العربيات المتقطعة و المتفككة واللى ممكن تشترى منها مستعمل يكون نظيف

وطبعا المكان دة برة البلد خالص فى الصحرا والمكان كبير جداااااااااااا

واليوم اللى كنت رايح فية ادور كان يوم فية عاصفة رملية والعاصفة دى على ما اذكر وصلت مصر كمان

وكان معايا واحد ميكانيكى بس اية صعيدى محكيلكش علية

شفنا حوالى 500 كمبيو (فتيس) وكل ما يشوف واحد يقول وحش

ونرجع نلف

ويشوف غيرة ويقول وحش

ونرجع نتنيل نلف

كلت كمية رمل يا جماعة فى اليوم دة ... ولا عينى خلاص مبقتش شايف حاجة

وهو يقول وحش ... وكلهم زى بعض .... انا مش شايف فرق

المهم فى الاخر قلتلة يمين عظيم طلاق بالتلاتة يا جمال يا ميكانيكى اذا مشترتش دلوقت وخلصتنا لاهسيبك هنا فى الصحرا وامشى انشالة عنها متصلحت

قالى بس اهدى بس شوية مش احسن ما نركب ونحل تانى ؟

طبعا هو عندة حق بس انا خلاص تعبت جدا من المشى والرمل والبنى ادمين اللى زى البهايم وكرهت كل العربيات اللى خلقها ربنا فى اليوم دة

واحنا فى طريقنا للعودة بعد رحلة فاشلة فشل زريع لاقينا محل معفن صغير كدة

فجمال الميكانيكى متقف نسال .... بصيتلة بصة فيها شر ..... قالى اخر محاولة

وقفنا ودخل هو سال وانا مستنية مع السكرتير بتاعنا اللى سايق العربية اللى احنا فيها وانا مش عايز انزل فى الرملة تانى

طلع جمال ومعاه اية ؟؟؟؟ مش معاه حاجة ..... كنت هضربة لانى ميت من التعب

جمال قاللى استنى بس الراجل هيطلع ادامنا وهيودينا المخزن بتاعة

دقيقتين وطلع شاب فى التلاتينات وساق عربيتة الدبل كابينة وطلع فى الصحرا

واذا بة يقف عند هنجر زى بتوع الجيش فى مصر

قلت حلو هتنتهى بجريمة قتل وسرقة اعضاء ( الراجل دة هيقطعنا حتت هنا ومحدش هيحس بينا )

فقلت للسكرتير اللى سايق العربية واللى هو ليبيى الجنسية انزل انت مع الميكانيكى ولو لقيت الجو امان اندهلى

قال حاضر ونزلة وبعد عشر دقايق من الانتظار الطويل طلع جمال وقال انزل انزل

ودخلت الهنجر واذا بى الاقى خيرات ربنا كلها

تقول هنجر على بابا مواتير جديدة بالصناديق وكمبيوهات جديدة بالصناديق وكمان مواتير وكمبيوهات مستعملة بس استعمال كورى يعنى مفكوكة فى كوريا ... وباعداد كبيرة يعنى مش واحد ولا اتنين

ونقى واختار يا عبد الستار

انا حسيت ان روحى رجعتلى تانى

وللحديث بقية مع رحلة التركيب ومغامراتى مع جمال الميكانيكى الصعيدى

رد: دعوة عامة للجميع00 تجربتى مع سيارة
 

شكرا بيرو
فى انتظار البقيه

رد: دعوة عامة للجميع00 تجربتى مع سيارة
 

و الله موضوع رائع بس انا حاليا معنديس افكار فى دماغى استنوا شويه استرجعهم و بعد كده هاقولكوا


انا بس حبيت اشكركم على الموضوع الرائع ده

رد: دعوة عامة للجميع00 تجربتى مع سيارة
 

رجعت تانى وهاحكيلكو على اللى حصل اثناء التركيب مع اسطى جمال الميكانيكى الصعيدى

انا طبعا مبدئيا كدة مبفهمش حاجة فى الميكانيكا ولا غاويها اصلا

لكن كنت حاسس ان جمال بيعمل حاجة ومحتاس فيها تحت العربية

لكن اية مش قادر احدد بالظبط وهو بيقولى اصبر يا باشا بس شوية هتبقى لوز ان شاء اللة اطلع بس هاتلنا بيبسى وتعالى

طلعت

انا اصلا واقف مش فاهم حاجة وكل اللى فى دماغى انة ينزل العربية واخدها وامشى اشوف مصالحى المتعطلة

المهم رحت جبت البيبسى وجيت لقيتة لسة متلخبط كدة

قلتلة يا جمال انت شكلك عمال تعك وشكلها فى مشكلة

العرق الصعيدى نفر من دماغة وحلف يمين طلاق بالتلاتة ماهو شغال فى العربية

الظاهر مصدق

المهم الورشة اتلمت وهو عمال يقولى انت بتلخبطنى وبتعدل عليا ومش عارف اية

قلتلة انت مصدقت اصلا انت شكلك مش عارف تعملها

هو سمع الكلمتين دول واتعفرت اكتر

المهم الناس هدونا خالص وقالولى اطلع استناه فى اى حتة لحد ما يخلص ويتصل بيك

مشيت وانا الضغط واصل 180 وقعدت على قهوة ساعتين تلاتة كدة واتصل بيا

قالى تعالى خد العربية .... قلتلة خلصتها ولا معرفتش

راح قعد يزعق فى التليفون .... المرة دى انا كنت قاصد افورلة دمة بجد

رحت الورشة وصاحبنا مش طايق يبص فى وشى ... بس انا بصراحة على المستوى الانسانى بحبة لانة كوميدى شوية فى طريقة كلامة وزعيقة وتحس انة بيمثل فيلم كوميدى

بقولة عايز كام ... قالى جرب الاول .... قلتلة اه صح لازم اجرب .... خدت العربية وطلعت وهو قالى انة حط زيت للكمبيو (الفتيس)

فعلا لقيت العربية اتقلب حالها خالص الفتيس مية فى ايدى والدبرياج خفيف جداااااا حتى عن الاول قبل ما تبوظ

فحسيت انى ظلمتة وانة كان بيظبط وانا مفكرة بيلعب ومش فاهم

فرجعتلة وبقولة حسابك كام قالى 100 دينار اديتة وقولت اصالحة

فقولتلة العربية مية مية انا كنت مفكرك ما بتفهمش حاجة وقاعد تلعب تحت العربية وبتعك اى كلام

العرق الصعيدى طلع تانى وقالى بمنتهى الغيظ

يالة يالة يا استاذ خد عربيتك واتكل على اللة قبل ما اعمل مصيبة

قلتلة بس انا ظلمتك صحيح وكنت مفكرك ما بتفهمش

هو يسمع ما بتفهمش دى يتعفرت حتى لو قايلها فى سياق جملة بصالحة بيها وبمدحة

ومشيت وانا عمال اضحك جدااااا والراجل يا عينى هيموت

بس بقى صاحبى بعد دة