|
رد: العربية ديه اكيد بتطير رينو لوجان
اقتباس:
حضرتك أنا مغير رفرف أمامي شمال إستعمال الخارج ب 500 ج يوم تاني (في الحرفيين) لقيت الباب كامل من مجاميعه ب 1000 ج ، سبب ما سألت عليه كنت أخدت صديق لي معاه ميجان 2007 علشان يركب شباك الباب الأمامي يمين بدل المكسور ، تمن الشباك 125 ج فانوس خلفي إن شاء الله حغيره قريب (ميجان 2008) تمنه 450 ج (لسه ما فاصلتش معاه) . صاحب المحل : محاسب / عصام بشطر موبايله 0121116053 |
رد: العربية ديه اكيد بتطير رينو لوجان
يب يا جماعه ما تبوصو علس سعر البيجو مبينزلش بسرعه ليه ؟؟؟
مش كل الفرنساوي بينزل بالسرعه دي دي ال 504 ال من موديل 1970 لسه بتتباع ب 30 و 35 و في حالات والله ب 40 و ال 405 لما نزلت سنه 1990 كان سعرها 125 الف دلوقتي ول فكرت ابعها هبعها ب 38 و ممكن تجيب 40 او اكتر لو السوق شدد حيله شويه الف يعني خساره 83 في 19 سنه دي كويسه اووووي |
رد: العربية ديه اكيد بتطير رينو لوجان
أنا قريت عنوان الموضوع شدني قووي
الصراحة كنت بفكر نعمل موضوع تقرير و نقد لاعلانات السيارات في مصر خلال شهر رمضان كان هيبقي موضوع جامد بس معندييش الفيديوهات بس لقيت المضمون مفهوش جديد شتيمة جديدة في السيارات الفرنسية المهم يعني هوا ليه اعلانات العربيات في مصر مبتدييش نبذه عن امكانيات العربية و شكلها و مواصفاتها ليه كلها من عينة أي أفيو أي أفيو ،، و لا أنا اللي هاخد الأوبترا يا مني فيه اعلانات بتتعمل بتصوير و زوايا و لقطات تخلي ك تحب العربية أساسا حتي لو هيا عربية عادية |
رد: العربية ديه اكيد بتطير رينو لوجان
اقتباس:
وبالتأكيد المحتوى الاعلانى منتقد ضمنياً ومستنكر بشده لانه قد ايه تافه وضعيف فى الفكرة والاخراج الفنى حتى المؤثرات الرسومية ضعيفة جداً بس حتى ولو كانت حلوه صدقنى مكانتش هتفرق كتير البراند نفسة محتاج اعادة تقديم وتسعير |
رد: العربية ديه اكيد بتطير رينو لوجان
موضوع رائع بيفكرنا دايما بتفكيرك و ووجهه نظرك يا ابو نورا شكرا ليك:)
الفرنساوي فعلا مالوش تمن في مصر و في دول الخليج كمان و لا اعتقد ان كل الناس دي مش بتفهم!!!! اقتباس:
بس لو حضرتك جيت تفكر حتلاقي المصريين بيجيبوا الحاجه اللي بتريحهم و توفر ليهم الكورولا معشوقه الجماهير في مصر و اللي ليها اسم زي الدهب لما نزلت في 93 الكل اشتراها لكن لما نزلت العيون في 98 محدش حبها لانها وحشه و لما نزلت في 2008 و ظهرت مشكله الفتيس برضه مافيش حد اشتراها لو كانوا المصريين عاملين زي القطيع بناء علي كلام حضرتك كان زمان كلهم اشتروا العربيه نظرا للاسم. لكن المستهلك المصري الي حد ما واعي و عارف هو بيحط فلوسه فين لان شراء عربيه مش حاجه بتحصل كل يوم او كل سنه او كل 5 سنين حتي .بل هيا سلعه معمره بالنسبه للمصريين. زي الموبايل النوكيا تقدر تقولي ليه الناس كلها بتستعمله او بتفضله؟ لان السوفت وير بتاعه سهل في التعامل و جهاز معمر .ودا ان دل علي شئ بيدل علي ذكاء الشركه المصنعه للمنتج اقتباس:
و برضه اي شركه فرنساوي لما بتنزل موديل جديد بترفع سعره عن الموديل القديم بمراحل (يا تري ال 206 كانت بكام زيرو و لما ال 207 نزلت نزلت بكام؟؟؟!!!) اقتباس:
العربيتين اللي كانوا ثابتين نفسهم في السوق من السبعينات و اوائل التمانينات كانت البيجو 504 و الفيات 132 ال 2000 و الاتنيبن كانوا بحدود ال 10 الاف جنيه و في اواسط التسعينات بقي البديل البيجو ال 405 و الاوبل فيكترا و كانوا بحدود ال 100 الف جنيه عربيتين و برضه من نفس الفئه بتاع ال 504 و ال 132 لكن التمن زاد عشره اضعاف تعالي بص انهارده للعربيتين اللي الكل بيتمناهم هما الجيتا و الاوكتافيا و دول في حدود ال 200 الف يعني زياده الضعف في عشر سنوات برضه !!!! اللي اقصده ان اي عربيه جديده تمنها بيزيد عن الموديل السلف لها و لو بصيت للفرق بين الفيرنا و النيو اكسنت حتلاقي الفرق بينهم مش كبير لو استوردت السارتين من الخارج او جمعت السياراتين في مصر.. اقتباس:
لكن لو بصيت ان الاكسيل علي سبيل المثال كانت بتباع كامله في اواسط التسعينات بدايه ظهور الكوري في مصر بمبلغ 52 الف جنيه(فاكر الرقم دا كويس) يبقي مكنتش رخيصه اطلاقا خصوصا ان قيمه الجنيه سنه 95 كانت اعلي بكتير من قيمه الجنيه انهارده |
رد: العربية ديه اكيد بتطير رينو لوجان
يا حضرات
فى مذهبين فى الحياة الأول...يا تصنع علشان تبيع بأكبر قدر ممكن و تخلى هامش الربح ضئيل و هو ما يعوضه كثافة البيع الثانى...تعبر عن فكرك فى منتج..و تطرحه للبيع....و أكيد هتلاقى زبونك...أى نعم بصعوبة...و احتمال كبير للفشل..لكن لذة النجاح بهذه الطريقة لا يضاهيها أى مال ممكن جمعه من الطريقة الأخرى...لإنها تحمل إسمك و فكرك... مش فى حديث نبوى معناه أن المرأة تنكح لعدة أسباب ( جمالها و حسبها و مالها ) فاظفر بذات الدين.... برضه العربيات بتتشرى لجمالها الخارجى أو لسعر إعادة بيعها أو لصيتها و شهرتها أو ما تمثله من Statement يعنى على سبيل المثال مكانة اجتماعية أو ثقافية ..و ممكن برضه تتشرى لأسباب تتعلق بتوائم فكر المصنع مع شريحة من أذواق بعض المستهلكين مش الطبيعى إن العربيات الفرنساوى تكون شائعة...هى بتقدم ميزات خارج حدود ما تقدمه السيارات الأخرى... مهما فعلت الشركات الأخرى لن تستطيع مجاراة التميز الذى تقدمه رينو و سيتروين على وجه التحديد بمعايير المكسب المالى و الخسارة فى سعر إعادة البيع لا ينكر أحدا فشل السيارات الفرنسية فى هذا المضمار...و الكلام ده مش بس فى مصر..ده حتى داخل أوروبا.... لكن أنا لو كتبت مواضيع أشرح و أوضح فيها سر حب مالكى السيارات الفرنسية لسياراتهم و ما تقدمه تلك السيارات...لن تكفى صفحات المنتدى و فى المقابل لن يقتنع الغير مقتعين بفلسفة الفرنسيين بتلك المزاعم التى تتحدث عن مقاييس الجمال و الاهتمام بأدق التفاصيل و ذكاء التصميم و عوامل الراحة و الأمان و ما إلى ذلك..... لابد أن ننظر للسيارات الفرنسية على أنها الخيار الغير شائع و الذى يتناسب مع أصحاب الأفكار و الأذواق الغير شائعة ( لا أقصد أفضل...بل مختلف )...و هى من خضائص البشر أن يكونوا مختلفين و هذا الاهتلاف هو ما جعل للحياة نكهة...تصوروا لو كل البشر كانوا على هيئة و احدة و لهم نفس الطعام.... لن يكن هناك مطعما صينيا و لا آخر مكسيكيا....كله كان هيبقى فول و بس :-)....... أتمنى إنى أكون وصلت وجهة نظرى |
رد: العربية ديه اكيد بتطير رينو لوجان
موضوع جميل بس عايز الاول اركز على جزئيه بسيطه اوي لكن مهمه
بعض الناس اللي بيشترو عربيه زيرو فكرهم و مفهومهم مختلف عن اللي بيشترو مستعمل .. حتى لو كان كسر زيرو او استعمال سنتين ممكن دول يبصو للشكل او التميز او الجديد او التجهيزات العاليه و النادره .. او لمجرد ان العربيه عجبتهم .. وغالبا العربيات المميزه بتكون اكتر عربيات سعرها بيقل اما الغالبيه اللي بيشتري زيرو او مستعمل ( وخصوصا المستعمل ) غالبا بيفكرو في سعر قطع الغيار و الانتشار و سهوله الصيانه وبالتالي بيدورو غالبا على عربيه منتشره او على الاقل حاجتها موجوده وبالتالي فالعربيات المنتشره اللي نسبه مبيعاتها بالسوق عاليه و متوافره قطع غيارها و سهله صيانتها ..... الخ .. هي اللي بتبقى ماسكه سعرها نسبيا عن بقيه العربيات وكل ما التكنولوجيا و التقنيه اللي في العربيه تبقى عاليه كل ما سعرها يقل اكتر !!! وابسط مثال البي ام دبليو سعرها بينزل جامد مع اننا في مصر بنبص لها على انها ايقونه او اعجاز بشري جنب المرسيدس لكن المرسيدس بتمسك سعرها عن البي ام دبليو برغم انها برضو متقدمه تقنيا لكن مفيهاش تعقيد تقنيه البي ام الموضوع مش فرنسي و لا الماني و لا كوري و لا هندي حتى لأن حنلاقي عربيات من كل الجنسيات بي ام دبليو - رينو - الفا روميو - فيات ارجنتا ( كانت نازله بتمن المرسيدس 200 ) - فولفو - في حين نلاقي عربيه بقالها اكتر من 12 سنه مطلوبه و بياعه ... زي الانوس وتلاقي عربيه 128 موجوده من 40 سنه ولسه الناس بتشتريها !! وليها تمن ** ببساطه ... عرض و طلب والعربيه بالنسبه لمعظمنا استثمار .. بيشتريها النهارده و هو بيفكر حيبيعها بكام كمان 5 سنين او حتى 10 !!! قليل اوي ( بعض الناس ) اللي بيشترو عربيه ومش فارق معاهم سعر اعاده البيع ... خصوصا المستعمل اغلب الناس بتشتري العربيات السيدان وتسيب الهاتشباك حتى لو مش محتاج الشنطه لسببين 1- يمكن يحتاج الشنطه في يوم من الايام ( طالما فرق السعر مش كبير ) 2 - علشان السيدان مطلوبه اكتر و بيعها اسهل ( الهاتشباك دي عربيه شباب تبقى متهانه و حالتها مش مضمونه !! ) كل عربيه بتاخد فرصتها .. و اللي بتثبت نفسها بيستمر عليها الطلب وتمسك سعرها ...اما العربيه اللي مبتقدرش تثبت نفسها في السوق ....ينزل سعرها لأن الطلب بيقل عليها الماتريكس كان سعرها في الاول منافس جدا .. وحققت انشار كبير جدا .. لما سعرها زاد و دخل في شريحه فيها عربيات منافسه .. مبيعاتها قلت جدا .. و تداركو الموضوع متأخر فسعر العربيه في الشريحه التنافسيه مهم جدا وده كان سبب انتشار الماتريكس و البوما والالنترا و السيراتو حاليا وكانت الناس تسيب النيو اكسنت و تجيب الياريس برغم تجهيزات الاكسنت لكنهم كانو بنفس السعر .. طبيعي ان الناس تفضل علامه تويوتا لما الياريس سعرها زاد و الاكسنت سعرها قل ... انتشرت ** اهم نقطه .... السمعه كل شركه بتبني سمعه ليها على مدار السنين ... وبناء على السمعه دي الناس بتشتري منها مش شرط السمعه يعني شركه وحشه او عربياتها تعبانه.. لكن سمعه في سهوله البيع و الشرا .. يقولك عربيه بياعه و عربيه تقيله انا ممكن بكره الصبح انزل ابدل عربيتي بحته الفاروميو ملهاش حل وحبقى مبسوط جدا جدا .. بس اسبوع ... شهر ... سنه .... وحلاقي نفسي بشيل اوبح .. و الاسباب معروفه ** نظريه القطيع احنا فعلا عندنا في مصر نظريه القطيع ... لكنه قطيع بري ... بيدور دايما على مصلحته ... مش بيمشي كده وخلاص ... لأ ... له حساباته اللي بتحركه .. اما اللي بيشرد عن القطيع ... فذنبه على جنبه ptmnlo123per1116 |
| الساعة الآن 09:12 PM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017