مصر موتورز مجتمع السيارات - مية الراديتير بتقل بطريقة رهيبة جدا

مصر موتورز مجتمع السيارات (https://www.masrmotors.com/vb/index.php)

- ﻻنوس (دايو - شيفروليه) (https://www.masrmotors.com/vb/forumdisplay.php?f=153)

- - مية الراديتير بتقل بطريقة رهيبة جدا (https://www.masrmotors.com/vb/showthread.php?t=42834)

رد: مية الراديتير بتقل بطريقة رهيبة جدا

بالمناسبه

للأخ : صاحب الموضوع

لو فيه عندك شغل مطلوب قريب

زى تغيير سير كاتينه وطلمبة ميه وشداد كاتينه

أعمله بالمره لما تنوى على تغيير الوش الحالى

رد: مية الراديتير بتقل بطريقة رهيبة جدا

وراى حضرتك ايه ان بعد تصليح وش السلندر ظهر صوت مع تزويد الضغط على البنزين والميكانيكى قالى ان ده صوت لقمة السبيكة والموتور فوت بالرغم ان الصوت ده ماكنش موجود قبل الموضوع ده

رد: مية الراديتير بتقل بطريقة رهيبة جدا

اقتباس:

وبلاش منه

الميكانيكى العكاك إللى عملك الشغل اللى فات

دور على واحد تانى يكون سمعته طيبه

ولو غالى عنه شويه فى المصنعيه

مش مهم

المهم الصنعه ونظافة التقفيل والفكر الفنى الصح

واخد بالك من كلامى الأزرق ده

معناه أنى مش مقتنع أساسا

بقيام الميكانيكى ده بالأشراف على لحام وتبريد وش بعد اللحام

يعنى رأيه مشكوك فيه أساسا

جهة المكنه بوجه عام

الأمور دى مينفعش فيها ميكانيكى على أده

شوف غيره

وخليه يشغل مكنتك ويجربهالك ويختبر مناطق ظهور الأصوات

وهو حيجيبلك المفيد عننا كمان

لأن مفيش شك

كلامنا بدون وجود الحاله ( العربيه ) شىء

والطبيعه شىء آخر تماما

_________________

وأنت بنفسك من خلال تعاملك من الناس

تقدر تفرز الناس

وتعرف الميكانيكى ده

على أده ولا لا

من كلامه وتصرفاته ومع خبرتك فى معاملة الآخرين

المفروض تكون أكتشفت هذا

أى

ظروف الميكانيكى ده أيه

بيفهم ولا لا

رد: مية الراديتير بتقل بطريقة رهيبة جدا

معاك حق يا باشمهندس سمير ..
أنا عندى الموضوع ده حصل قبل العيد ، فالميكانيكى فك وش السلندر ، وقال لى ان كان فيه بارومة كتير ، وجاب أنبوبتين لحام عالمين زى أنبوبة الأمير كده وقد يلحم فيه وقت طويل ، وقال لى ان الحل ده لفترة من الوقت وبعدها هاحتاج وش سلندر استيراد ، يعنى مش دائم ، فسألته هيمشينى قد ايه ، قال لى انت ونصيبك ، يمشيك أسبوعين ، شهر ، سنة على حسب ..
فسؤالى ، أتابع ازاى الحالة علشان أعرف بدرى وأبدأ أجهز الوش الاستيراد؟

رد: مية الراديتير بتقل بطريقة رهيبة جدا

العمليه عند سعاتك أهون من إللى حصل مع الزميل

أنت لحمت وسويت بأنبوبتين على البارد

أما الزميل صاحب الموضوع

وقع مع عالم ( سورى مبتفهمش )

لحم الوش على الساخن بسلك ظهر أو الومنيوم ( حسب خامة الوش )

وراح الفالح ( اللحام طبعا )

معرض الوش فورا لعملية تبريد

وممكن يكون برده بطريقه غلط وطريقة لحام غلط

لأن الزهر بيحتاج شغل فنى دقيق أثناء اللحام نفسه

يعنى وارد جدا يكون الوش أتشرخ عنده

شروخ دقيقه جدا

وده السبب فى غليان ونقصان الماء بشده عنده

رد: مية الراديتير بتقل بطريقة رهيبة جدا

اقتباس:

فسؤالى ، أتابع ازاى الحالة علشان أعرف بدرى وأبدأ أجهز الوش الاستيراد؟

لو الحراره عندك تمام

ومنسوب الميه ثابت وتمام

يبقى اللحام نجح عندك

ولا داعى للقلق فعلا

وتابع دايما آداء دورة التبريد

حراره ومنسوب ميه فى القربه

وبراحتك بأه فى جعل وش أحتياطى عندك

وأشترى بأه

بطريقة الغناوه وليس المضطر

علشان تاخد سعر أرخص

رد: مية الراديتير بتقل بطريقة رهيبة جدا

شاكر جدا لكل من ساهم معى فى حل مشكلتى واخص بالذكر

م/سمير - جزاكم الله خيرا

بس حضرتك ( م/سمير ) عندى مؤشر الحراره بيروح وييجى ويزيد ويقل يعنى مش ثابت ولكن لا يتعدى النص ولا يصل اليه
هل ده يبقى فيه عيب برده
ثانيا لو الصوت اللى باقول لحضرتك عليه موجود فعلا براى ميكانيكى تانى
هل كده اشترى وش سلندر جديد برده ولا هى عاوزة عمره كاملة
ولو عاوزة عمرة ( اعمرها ولا اشترى مكنة جديدة استيراد احسن)
وعاوز اعرف سعر المكنة الجديدة الاستيراد كام
اسف اننى طولة على حضرتك