رد: سيتروين AX كلوب
 

انا عايز عضويه البخور جاب نتيجه :coptic_Thutmosis1S:

رد: سيتروين AX كلوب
 

الف حمد الله على سلامتك يا باشا
ونورت الكلوب وان شاء الله يكون لك عضوية فخرية معتبرة بما انك اول واحد يعبر الموضوع ويرد وكمان يطلب عضوية
نورتنا يا باشا وربنا يجعها بداية خير علينا وعلى الكلوب
ابقى فكرنى بقى اديلك نسخة من المفاتيح عشان لو حصل ظروف وماقدرتش افتح تبقى تتعب نفسك شوية بقى وتفتح انت :017165~155:

رد: سيتروين AX كلوب
 

يللا بقى انا زهقت من قلة الاعضاء
ع العموم انا نويت والنيه لله اكتب معظم اللى انا فاكره واللى مريت بيه مع عربيتى
واللى عايز يشارك اهلا وسهلا واللى عايز يقرأ ويستفيد بدون مشاركة برضه اهلا وسهلا

موضوع النهارده .... الرادياتير
الرادياتير قاعد على على فتحتين فى صدر العربية من تحت (من الداخل) وهنلاقى فى الرادياتير نفسة من تحت زى فبرتين كده طوال بيقعدوا فى الفتحتين دول...
اول خرطوم من تحت جهة الشمال مبروط بقفيز اللى هوه دايرة كده لها مسمسار بيربط ويفك وممكن توشفوا الكلام ده بوضوح
الخرطوم الثانى من فوق جهة اليمين وطالع من الرادياتير من جنب البطارية وداخل فى الموتور وبرضه مربوط بقفيزين ناحية الرادياتير وناحية الموتور كده توصيلة الرادياتير بخرطومينه
من جهة الخرطوم اللى فوق فى اليمين نبص تحته نلاقى التيرموستات ومش هنشوف منه غير السنين(سن+سن) بتوع فيشة المروحة ومعظم اعطال او تلف الرادياتير بيكون فى العلبة اللى فى اليمين الى فيها التيرموستات دى وحصل معايا ان العلبة دى كانت مشروخة وملحمة(قبل ما اشترى العربية) والشرخ فتح كذا مره ولحمته لدرجة ان بقى معايا R&D اللاصق بصفة مستمره لان ممكن اللحام يفك فى اى وقت وقد كان وفك منى اكتر من مره وماكان اللى انى اركن على جنب (قبل ما الحرارة توصل 100 او 110 بأقصى تقدير) وابتدى اتعامل كالاتى:
طريقة فك الراياتير ... على قد ما اقدر ارتب الخطوات وطبعا التركيب عكس الفك
--------------------------------------------------
نفك الجزء المربع اللى فى كوعة فلتر الهواء (قطعة مربعة كده فيها فبره طالعة ناحية البطارية) نفك القطعة المربعة دى لتسهيل خروج المروحة فيما بعد
كده الخرطوم اللى فى اليمين باين بوضوح نفكة من الناحيتين كوعة الرادياتير ومدخل الموتور
وبعدين نفك غطاء الفرن (قطعة الومنيوم) مثبتة على الفرن(المواسير اللى طالعة من الموتور ورايحة للشكمان) والقطعة دى مربوطة بـ 3 مسامير تتفك بـ بيبة 10
نفصل فيشة المروحة من الرادياتير ونسلِّك (مهم جدا نتعامل بصبر) المروحة من مكانها ونطلعها بره ونخلى بالنا من سلك وكالون الكبوت لان المكان ضيق جدا
نفك الخرطوم اللى تحت من ناحية الشمال اللى قولناه فى الاول وبرضه نسلِّك الرادياتير بالراحة وبهدوء
كده الرادياتير طلع بدون اى خسائر او تلفيات ان شاء الله
ونشوف بقى ايه اللى محتاجين نعمله (نغيره - نلحمة - ننظفة - .... الخ)
وبعد ما نظبط نفسنا تمام نبتدى نرجع كل حاجه بالعكس

طبعا العربية بردت خالص نربط بقى الخراطيم ونوصل المروحة بس عشان نختبر ونشوف اى تسريب او اعطال فى المروحة(تشغيل وفصل)
نملا الرادياتير بالميه لغاية ما القربة تتملى خال ونفتح المسمار اللى فى الموتور (مسمر نحاس لونه اصفر وبيتفتح مفك عادة او بنسة ) يا دوب نلفة شوية صغيرين لغاية ما الميه تبتدى تطلع منه
فى الاساس المسمار ده عباره ان بلف او حنفية مجرد مانهوية شوية كده هنلاقى خرم فى النص بيطلع الهواء (مربط الفرس) لازم نسحب الهواء عشان المروحة تشتغل كويس وكمان عشان الدورة تبقى ميه بس بدون اى هواء
بعد ما نهوى البلف او المسمار ده نود ميه تانى طبعا كا ما نحط فى القربة الميه تخرج من البلف
هتلاحظ ان الميه بتخرج من البلف وهى فيها فقاقيع هواء (خروج الميه مش منتظم يعنى) وهوه ده اللى اسمة (اخد هواء) (او سحب هواء) ونزود تانى
نسمى بسم الله وندور .... طبعا اول ما الموتور يدور هايسحب كل الميه اللى فى الرادياتير... والقربة هاتقل .... نزود ميه تانى ( والبلف مازال مفتوح) ونفضل كده لغاية ما الهواء كله يخرج ....
نقفل البلف ونسيب الموتور يسخن ونراقب الحرارة ووقت تشغيل وفصل المروحة(على حسب التيرموستات) يعنى عندى تشتغل عند 82 وتفصل عند 68 ده تيرموستات واطى (المروحة تشتغل بدرى وتفصل بدرى) وان شاء الله الحرارة مش هاتزيد عن 82 بل ممكن قبل كده المرحة تشتغل وتبرد
ونستنى شوية والعربية دايرة نتأكد من عمل المروحة تمام والحرارة تمام
كله سليم ....؟؟؟؟
يبقى توكل على الله وهات جركن ميه خضراء (سعودى) ده النوع اللى بيشكروا فيه قوى
ونفضيه كله ( نفتح البلف ونزود شوية بشوية لغاية ما الميه الخضراء تخرج من البلف) او لغاية ما الجركن يخلص وتقفل البلف ونراقب برضه عمل المروحة والحرارة(تشغيل وفصل)
ونسيب العربية دايرة برضه للأطمئنان ونحط اى حاجه(كرتونه او ابلاكاشه) تحت الرادياتير لتأكد من عدم التسريب من اى حته ( المفروض مانلاقيش نقط ميه نازله بانتظام من مكان واحد)
لان ممكن جدا يكون تحت الراداياتير ميه من اثر الملو وتفريغ الهواء يعنى مانقلقش
وللتأكد اكتر ممكن ناخد لفة بالعربية لغاية ما تنشف تمام ونبص برضه ونتابع مستوى الميه فى القربه ومن المتوقع انك تحتاج تزود ميه حاجه بسيطة جدا من وقت للتانى من اثر تفريغ اى نسبة هواء هاتخرج مع دوران الموتور
لو كله تمام ان شاء الله ... ابتدى قرّط بقى على الرادياتير وثبته كويس وثبت المروحة فى الرادياتير (تلزق فيه)على قد ماتقدر والمفروض المروحة تتثبن بمشقبيتين (مشقبية+مشقبية) فى اليمين ومسمار فى الشمال ونتجنب ربط الرادياتير من بوز القربة ( الناحية اللى بنحط فيها الميه) لانها ممكن تتكسر مع القرص ويستحسن عمل فتحة فى قميص المروحة(الهيكل الخارجى للمروحة من فوق) ونحط كوليه (اللى هوه الشريط الابيض اللى بيقفل على بعضه ده) ونثبته فى صدر العربية
ثبتنا الرادياتير والمروحة ؟؟؟؟؟ نركب القطعة المربعة بتاعة وصله كوعة فلتر الهواء ونظبط سلوك المروحة ونبعد اى سلك عن المروحة (عشان - لا قدر الله - ما يدخلاى سلك فى المروحة ويسبب اى اضرار) وواخيرا بعد ما العربية تبرد خالص نحط القطعة الالومنيوم بتاعى غطاء الفرن اللى شيلناها فى الاول
واخيرا احذر ثم احذر ثم احذر لمس اى جزء سااااااااااااخن فى الحوض وخصوصا الفرن

ولو اى حد عنده مشكله او مش عارف يوصل لاى حاجه من اللى قولت عليهم يشرفنى بالسؤال وان شاء الله اجاوبه
وتقبلوا منى هذه المعلومات البسيطة

رد: سيتروين AX كلوب
 

السلام عليكم اولا ودى اول مرة ادخل المنتدى عشان كنت بدور على اى حاجة على ستروين لان معروضه عليه عربية ستروين ax 95 ب12000 من غير تكييف الفيتيس عند الاولانى بينط والاكصدام الامامى خارج شوية من الجنب وشايف شوية زيت على الماتور بس صاحبى قالى ده جوان التيكهات عاوز يتغير ودى حاجه بسيطة وفانوانيسها القدام مش مربطة كويس بس شغاله والعدادات مشغالة الباب الخلفى الشمال خارج بره شوية بس بيقفل والسنتر لوك شغال والزجاج الكهربا الامامى سليم الصالون متبهدل حاجه بسيطةبس مش وحش جربنا العربية على الطريق صاحبى الساق بيقول حلوه بتسحب حلو الكلام الاخير انا مبعرف اسوق فجبت صاحبى شاقهالى وساقها وقالى بالنسبه لسعرها جميله وعاوزه مصاريف بسيطة هتبقى كويسه سالت واحد قريبى وكان معاه ميكانيكى من غير ما يشوفها قالى دى عربيه مخيفه ومش اى حد يشتغل فيها وقطع غيارها غاليه ومش متوفرة بس هى بصراحة عاجبنى شكلها وسعرها احسن من الفيات بصراحة محتار ايه رايك يا اخ ايمن فى العربيه لانك الوحيد البيتكلم عليها على النت بحماس لو فيه مصدر تانى يقولى ظروف العربية حد يعرفنى بالله عليكم قبل ما اقابل الراجل الاسبوع القادم ولكم جزيل الشكر واسف على الاطالة

رد: سيتروين AX كلوب
 

اهلا بيك يا عم صلاح فى الكلوب المتواضع بتاعنا
شرفتنا وشرفت المنتدى كله
مبدئيا الستروين AX مش بديل للفيات ومابيركبهاش غير اللى عايزها وبيدور عليها ومستعد يتعب شوية ويصرف عليها اكتر من الفيات طبعا لكن فى المقابل العربية ax هاتيديلك امكانيات وكفاءة وكماليات اصليه (مش متعدل عليها يعنى) اكتر بكتير من الفيات و اى عربية مقارب من سعرها
على حسب وصفك انت كده هاتحتاج مبلغ عشان عربيتك تبقى فعلا امكانيات وكفاءة
الاول سعرها كويس جدا (لان سعر السوق للحاله المتوسطة مش بيقل عن 16 او 17) ومن الواضح كده ان حاله العربية اللى قدامك اقل من المتوسط يعنى هاتحتاج تصرف مش اقل من 4 او 5 الالف عشان تبقى شغاله تمام ده طبعا بالنسبة للاساسيات (ميكانيكا-عفشة-كهرباء) والكماليات بقى دى اختيارية (التكييف- الزجاج الكهرباء- السنتر- الابواب- .....الخ) وده له حساب تانى
ان شاء الله لو عندك رغبة تشترى وتظبط وتصرف وماتبيعش يبقى توكل على الله وبإذن الله هتلاقى عربيتك شايلاك ومريحاك طالما انت مهتم بيها
لو مش عندك استعداد لكل ده يبقى خليك فى حاجه سوقها ماشى وقطع غيارها رخيصة وسهله زى الفيات وطبعا الكلم ده بدون اى امكانيات او كماليات اساسية بخلاف فرق قوة الموتور من 1400 فى الستروين لـ 1100 فى الفيات
اعتقد كده وضحت لك الامور بشكل عام وحطيتلك الصورة فى الحالتين ما عليك الا التفكير الجيد والاستخارة والاختيار ومن هنا للاسبوع اللى جاى ان شاء الله توصل للقرار اللى شايفه فى مصلحتك وتحت امرك فى استفسار يخطر على بالك
اتمنى اكون افادتك

رد: سيتروين AX كلوب
 

شكرا اخى الكريم جزاك الله خير
:fun_36_3_11[1]:

رد: سيتروين AX كلوب
 

العضوية مجانية والكلوب مفتوح 24 ساعةHPPYBUS