|
رد: سؤال لملاك الميجان، ليه بتبيعوها برخص التراب
أحكي ايه وللا أيه بس يا رجاله دا غللي حصل وبيحصل معيا ومع غيري مايتحكيش
اولا العربية بتاكل بطاريه يعني كل تقريبا 25 ألف كيلو عاوزلك بطارية بـ 1150 جنيه (سعرها في التوكيل كده) ثانيا ماتقدرش تعمل أي حاجه مهما كانت بسيطه برة التوكيل بمعنى أنك لو غيرت مثلا البطارية هاتلاقي وظائف كهربائية كثير ه توقفت عن العمل تماما زي الشبابيك والكاسيت مثلا ولازم تروح التوكيل وتاخدلك دور عشان تبرمج الزجاج والكاسيت تاني ولو غيرت تيل الفرامل بره هاتلاقي الـABS توقف عن العمل ولن يعمل إلا بعد ان تذهب إلى التوكيل (وهناك المجزرة شغاله مابترحمش) وسيبكم بقى من ده كله العربية أدائها سيء جدا جدا جدا وماتخدش منها اداء ممتاز إلى على الطرق المفتوحة فقط يعني في وسط المدينة العربية مخنوقة ولو شغلت التكييف يبقى أنت كده قتلت الموتور خالص وقتلت نفسك معاه لان التكييف نفسه مش هايديك هوا بارد إلا لما العربية تجري في طريق مفتوح دا غير إن كل شوية الكومبيوتر يوقف حاجه عن العمل ومايرضاش يديها إشارة عشان تشتغل (لانه متبرمج على كده ) يعني بعد عدد من الكيلو مترات معينه (هو متبرمج عليها) مايبعتش إشارة للبوبينات إللي فوق البوجيهات مثلا العربيه تشتغل 3 بدلا من 4 وتبقى متضر تروح التوكيل وتغير البوبينه ومعاها طقم البوجيهات ده غير أنك لو فوت ميعاد الصيانات إللي مطلوب فيها تغيير بعض الأشياء هاتلاقي العربيه مابتشتغلش معاك بطريقة مظبوطه وهاتلاقي الكومبيوتر عمال يطلعلعك لسانه قصدي راسايله كل شوية أشي رسالة تقولك Chek Box وإشي رساله تقولك Servece ورسالة تقولك معرفش أيه لحد ما تلاقي نفسك مدمن التوكيل ويحصل بينك وبين الناس هناك عِشرة ولا عشرة الجيران والأقارب ده غير أن العربيه ادائها العام لا يتناسب أطلاقا مع شكلها الجميل وسعرها العالي عرفتوا ليه بقى بتتباع بأقل من نص تمنها ؟ وعلى فكرة مافيش حد هاتلاقيه يقولكم الكلام ده وأستنوني أقولكم على كذا حوار دار بيني وبين اكتر من حد قابلته هناك وهاتعرفوا بنفسكوم أننا شعب مايحبش يقول على نفسه غلطان ابدا |
رد: سؤال لملاك الميجان، ليه بتبيعوها برخص التراب
ربنا يكرمك يا بايو على صراحتك و يسهلك بيعها، انا سألت كتيييير قبل كدة نفس السؤال ومأخدتش اى اجابات مقنعة، انت اول واحد اسمعه بيقول الخبايا اللى محدش يعرفها الا ملاك السيارة
|
رد: سؤال لملاك الميجان، ليه بتبيعوها برخص التراب
خلينا بس نتفق الاول على شئ مهم " لولا اختلاف الازواق لبارت السلع " . فى ناس كتير معندهاش ادنى مشكله انها تعمل صيانات دوريه فى التوكيل " انشاله كل 5 الاف كيلو " وتدفع مبلغ محترم جدا فى سبيل احساسه انه قاعد فى عربيه فيها تكنولوجيا حديثه وعوامل امان كتيره .
بالنسبه للاداء فالعربيه وزنها تقيل و مش متوقع منها اداء سلس.... وناس كتير متعايشه مع الموضوع ده و مش فارق معاهم . انا قريت موضوع عن واحد كان معاه ميجان وعمل حادثه جامده جدا و الميجان بتاعته اتدمرت بس هو و الناس الى معاه الحمد لله محصلهمش حاجه خالص ..... و كان بيتكلم ان العربيه " الميجان " طبعا بعد ربنا انقذته من الموت و قرر انه يشترى ميجان تانى !!!!!!!!!!!!!!! انا مش متخيل يعنى واحد عمل حادثه اكيد اتشائم من العربيه .... لا ده اشترى واحده تانيه إيه. فعلاشان كده انا مقتنع جدا ان الى انا شايفه وحش ممكن غير يكون شايفه حلو ...... بس طبعا المهم لازم اعرف اذا كان العربيه ديه حقدر اتعايش معاها ولا لا ... واخونا العزيز بايو وضح نقط المهمه تهم اى حد بيفكر يشترى ميجان ....انه لازم يكون مستوعب انه حيروح التوكيل للصيانات الدوريه و لتغير اقل شى . وده ممكن يكون متناسب مع ناس .... وكارثه بالنسبه لناس :F_14WA~16[1]: |
رد: سؤال لملاك الميجان، ليه بتبيعوها برخص التراب
أنا متفق مع وجهة نظر أخونا بايووووووو و أ/محب سعيد
أنا شخصيا كنت على وشك شراء الميجان من سنتين و كنت ولا أزال منبهر بها جدا .... و ساعة الشراء وقتها من المعرض عرفت إن المتاح حاليا هو التصنيع التركى فقط و إنه أقل فى الجودة من الفرنسى ..... لكن بايووووو وضح نقط مهمة جدا جدا .... و هى موضوع الصيانة الإجبارية بالتوكيل لأتفه الأسباب.... و دى طبعا شئ متعب طبقا لثقافتنا فى مصر ... العربية لازم تكون حديد و تشيل الزلط و ما تشتكيش و دة هدف كثيرين جدا من المصريين عند الشراء و أنا منهم .... و موضوع الصيانة دة بيشكل لى أكبر صداع ولو بالوضع اللى وصفه بايوووو يبقى أنا كدة كسبان.... ولكن هناك أيضا كثيرين لا تفرق معاهم مثل هذه الأمور و أكيد يهمهم الصيانة الدورية ... حتى مع غلاسة التوكيل .... و مستعدين لدفع تكاليف عالية للتمتع بإحساس جميل هو دافع فيه فلوس ... ودة حقه.... الشئ اللى مش طبيعى هو إن الأداء يكون مخنوق أو أقل من المتوقع من سيارة تمثل التكنولوجيا الفرنسية ... دى معلومة جديدة و هامة لمن يفكر فى الشراء ..... بس أكيد ... الميجان ميجان .... و معجبينها كتير ..... و أنا منهم ....... |
رد: سؤال لملاك الميجان، ليه بتبيعوها برخص التراب
لولا نيسان مكانش بقى فيه رينو ومش هقول اكتر من كده علشان اصحاب الرينو مزعلوش منى هاخنقك
|
| الساعة الآن 06:04 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017