رد: مقارنه غير عادله(كيا _ ديهاتسو )
 

ممممممممممم
الموضوع بقي محير اكتر يا آنسه يمني
طالما في امكانك تجيبي كسر زيرو يبقي البيكانتو او السيريون يجوا بنفس الطريقه
علشان ما تخسريش خساره الزيرو الاولي
انت عارفه انك مجرد ما تستلمي العربيه و ترخصيها و لو حبيتي تبيعيها تاني
اقل واجب بتخسري من 5000 الي 8000 جنيه !!!
عموما انا لو مكانك رغم اني مش غاوي السيريون اوي
حجيب السيريون برضه لانها ياباني و قويه و شكلها معقول
ويبقي ركبت فئه اكبر من فئه البيكانتو برضه
و لعلمك كل ما الفئه بتاع العربيه كبرت كل ما كانت اقوي و تستحمل اكتر

رد: مقارنه غير عادله(كيا _ ديهاتسو )
 

الحقيقه انا فعلا محتاجه حاجه قويه لاني برده بسافر المزرعه و كده و الطريق زي الفل مش عاوزه اقولك و بعدين هو انا صحصيح (singl ) بس برده العيله هاتركب معايا في اوقات السفر او المشاوير اللي مش هايبقي حد فاضي يعملها و يدبسوني فيها كده يعني

بس حضرتك بتنصح بكسر الزيرو ؟

رد: مقارنه غير عادله(كيا _ ديهاتسو )
 

بصراحه كسر الزيرو للي بيشتري كاش افضل بكتير و انا عن نفسي
لما بيبقي معايا سيوله و احب اشتري عربيه و معايا تمنها زيرو
اشوف لو لقيت كسر زيرو حاله كويسه اجيبها
بس صحيح طالما بتفكري في عربيه تستحمل طريق المزرعه
و طرق غير ممهده يبقي العربيات الصغيره مش حتستحمل المشقه
و التحميل و ما الي ذلك
ممكن في اواخر الستينات تجيبي عربيه ياريس
اهي عربيه الي حد ما صغيره برضه و عاليه و تستحمل الطرق دي
و مهما تحملي فيها مش حتحك منك و عفشتها حتستحمل معاكي و عن تجربه
انا معايا ياريس بقالها سنتين جايبها من الزيرو موديل 2008 و بسم الله ما شاء الله حلوه
و ابن خالي كان معاه واحده 2006 هاف اوبشن اتوماتيك و نضيفه اوي و باعها ب 68 الف من كام شهر

يبقي دلوقتي نستبعد البيكانتو نهااائي لانها عربيه مدنيه من الدرجه الاولي و مش حتستحمل سفر المزرعه كتير
السيريون اقوي منها بكتير بس شنتطها صغيره مش حتاخد شنط كتير
الياريس بصراحه افضل من دا كله و عن تجربه دا لو انتي مش بتجري اعلي من 140

رد: مقارنه غير عادله(كيا _ ديهاتسو )
 

بس هو غالبا هاتبقي السريون و هاشوف موضوع الياريس ده برده
بس كده السريون هاتحققلي المعدلتين يعني من ناحيه شكلها غريب و لذيذه في مدينه و برده تستحمل لان سفر المزرعه مش كتير
يعني الاساس في شرائي للعربيه استعمال في مدينه بس plus اني كمان ساعات بسافر المزرعه فا برده لو عرفت امسك العصايه من النص يبقي كويس و نصايحك بقي معايا

اما بالنسبه للجري اكتر من 140 فا مافيش تعليقي غير ههههههههههههههههههههههههه هههههههههههههه
انا ببقي سايقه و خايفه و العربيات معديه من جنبي (اصلك ماتعرفش طريق المزرعه بيبقي في وحوش معديه مش عربيات ).......انا اخري 100 لو ايه كده ماعديهاش و مش علي طريق الزرعه

رد: مقارنه غير عادله(كيا _ ديهاتسو )
 

انا عارف طرق المزارع عامله ازاي كان عندنا واحده و ياما كنت حقع في الترعه بالعربيه في الشتا
بسبب الارض المزحلقه و ميلان العربيه يمين و شمال :HAPPY_~211:
لدرجه اني و انا راجع علي الطريق كنت بقف اخد اي حد معايا و استحمل ان العربيه تتملي طين من جوه
علشان ضهر العربيه يثبت و ما تتزحلق كتير
ياااااااااااااااه فكرتيني بايام حلوه و الله:)

يبقي لو مش بتسافري كتير يبقي شوفي السيريون و بكده تبقي مسكتي العصايه من النص فعلا

رد: مقارنه غير عادله(كيا _ ديهاتسو )
 

اها انا بقول كده برده
بس علي فكره المزرعه اللي بروحها مختلفه شويه مافيش طين الحمد لله خالص لأنها قريبه من الطريق الصحراوي و تقريبا مافيش ناس و لا زحمه ماتشفش غير اخضر في اخضر و بعدين هي عشان كانت اراضي صحراويه فا رمل مش طين و مش عاوزه اقولك بتشرب ميه الشتا ازاي هي بس الطريق الاسفلتي عشان بيعدي عليه عربيات ضخمه جدا فا تحس انه مش معدول غير المطبات اللي غالبا بتكون الناس هي اللي عملاها فابتكون سيئه جدا و الطريق فردي فا لازم تبقي مركز حبتين لانك لو حبيت تعدي من اللي قدامك ممكن تلبس في المقابل و الطريق ضيق 0تخيل بقي اني اتعلمت علي الطريق ده يعني انا ممكن دلوقتي اسوق ترلا علي طول ptmnlo123per160

رد: مقارنه غير عادله(كيا _ ديهاتسو )
 

من ناحيه المحرك السيريون الافضل طبعا اما الانتشار طبعا للبيكانتو و طبعا قطع غيار البيكانتو ارخص من السيريون بس السيريون ياباني و احسن بكتير من البيكانتو
لو موضوع الصيانه هتتعاملي فيه و اسعار قطع الغيار مش مهمه بالنسبه ليكي توكلي علي الله في السيريون و كمان السيريون هتريحك في السفر اكتر من البيكانتو

موضوع الماتيرا
العربيه دي شبه عربيات توزيع الزبادي و الله و مش مبالغه و ده راي الناس كلهم و كمان قطع غيارها مش موجوده و غااااااااااااااااااااليه نااااااااااااااااار فبلاش منها
ارجو ان اكون قد افدتك و لا تنسي صلاه الاستخاره