رد: محتارة وبيقولولي كدة عمرك ماهتركبي عربية
 

انا راى ان الجديد جديد وابعدى عن المستعمل
حاولى تدورى على عربيه هاتشباك محندقه على ادك
تعرفى تركنيها بسهولة خصوصا ان دى مشكله هاتقابلك فى بداية السواقة
وربنا يوفقك فى الاختيار:thnkr:

رد: محتارة وبيقولولي كدة عمرك ماهتركبي عربية
 

حضرتك عندك حق تماماً كان معايا و احد في الشغل عنده أوبل فيكترا أواخر التسعينات و باعها لأن فيه بوردة كمبيوتر بازت راح سأل عليها قاللولوه بمبلغ كبير آلافات يعني راح لاحمها كده أو عمل حاجة فيها (لصمها) و راح بايع العربية بعد كده علطول.
فالنصيحة اللي يشتري عربية حديثة لازم يكشف عليها عند وكيلها مهما دفع عشان ما يندمش حيث لا ينفع الندم أما عربياتنا القديمة الغلبانة فدي مكشوفة ما فيهاش حاجات مستخبية عن الصنايعي العادي و تحياتي للجميع .

رد: محتارة وبيقولولي كدة عمرك ماهتركبي عربية
 

شكرا ليكوا كلكوا بجد انا مقتنعة بكل رد ودة لسان حالي

ورحت شفت الكيا امبارح وشكلها حلو وامكانيتها زي ال ار بي تقريبا

بس ينقصها التجربة
وطلعلي واحد كدة من ضمن اللي بيتفرجوا

يقلي طيب ماتزودي 7 الاف وهاتي ار بي ع الاقل الاكسنت معروفة ومتجربة

يجماعة انا خلاص بجد مش عارفة اعمل اية

اللي شفتها امبارح
ريو 2013
خليجي جميع الكماليات بس ماعدا فتحة السقف والجنوط 16
ومافيهاش مسند للسائق وكام حاجة كدة لاتذكر
ودي ب 111الف ونص
والضمان ب 2200
ال ار بي اول فئة في الاوتوماتيك ب 114الف الجنوط عادية والطارة كمان

اعمل اية

انا بجد محتارة

رد: محتارة وبيقولولي كدة عمرك ماهتركبي عربية
 

بصى الاحسن تجيبى عربية مستعملة رخيصة اوتوماتيك فى الاول زى الكيا برايد موديل 2000 او 2001 حتكلفك حوالى 33000 ولما تحبى تبعيها مش حتخسرى فيها مليم وملهاش اى اعطال او عيوب تذكر نهائى ( ودة عن تجربة 3 سنين ) وسواقتها مريحة جدا واسعار قطع الغيار بملاليم ومتوفرة جدا وبما انك لسة محتارة تجيبى اية جديد ممكن فى الفترة الى حتستخدمى فيها البرايد تختارى براحتك وشوفى يمكن كمان تلاقى عربية مستعملة بسعر لقطة ووقتها تبعيى الكيا فى ساعتها ومش حتخسرى حاجة

رد: محتارة وبيقولولي كدة عمرك ماهتركبي عربية
 

ربنا معاكي ويهديكي للأختيار الصالح

رد: محتارة وبيقولولي كدة عمرك ماهتركبي عربية
 

بجد انا بشكركم كلكم

يجماعة

وفي ناس كتير هنا قالتلي ورشحتلي المستعمل لاني جديدة في السواقة

فعشان مبقاش ندمانة وابقي عملت اللي عليا

هروح السوق

وبعدها ياما
قررت اي من المستعمل بعد الاطمئنان للورق وما الي ذلك من حالة العربية

يا اما

هرجع مرجوعي للزيرو

ريو خليجي كاملة ماعدا فتحة السقف
او
rbاول فئة في الاوتوماتيك

رد: محتارة وبيقولولي كدة عمرك ماهتركبي عربية
 

نصيحة لوجه الله وفكرى فيها كويس كويس
ابعدى عن القسط تماما

قبل الكلام
انا كان معايا حوالى 50 الف ايام ما كانت اللوجان ب 68
دفعتهم مقدم ولحسن حظنا كانت اخر السنة المالية بتاعتهم وكانت لسة اللوجان معالهاش الحجز الكبير دا اوى وكدة دفعنا الفلوس المقدد ومضينا وصلات بالباقى على دفعات ما تزدش عن 4 شهور
ومخدوش فوائد ولا حاجة .............. بس حاولى تتصرفى فى الفلوس الباقية ( جميعة بقى او استلفى شوية ) هتزنقى شوية اه بس هتستريحى كتير اوى اوى اوى
والحمدلله جبنا العربية :CHUBBY~36: من غير قسط
نيجى بقى لنوع العربية والتى هتناسب احتياجك مع مصاريفك وفلوسك ....

ألكلام النهائي فى
رينو لوجان
اوربي ( فرنسي - رومانى ) تقفيل المغرب
اهم المميزات
اهم واحدة >> عالية عن الارض بطريقة فظيعه مش هتحك مع اى مطب حتى لو محمل 6 فيها والشنطة مالينة على الاخر
مصفحة من تحت كمان عند حوض الماتور ودا مش موجود فى فئتها
من ضمن العربيات القليلة اللى تحت الـ 100 الف نازلة بكاوتشات 15
العربية الوحيدة اللى شفتها لحد دلوقتى المرايات بتعتها دينميكية مش بتكسر بتروح مع الخبطة وترجع تانى
عفشة نعمه مالهاش زى
انعم دبرياج هتشوفه فى حياتك
كمبيوتر رحلات ( معرفة استهلاك البنزين ومدة الرحلة وكم البنزين المتبقى .......الخ ) ومش موجود فى عربيات لحد الـ 120 الف
اير باج
مستوى امان 3 نجوم
اوسع شنطة 510 لتر
امان تام على السرعات العالية ودا بتجربة بنفسي على الـ 180 وبغرز وكنا 6 فى العربية والموضوع بالتوقيع
موفرة فى البنزين بسبب ان الماتور 8 صباب ( يفضل بنزين 92)
اوسع صالون فى فئتها واوسع تانك بنزين اكتر من (60 لتر بالاحتياطى )
صاج اللوجان صاج قوى والاقوى برضوا فى فئتها
طبعا فى اوبشنز تانية يختلف على حسب اذا كنت هتجيب هاف او فول اوبشنز
ألصيانة الدورية مع التوكيل كل 5000 كيلو مرة مجانا ومرة بفلوس ودا هيخليك ما تفتحتش كبوت العربية حتى 100 الف كيلو *


العيوب ( ومش هنسميهاعيوب ) هنسيمها حركات غلسة بس هتتعود عليها

الكلاكس فى درع الاشارة
زارير الازاز فى التابلوة
ازاز الشباك اللى وراؤ بيفتح لحد التلت ودا علشان الامان للاطفال علشان هى سيارة عائلية
تنك البنزين والشنطة بمفتاح
ترجيع الكراسي بتقعد تلف البكرة
صوت الماتور عالى سنة
الباور تقيل شوية ودا لثبات العربية على السرعات العالية
رعشة بسيطة ببعض الموديلات فى دواسة البنزين اول لما تستلم السيارة وبتختفى لوحدها بعد تليين السيارة اول 5000 كيلو
مسالة قطع الغيار
* قطع الغيار بدات فى الانتشار الفانوس الامامى ب 200 جنية والخلفى ب 150
وجوز المقصات ب 400 جنية وبكدة مسالة تفاضل الانوس بسبب قطع الغيار اصبح مالهاش لزمة

ثمن الفول اوبشنز 71 الف جنية
وتمنها برة تمنها الاصلى 7500 يورو
يعنى انت دافع تمن بالضبط + شوية مصاريف ( تقدر تقول خدمة الشحن ) لان مالهاش جمارك

ودا المصدر
http://www.loganclub.ro/
نوع العربية

Preference 1.6 MPI 90 CP


وبس يا سيدى وان شاء الله ربنا يوفقك فى اختيار العربية المناسبة لك


-----------------

العربية انتاج شركة داتشيا - رومانيا ( الام ) تم التعديل الشكل الجديد بواسطة شركة رينو الفرنسية



تقرير مفصل عن العربية بالشرح والصور
http://masrmotors.com/vb/showthread.php?t=67787

بتنزل على 5 ماركات فى كل انحاء العالم
فى اسيا وافريقيا والشرق الاوسط Renault Logan وروسيا
فى رومانيا والبرزيل وامريكا الجنوبية Dacia Logan
فى الهند Mahindra Renault Logan
فى اليابان Nissan Aprio
Tondar 90 فى مناطق بدول العالم

دى فيدوهات ليا بالعربية
Logan 180 km/h with 6 Passenger [1] - YouTube

180 و 6 راكب
وغرز بيها على الطريق الصحرواى - مصر اسكندرية

ودا لما عديت الـ 180
Logan 180 km/h with 6 Passenger [2] - YouTube

واتفضلى اسال فى اى وقت
ودا قسم اللوجان بالمنتدى
http://masrmotors.com/vb/forumdisplay.php?f=160