رد: تدوير العربية لو المارش او البطارية عطلانة،
 

متشكر هو عمل كدة برضوا بس لان الحركة سريعة مش عرفت عمل ايه الأول. ممكن حضرتك نحطها على خطوات. يعنى أولا الفتيس بيكون منور ولا لا وهما بيزق والمفتاح بتاع الكوناكت بيكون أزاى لما الناس تزق يأخد الأول والثانى بالفتيس. أنا أعرف ان الدوس على الدبرياج بخلى العربية تتقل فى الأرض.. ويبقى صعب تتزق.. معلش مش عندى خبرة وهتعبكم معايا

رد: تدوير العربية لو المارش او البطارية عطلانة،
 

باضبط زي ما استاذ ياسر قالك كده
لكن نعملهم في خطوات على الترتيب
الأول تركز كويس ويكون معاك مساحة كافية علشان الزق ومتكونش طالع مطلع والا الناس مش هيزقوك هما هيشتموك ويدعو عليك بس اما لو فيه فرصة انك تكون نازل منزل زي لو عطلت منك على كوبري او لو انت على مرتفع برضة تعملها سهلة من غير اي مساعدة من حد لكن تاخد حذرك كويس وتتحكم في العربية كويس
معلش صدعت لكن علشان متعملش حاجة انت مش عارف رد فعلها ايه
الخطوات بقى
1. الناس بتديلك زقة كويسة لم اتوصل لعزم مناسب كأن العربية بدأت تتحرك على الأول وتحس انك عاوز تاخد التاني
2. دوس دبرياج للأخر
3. عشق الفتيس على التاني
4 لما العزم بتاع الزق يوصل للي انت عاوزة ارفع رجلك من على الدبرياج بسرعة ودوس بنزين لكن خد بالك لحسن تروح ماشي مع نفسك ويكون مفيش مساحة قدامك تخبط في حاجة
5. لو فيه حاجة قدامك او المسافة مش مساعدة انك تمشي بيها بتروح دايس دبرياج مرة تانية بسرعة وتمسك فرامل وتسيب العربية دايرة شوية لما تشحن ولو السلانسية عندك بيفصل يبقى من الافضل انك تفضل دايس بنزين كويس علشان البطارية تشحن ومش تفصل تاني

6. حمد الله على السلامة قطعت نفس الناس اللي بتزق
ربنا يستر طريق ومتتعرضش لموقف وحش ابدا في الطريق

رد: تدوير العربية لو المارش او البطارية عطلانة،
 

ونفس الخطوات دي ممكت تتعمل مع الخلفي لكن بتكوناصعب علشان التحكم في العربية لو انت في طريق مفتوح وفاضي ممكن تعملها خصوصا او انت على مطلع لكن لو مش تقدر تتحكم في العربية يبقى بلاش احسن

رد: تدوير العربية لو المارش او البطارية عطلانة،
 

متشكر أنتم فعلا كلكم رائعون ربنا يبارك ويزيد المنتدى بأعضاؤه الخبراء

رد: تدوير العربية لو المارش او البطارية عطلانة،
 

هل حكاية الزق دى مش بتأثر على أى حاجة فى العربية؟؟؟ يعنى مش مضرة