|
رد: استشارة بخصوص موتوسيكل صينى
تحت امرك فى اى وقت واى حاجة انا اعرفها هقولك عليها ان شاء الله ولو طلعت قريب منى هظبطك مع ميكانيكي كويس ، اما بقي بالنسبة للحلاوة فهى حلوة لشاب كدا صغنون فردانى لانها صغيرة قوى وهتفكرك بافلام الكرتون والدايون الصغيرة برضو صغيرة لكن الحلاوة أوطى واصغر منها ، المهم خليك فى الدايون الكبير احسن وكلهم زي بعض ونفس العزم ونفس الموتور مع اختلاف الاشكال , بالنسبة للأمان وكدا فدى حاجات انت اللى بتركبها فيها وامانك الأول فى الموتوسيكل هو ربنا و مشيك العاقل لان لاقدر الله اى خبطة لاى موتوسيكل فى الدنيا حتى الريسات بيكون اسلم حل ليك انك تنط من عليه مش حديد بقي واكصدمات وبعدين ياسيدي فى موتوسيكلات بتبقي نازلة بحديد من قدام وليها مسند ضهر فى الدايو ممكن تشتريها انما البجاج ..... ياعيني ويادلع البجاج حاجة محترمة فعلا - وللاسف انا ماليش فى انواعهم وكدا - لكن ماركة بجاج قديمة ومن زمان ومحترمة جدا وهتريحك كتير بدل ما كل شهر ولا شهرين تروح للميكانيكي يظبطلك تاكيهات بقي و فلاتر واللذى منه , انت هتشترى البجاج وتحطله بنزين 92 و زين موبيل ديلفك ( الجركن الاسود ) وعيش يامعلم ملحوظة : انا كنت بحط للدايو بنزين 92 وزيت موبيل دلفك وكنت بغيره كل عيد تقريبا او كل مناسبه :joy23: اصل انا ما كونتش بحرق زيت كتير يعنى مش بحمل على غيار واحد ........المهم اى مكنة تشتريها ريحها بزيت كويس وبنزين كويس ، وان شاء الله ربنا يكتبلك اللى فيه الخير :fun_36_1_39[1]: |
رد: استشارة بخصوص موتوسيكل صينى
حقيقى مش عارف اشكر حضرتك ازاى على الاهتمام الجميل والنصائح الاجمل دى
ان شاء الله اخد بيها كلها وربنا يسترها علينا جميعا ويحفظنا |
رد: استشارة بخصوص موتوسيكل صينى
اولا... خد بالك الموتسيكلات ديت شر لابد منه ...ههههههههههههههه..
لو حضرتك عايز حاجه تقضي بيها مشاويرك وانا شايفك مقتنع بالصيني بس صدقني لما تتعلم وتبقي بتسوق بتمكن هتكره لان للاسف الصيني موتوره 1 بستم 150 سي سي ؟؟؟؟؟ والهندي البجاج نفس القصه واخره 220 سي سي ... الميزه الوحيده التوفير في البنزين ده غير انه مفيهوش لا فلتر بنزين ولا زيت ... انا معايا هوجان 5 والحمد لله معايا ايضا هوندا سي بي 4 ؟..فرق شاااااااااااااااااااااااا ااسع في السحب وديت اهم نقطه بالنسبه ليه انه يجمع بسرعه في الغيارات وده مش هتلاقيه في الصيني ... عموما الهوجان ولانه اول بايك ولخوفي من اليباني لاني لسه جايبه وخايف من اعطاله وقطع غياره وبالنسبالي الموتسيكل سواء صيني او يباني يعتبر ايدي ورجلي نظرااا لعملي ومشاويري.... نصيحه لو هتجيب صيني خليك في هوجان 5 لانه بمسند من ورا وليه دواسات محترمه للراكب الخلفي وبايك يعتبر الافضل في مساله العزم وديت صورتوا... http://a7lashare.com/viewimages/63272b3e87.jpg وبلاش موضوع انك تركب المدام وبنتك معاك علي الموتسيكل .... خطر جدااااااااااااااااااااااا اااا وحرام تقحمهم معاك في هذه الخطوره... والله انا باشوف حالات حوادث وللاسف احيانا بيبقي واخد زوجته و بتبقي كدمات ولسعه محترمه من الشكمان .... |
رد: استشارة بخصوص موتوسيكل صينى
الف شكر لحضرتك يا دكتور على الايضاح العظيم ده
بس الفكرة انى اصلا مش غاوى موتوسيكلات ولا الحاجات دى ولو عليا لوحدى والله اركب عجلة واقضى بيها مشاويرى" ماتضحكش عليا يا دكتور....ههههههه" والله بتكلم جد انا بعشق العجل جدا وخصوصا لو حاجه محترمة ومش خسارة فيها الفلوس لكن الغرض من الموتوسيكل عشان المدام وبنتى لان امبابة بقت حاجه لا تطاق بجد من الزحمة فى شوارعها بسبب التوك توك اللى بقى اكتر من الناس ده غير الطرق اللى بيرسموا عليها لوحات نحت وحفر غائر اكتر من اللازم والعطلة سواء راكب ملاكى او مواصلات وتحكم سائقى التوك توك كما لو كانوا راكبين الليموزين تخيل حضرتك ... ماينفعش توقف توك توك وتركب وبعدين تقوله ودينى الحته الفلانية .... لا لا لا ده انت تسأله الاول وهو ماشى وبصوت عالى .... كذا يا اسطى؟؟؟؟ وهوه ومزاجه لو هايركبك يركن لك بعدها ب50 متر ولا حاجه ولا هاينفض مش هايرد اصلا واحيانا يبقى معايا شنطة ولا حاجه والمدام والبنت ولولا العربية موجوده دلوقتى كنت بيتت عند امى ولا حماتى وماروحتش بيتى فا الغرض من احتياجى عشان المدام وبنتى وربنا يرحمنا من الزحمة |
رد: استشارة بخصوص موتوسيكل صينى
عندك حق فيما يخص التكتك...
للاسف عندنا برده مفكرين نفسهم بشاوات وبيختار المشوار علي حسب مزاجه .. يا راجل ده مره ركبت تكتك وكانت معايا والدتي والواد مشغل الكاسيت ومعليه وبقله اطفي البتاع ده تخيل يرد يقلي مش عاجبك انزل..؟؟ طبعا انا اتعصبت وقلتله عند بعند مش نازل غير في القسم ... بص الهوجان 5 جميل وقطع غياره ببلاش ومتوفره ... انا مش عارف ا. ابو رقيه بيقول انها مش متوفره ازاي..؟؟ عيب الصيني الهيكلي ان مفيش شاسيه حته واحده .؟؟؟ بمعني الشاسيه نازل ماسك الجدول ومربوط بمسمار في الشاسيه اللي شايل الموتور وده بيسبب زبزبات الصيني المشهوره ... فيه مكنه اسمها حلاوه وينج تقريبا موديل 2009 وهتلاقي محفور علي الموتور made in china ديت الوحيده اللي شفت فيها الشاسيه كامل مش حتتين مربوطين بمسمار وهو نفس شكل الهوجان 5 .... وربنا يوفقك ويحفظك انت والاسره الكريمه من شر الموتسيكلات ... |
رد: استشارة بخصوص موتوسيكل صينى
صباح الخير عليكم جميعا ازي حضرتك يا دكتور نوح .......والله شوف انا قلت بالنسبة للصيني كله تقريبا نفس الموتور وعزمه واحد ورشحت لأستاذ ايمن الدايون الصغيرة لان كل حاجاتها رخيصة وبسيطة ومتوفرة وعلى فكرة انت لو نزلت امبابة واتعاملت مع بتوع قطع الغيار هتلاقيهم بيجيبوا الحاجات اللى عليها سحب كتير ومش بتقعد فى المحل وكنت بشوف ناس معاها هوجان وناس معاها انتوس واللهى بيجوا عند بتوع قطع الغيار والراجل يقوله انزل الوكالة ( وكالة البلح ) وانا لمست فعلا توافر قطع غيار الدايون لما كنت بروح المعادى و المهندسين واى واحد بتاع قطع غيار موتوسيكلات كنت الاقي عنده طلبي وانا والله مش عارف ليه نفسي امبابة تتنضف ويسفلتوا الشوارع وبجد بجد اتمنى ربنا يسترها على كل اللى بيركبوا موتوسيكلات لان الواحد شاف الموت بعنيه بسبب الاهمال - كنت بقول مادام ماشي خلاص واجل لأخر الشهر كل حاجة - ولو تقدر يا استاذ ايمن تجيب 126 او سيات وتقريبا بنفس التمن بس هتبقي على الاق ماشي باربع عجلات :shyy: |
رد: استشارة بخصوص موتوسيكل صينى
:fun_36_3_11[1]::fun_36_3_11[1]::fun_36_3_11[1]::fun_36_3_11[1]:
|
| الساعة الآن 10:57 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017