مصر موتورز مجتمع السيارات

اقتباس:

المشاركة الأصلية كتبت بواسطة Nissan (المشاركة 12286)

سعيد جدا بحبك للعربية
و شكرا جدا على مجهودك و صورك الرائعة
بس فى كلمة وحدة بس شايعة عن ال 132 ( بتاكل بنزين اوى)
إية تعليقك ؟

الف شكر ليك يا نيسان باشا
بص هو انا حقولك حاجه في موضول البنزين دا
العربيه 2 كامه و موتور 2000 سي سي لما بتبقي مضبوطه اوي بتعمل 200 كم في الصفيحه علي الطريق و حوالي 170 جوه و بره البلد
يعني استهلاك معقول مش وحش

اقتباس:

المشاركة الأصلية كتبت بواسطة فادى (المشاركة 12306)

موضوع رائع يا أستاذ حازم و بجد وصف دقيق و معبر عن احدى السيارات التاريخية,
العربية دى انا للأسف معرفش عنها كتير و مسقتهاش خالص لكن شكلها بيعجبنى جدا, لحد النهاردة فان تصميمها الهادىء الرصين الممزوج ببعض الخطوط الناعمة يعتبر من اجمل التصميمات فى رأيى.
ده الى جانب فخامتها المعروفة, و أما تصميم لوحة القيادة فلن تجد فى مثل فخامته الأن بعدما طغى البلاستيك على كل شى:( !!
و طبيعى انها تاكل بنزين, عربية 2000 سى سى و دفع خلفى طبيعى جدا انها تاكل بنزين, خاصة ان الناس هنا كانت متعودة على ال127 و ال128 و ال1100, دى الضريبة الطبيعية للأداء و الفخامة.
و عقبال يا استاذ حازم ما نشوفك كده راكب النيو كروما حفيدة ال132

شكرا ليك يا فادي باشا
و لو عاوز تعرف اي حاجه عن ال 132 يا ريت تسالني و انا حجاوبك
انا حافظها بالمسمار

اقتباس:

المشاركة الأصلية كتبت بواسطة abdelmessih67 (المشاركة 14388)

الاخ الفاضل حازم

فعلا هي مرسيدس الفيات و أنا معايا 125 بولندي ورثتها عن والدي و لكن أتمنى شراء 132 و لكن 1600 سي سي و ليس 2000 بسبب البنزين و التراخيص لان السيارت من 2000 سي فما فوق سيكون لها سعر أعلى بالترخيص .

المشكلة ان العربية قديمة رغم روعتها و صعب تجد سيارة مثلها أول يد بحالة جيدة , لو تعرف قوللي

شكرا مرورك اخي الفاضل:)
ال 125 البولندي عربيه حلوه و كان عندي منها بس ال 132 افضل فعلا
هيا فعلا قليل لما تلاقي منها واحده كويسه حاليا
و ممكن تجيب ال 1600 شكل ال2000 اللي بيسموها 2000 كداب و دي من موديلات 77 ال 81

اقتباس:

المشاركة الأصلية كتبت بواسطة AboNoRa (المشاركة 14693)

طيب ايه امكانية تجديدها يعنى مثلا ال 128 ممكن كل حتة فيها تتجاب من الاول او اى حاجة فيها تترمم وترجع زى الاول بس ده لو قطع غيارها منتشره !!؟

ال 132 يا وائل باشا من العربيات اللي بتقبل التجديد مش زي ال 128
لا دا زي ال 504 كمان
ياتري فاهم قصدي
يعني غسيل و مكواه تفكها و تصرف عليها كوي سو تركبها ترجع زيرو تاني
بس محتاجه مصاريف لان قطع غيارها بقت غاليه شويه
سنه 1994 كنت جايب طقم ابواب ب 1200 جنيه
بس كان زيرو الصراحه و الموتور بالفتيس موديل 84 ارجنتا ب 1000 جنيه
دلوقتي بقي شوف الاسعار ايه!!!