مصر موتورز مجتمع السيارات - الحرارة فى الزحمة بتوصل تحت 100 هل دة طبيعى فى الاوبل فيكترا مو 95 ارجو الافادة

اقتباس:

المشاركة الأصلية كتبت بواسطة khaledvolly (المشاركة 496300)

انا عربيتى 131 والحرارة مش بتزيد عن 70 علشان المروحة على الكرنك وشغالة باستمرار هل انخفاض الحرارة مش كويس واية اضرارة ارجو الافادة وشكرا لكم جميعا

السلام عليكم..
بص يا أستاذ خالد أولاً الحرارة المنخفضة بتزود إستهلاك البنزين،دا غير أن زيت الموتور بيحتاج حرارة عالية نسبياً عشان ينتشر بكفائة داخل أجزاء المحرك وده أهمية تسخين العربية على السلانسيه قبل بدء التحرك، بالإضافة إلى إن الحرارة لما بتعلى داخل الموتور الشنابر بتتمدد وتفتح (طبعاً أجزاء من المللى مش حاجة كبيرة) عشان الكبس يكون داخل غرف الإحتراق متحكم كويس ومن هنا يشتغل الموتور بكامل كفائته اللى كان عاوزها المُصنع (وده بيتم عند حوالى 85:90) .
بالنسبة لموضوع البرودة ده مش بيتوقف على المروحة بس،هى أكيد عامل أساسى بس مش الوحيد، هى فعلا بتشتغل بدون توقف بس متنساش برضو أن مروحة الكرنك (طبعاً عشان أنت دفع خلفى) سرعتها مش ثابتة وبتتغير مع دوستك للبنزين أكيد حضرتك فاهم الموضوع ده.
بس الفكرة أن فى حجات تانية بتأثر جداً فى الحرارة زى نوع الريدياتيريعنى أكيد من غير ما أسألك الريدياتيرعندك النحاس أبو 3 حارات الكبير و كوعة المية من النوع العادى بدون ثرموستات،أنا بقولك الحجات دى عشان أنا عندى عربية 128 برضو وكان عندى موضوع الحرارة المنخفضة ده وهقولك أنا عملت إيه:
طبعاً كوعة المية مقربتلهاش سبتها عادية من غير ثرموستات زى ما هية خوفاً من أنها لو باظت ومخدتش بالك ممكن لا قدر الله تطير وش سلندر عشان وظيفة الكوعة اللى بثرموستات دى إنها تقفل عند الحرارات المنخفضة عشان تحبس المية جوا الموتور عشان يسخن وأول لما الحرارة تعلى تفتح عشان تجدد المية وتبرد الموتور وهكذا، بس فى عربياتنا دى ممكن نستغنى عن الميزة دى عشان إحنا فى بلاد حارة يعتبر(بس طبعاً أنا مغيرتهاش فى الأوبل عشان هذه نقرة وهذه نقرة وحضرتك لو عندك برضو عربية حديثة أوعى تغير كوعة الثرموستات فيها بواحدة عادية زى الفيات أنت بس خليك صاحى للحرارة وتتغير بصفة دورية قبل ما تبوظ)،
لكن أنا عوضت عنها فى ال128 بإنى لما جيت أغير الريدياتير رميت النحاس ده وجيبت الريدياتير الأسود (الحديد) الأصلى بتاعها استيراد وده بيكون أصغر من النحاس وحارتين فقط وده بيخليه ميبردش المية زيادة عن اللزوم، غير أن سرعة دوران المية بتعلى داخل الموتور عشان طرمبة المية أصبحت بتضخ المية فى حارتين فقط مش تلاتة وطبعاً أنت معندكش ثرموستات مروحة ودا هيريحك منها.
بس طبعاً أنا مقدرش أقولك غير ريدياتيرك وهو سليم يبأه حرام عليا يعنى، إلا إذا كان موضوع البرودة ده ملخبطلك مشى العربية، وبرضو أحب أقولك أن الكلام ده عملهولى ميكانيكى كان شغال فى أخوان مقار زمان لوتعرفها (توكيل صيانة نصر) يعنى فاهم جدأً وهو كمان اللى عملى عمرة ال128 .
وبرضو أرجع للميكانيكى بتاعك وأرجو أنه يكون كفائة.وآسف أنى طولت عليك بس أنا والله بحاول أقولك كل اللى عندى وأرجو أنى أكون ضيفتلك معلومة