مصر موتورز مجتمع السيارات - ما هى عيوب الباسات موديل 2000-2002

هو الموضوع قديم اساسا, بس انا هرد على شوية نقط غلط عشان البيدور بعد كده ميغلطش.

أولا هتكلم عن الموديل, من 98 الى 2000 شكل و بيسموها B5, و من 2001 الى 2005 شكل تانى و بيسموها باسات المعدل B5.5, الفرق اساسا فى التصميم الخارجى و بسيط اوى فى الداخلى, من بره هتحس الاكصدام الأمامى و الخلفى منفوخين شوية و الفانوس الأمامى من الاشارة عبارة عن كتلة واحدة مش منفصلين زى الشكل القديم, و من ورا الفانوس الخلفى هتلاقيه متزين أو متقطع بجزر أبيض أو شفاف من النص, و بالنسبة للداخل ملاحظتش اختلاف غير فى المسند الفى النص عريض زى الجيتا و الباسات الجديدة مش رفيع زى الفى الجولف 4 و البورا والأوكتافيا 4 و من بعد 2001 فى موديلات فى شاشة المعلومات و كمبيوتر الرحلات الفى نص العدادات و بيكون لونها أحمر.

طيب نيجى بأه للمواتير, انا ماشفتش فى مصر منها مواتير 6 أو 8 سلندر (طبعا فى بره بس أنا بتكلم عن مصر), الشكل القديم تقريبا كل النزل منو هو ال 1600 ال8 صباب و 102 حصان زى الفى البورا و الأوكتافيا a4 و الأودى a3 & a4 و السيات توليدو, و الماتور ده مش قايم بالعربية أوى و العربية ثقيلة عليه خصوصوا لو أوتو بس ده ميمنعش ان العربية هتجيب معاك سرعات عالية و بثبات ممتاز.

الشكل المعدل نزل منه 1600 و نزل من 2000 سى سى و ده ماتور 8 صباب و 114 حصان و مقوم العربية كويس.

يتبقى مواتير 1800, و دول نادر اوى ان تلقيهم ستوك أو فابريقة فى مصر من أى من العربيات الذكرناها و غاليا بيكونو متسقطين (و ده عادى فى الفولكس اهم حاجة انك تكشف كويس و تعرف المكن ده متسقط عند مين) ,و مواصفات ال 1800 كلهم 20 صباب الأول بيطلع 123 حصان, الثانى بيكون تربو و بيطلع 148 حصان و الثالث و هو اقواهم و أحدثهم و بيكون فى موديلات بعد 2002 و ده بيطلع 177 حصان, بس فى ماتور من ال2 التربو اسمع ان قطع غياره قليلة شويتين مش متواجدة, و انا عموما لسه بسأل على توافر قطع غيارهم جديد و مستعمل الأيام ديه.