رد: عربية تعبانة جدا تجتاج لكام بظبط
 

بص يا أستاذي مفيش عربية اتلعب في الصاج بتاعها بترجع زي ما كانت ، أهم حاجة في العربية الفبريقة، يعني الصاج ما يكونش اتلعب فيه، أما عربية واكلها الصدا، يبقى تبعد عنها، لكن لو خلاص اشتريت يبقى طبعا ممكن تتظبط، السمكري هيشيل الصاج المصدي ويحط صاج جديد - طبعا مش زي الأصلي بتاعها- ويلحم ويسنفر ويديها دوكو، بس العملية دي هتتكلف، يعني عندك سمكرة في حدود 2000 جنيه، مع إنك ما قلتلناش الصدا واصل لحد فين، والماتور استيراد قول مثلا معدي ال3000 جنيه، وقول أجرة الميكانيكي في حدود 250 جنيه، طقم جنوت متوسط الجودة 1000 جنيه، بطارية 250 جنيه، عفشة بالمصنعية حوالي 2000 جنيه -طبعا استيراد مش جديد- فتيس جديد بصراحة مش عارف بكام بالظبط، بس قول في حدود 500 جنيه، تبقى الحسبة: هتوصل تقريب ل 10000 جنيه، وده اقل حاجة، عشان العربية تقوم على رجلها ، مش تبقى زيرو، لأن اي عربية زي ما قلت لحضرتك في الأول اتلعب في أساسيات الصاج بتاعها عمرها ما هترجع زيرو، وتقبل مروري

رد: عربية تعبانة جدا تجتاج لكام بظبط
 

تحياتي ليك

طب بالنسبة لبعد ما اعمل كل ده العربية اقدر اعتمد عليها و تبقى فعلا عربية بجد و لا برده فيها حاجة هتتعبني بعد كل الصرف ده ؟

رد: عربية تعبانة جدا تجتاج لكام بظبط
 

بص بصراحة أنا عايزك تكون أوضح من كدة عشان نفيدك، لازم نعرف إنت اشتريت ولا لسة، واشتريت بكام، ولو ممكن ترجع في الشروة دي، وهي بالنسبة ليك لقطة يعني جايبها بسعر كويس بالنسبة لحالتها فبالتالي عندك استعداد تصرف. لازم نعرف كل ده عشان ما ندبسكش في عربية تصرف عليها على الفاضي.
وعموما يا سيدي أي عربية إنت مقتنع بيها ممكن تتظبط وكل حاجة وتقف على رجليها، بس إحنا بنتكلم في حجم الخسارة لما تيجي تبيع، أما لو إنت مش ناوي تبيع، ومقتنع بالعربية، وعندك استعداد تصرف وتخليها معاك، يبقى اصرف وإن شاء الله هتبقى كويسة وشكرا ليك وربنا يبارك ليك فيها.

رد: عربية تعبانة جدا تجتاج لكام بظبط
 

لا هوا فعلا لسه الشرا متمش

و بالنسبة للبيع انا مش عايزها للبيع انا هشتريها ليا و مش ناوي ابعها لما اظبطها

يا ريت تقولي اصرف عليها كام عشان ترجع عربية بجد

و هل بعد الصرف هلاقي اي مفاجاة ؟ او في اي مشكلة ؟؟؟؟؟؟؟؟

و هرجع العربية بكفاءة مع المصاريف دي بنسبة قد ايه


يا ريت تفاصيل اكتر

رد: عربية تعبانة جدا تجتاج لكام بظبط
 

بص يا سيدي حاول تفهمني، أي واحد هيكلمك بخصوص العربية دي مش هيهمه أي حاجة إلا الصاج، وربنا يكرمك ركز معايا، الصاج أهم شيء في العربية، يعني سيبك من الحاجات الباقية دي، دي كلها بالفلوس تتظبط، لكن الصاج ثم الصاج.
لازم يكون في سمكري شاف العربية ويقول حالة الصاج إيه، وأساسيات العربية عاملة إيه، الحوض، والشاسية، والقوايم والسقف، العربية مركبة نص قبل كدة أو حتى ربع ولا لأ، لازم كل ده يتعرف قبل الشرا ؛ لأنه بيأثر جدا في ثمن العربية، يعني ممكن ينزل الثمن للنص وأكثر، يعني ببساطة لو أنا نصحتك إنك تشتري عربية ملعوب في أساسياتها يبقى حرام علي، إلا لو إنت بق تاجر وفاهم بتعمل إيه، وعارف هتاخدها بكام وتظبطها إزاي، بس ده مستحيل لأنه لو تاجر ما كنتش هتحتاج لنصيحتنا.
فربنا يكرمك ، إنت لو اشتريت عربية ملعوب في أساسياتها تبقى كدة ادبست فيها، وهتفضل في أرابيزك، ولما تحب تبيعها هتخسر كثير جدا.
فالأول خلي سمكري ثقة يشوفها ويقولك العربية فيها إيه بالظبط، وبحالتها دي ينفع تشتريها ولا لأ، ولو اشتريتها يبقى بكام، وهتصرف على السمكرة والدوكو كام، أما باقي الحاجات فدي سهلة، الموتور يتغير، والعفشة تتغير ، كل ده سهل، لكن ما تدبسش نفسك في عربية دايبة.

رد: عربية تعبانة جدا تجتاج لكام بظبط
 

اللى فاهمه من كلامك انك عايز تبنى العربية على ايدك وتبقى عارفها كويس انا ليا واحد صاحبى اجل عجوز ولاففها وعنده قرايبه شغالين فى قطع الغيار استيراد بيظبطوه المهم دايما يقوللى انه بيشترى اى عربية يكون صاجها 100% وموضوع الرفارف والببان ساهل بس المهم اساس الصاج وبعد كده يسقك موتور ويغير عفشة كاملة فى يومين بالظبط

رد: عربية تعبانة جدا تجتاج لكام بظبط
 

لو شاسيه سليم لكن البودي عموما متهالك وفيه صدا سعره يبقى بكام ؟