رد: ايه المشكله لماتكون السياره رشه دواخل
 

طبعا العربية اللى رشة دواخل مش مفضلة لاى حد ... خاصة لو كانت قديمة او جديدة و اتصلحت بره توكيلها .....بس بالنسبة للعربية الحديثة لما بتتعمل ف التوكيل بترجع و عن تجربة ......انا ليا واحد قريبى والده معاه اوكتافيا A5 كاملة موديل 2005 و معاه من الزيرو و لحد دلوقتى معملتش ال80الف كيلو لانها واقفة ف الجراج اغلب الوقت ...بس ف مرة اخدها قريبى من والده و راح بيها مشوار ناحية طريق مصر اسكندرية الصحراوى و للاسف و هو بيجرى ملحقش يلم نفسه و دخلها ف عمود نور و مبقتش بتدور و جالها عربية انقاذ من توكيل اسكودا و سحبها و اتظبطت و رجعت زى الاول بالظبط و مش ممكن تقول ان العربية دى خيشت بوشها
مع العلم ان الحادث مكنش رهيب كان شنب و مقص شمال و تظبيط لوحدات الفريون لانه هرب شحن و شبكة امامية و اكصدام امامى و زجاج امامى مشروخ بسيط ....كلفته 22 الف جنية .....بس فعلا العربية لسه زى الجديدة بالظبط بس اللى يركز اوى يلاقى ان اللوحة بتاعت الارقام الامامية كانت معووجة و اتعدلت و مدهونة .....بسسسسسسسسسسسسس .....
و اسف على الاطالة طبعا ...

رد: ايه المشكله لماتكون السياره رشه دواخل
 

انا بقول كده برضه وخصوصا ان التوكيل مش بيصلح ده بيرمى ويحط جديد لكن صنايعيتنا بيصلحو ادى اول حاجة تعيب الرشة دواخل و التوكيل بيبقى عنده اجهزة استعدال شاسية بالكومبيوتر جاية للسيارة نفسها مش لغيرها لكن غالبا بره بيبقى جايب الجهاز لاى عربية واى حاجة ومقاسات العربيات مختلفة وبتعتمد على خبرة الصنايعى لكن التوكيل مفيش عنده مجال للكلام ده
وانا شخصيا عربيتى نيسان صنى العربية بتتقفل فى مصر وطبيعى انهم هيعرفو يظبطوها
ولكــــــــــن
التوكيل هيدمر الميزانية يعنى العربية بره تتكلف 10 فى التوكيل 30
وده اللى بيدى انطباع الرشة دواخل ثم ان التوكيل عمره م هيرش دواخل هيجيبها زى ماهيا وخصوصا العربيات اللى بتتقفل فى مصر هيونداى اكسينت كحلى مثلا المصنع كده كده بيطلع هيرمى الجنب البايظ ويحط مكانه كحلى مش هترش دواخل ابدا
عوجة فى الشاسية هيطلع بالعربية على المصنع ويظبط الشاسية مع الجديد اللى بيتعمل
لكن بره التوكيل مفيش طبعا الاجهزة دى
حتى هنا اخواننا اللى اتكلمو اتكلمو عن موديلات قديمة واللى اتكلمو عن الحديث اتكلمو عن الصنايعية فقط وهى المشكلة الميزانية هيا اللى بتخلينانجرى على الصنايعيه
والعربية اللى اتكلفت 22 الف جنيه دى كان ممكن بره تتكلف 10 مثلا لكنها هتترمى وهو لو قال دى مرشتش دواخل محدش هيعرف ابدا

رد: ايه المشكله لماتكون السياره رشه دواخل
 

انا معايا عربيه كورولا 2004 ابويا نزلهالي من السعوديه ورخصها في مصر بس مشكله والدي لما بلاقي اي حاجه صغيرة في العربيه بيزبطها هو بيحب يحافظ علي الحاجة اوي المهم كان البابين الشمال فيهم خدوش بسيطه ابويا راح راشش البابين ورش الاكصدام الخلفي والسقف علشان السقف كان فيه نقرة صغيرة المهم ناس قالولي ربنا يعوض عليك ومعلش وكلام بصراحه خنقني

وكمان انا والدي كشف عليها قبل ماينزلها ولاقاها تمام وماشيه 50 الف بس
انا بقي مش عارف هل كدا العربيه ضاعت يعني ولا ايه..؟لان اصحابي خنقوني

رد: ايه المشكله لماتكون السياره رشه دواخل
 

ياعم سيبك من اصحابك نحن هنا بلد ال 80 مليون مفتى
وانا كنت هشترى بيجو 505 من 11 سنة ب20 الف عروسة مفيهاش الهوا وكمان مش هدفع قرش هياخد بيها بضاعة انا كسبان فيها
واستغربت وسالت ناس كتير
وكانت الردود كالأتى
واحد مصمص شايفه وعمل انه فاهم كل حاجة فى العالم وقال بقرف / دى موتورها على كبالن
ولما سالته يعنى ايه
طلع مش فاهم و فقال / على كبالن على كبالن (قالها مرتين )انت مبتفهمش ؟؟؟ وواضح ان هو اللى مكانش فاهم
التانى قال بنفس منطق القرف
دى موتورها على كبالن
يعنى ايه
على علب وكل متعمل شغل فى الموتور لازم تفك العلب دى
وفوجئت ان كل الحديث بعد كده على كبالن واشتريت النيسان وواحد قال لى ان عنده الكوبلن بتاع عربيته ضرب وكانت عربية حديثة منه واستغربت جدا وهو اللى قال لى معلومة ان كل الجديد على كبالن
ثانيا /المصريين فيهم عادة غريبة جدا
بيشترى عربية النهاردة وقاعد بيفكر فى موضوع اعادة بيعها هو انت لحقت تركبها علشان تفكر تبيع هو انت عارف بكرة هيحصل ايه ؟؟؟ ايه المخ ده
فاللى بيكلموك دول بيكلموك فى اعادة البيع وكده سعرها نزل لانها رشت بره والكلام الاهبل اللى انا مش بعترف بيه حتى ولو هو واقع
ايه يعنى رشت بره ده ينقص تمنها ليه اسأ ل اى حد السؤال ده هتسمع ردود عجيبة و99% منها عبيط
واذا بعت العربية فيها خدوش يقوللك ايه ده ياعم دى بايظة ولسه هتترش ده انت مبهدلها
اى كلام فى الهجايص
سيبك منهم وطالما العربية عاجباك خلاص استمتع بيها ووقت البيـع يفرجها ربنا ياراجل دى ال128 بتتباع لحد النهاردة اللى مصنعها فى ايطاليا بطل انتاجها من سنة 1972 وانت زعلان على كورولا ؟؟؟ عجيبة والله

رد: ايه المشكله لماتكون السياره رشه دواخل
 

ههههههههههههه
بجد والله كلامك مضبوط ميه في الميه
بس انت عارف محدش بيحب الخير لحد وبصراحه انا كنت طاير بيها وفرحان لحد ماسمعت كلام الناس
اهم شئ ان الواحد يكون سعيد باللي معاه
وشكرا بجد علي ردك ريحتني

رد: ايه المشكله لماتكون السياره رشه دواخل
 

فى مثل من اختراعى
هتدى ودنك لكل واحد هتكره نفسك ياعبد الواحد
هههههههههه

رد: ايه المشكله لماتكون السياره رشه دواخل
 

فعلا الكلام ده عن السيارات اللى رشه دواخل مظبوط
وسعرها بيبقى على قدها يعنى