رد: بخلص فى اوبل فيكترا كنت عاوز ارائكم
 

نص كلامك الاول شجعنى اوى على الشراء النص التانى قلقنى اوى وخصوصا ان خبرتى فى العربيات مش اوى على العموم انا هاخد معايا واحد بيفهم فى العربيات ولو نزلت مصر هحاول اكشف عليها فى مغسلة وانا كان معايا صور ليها من برة بس كلام حضرتك فهمت منه انى اهتم اكتر بالماتور والعفشة والتكييف وكلها تقريبا حاجات داخلية

رد: بخلص فى اوبل فيكترا كنت عاوز ارائكم
 

بص يا باشا..انا اقصد اقولك يعنى ان ممكن عربية تانية بالسعر دا كوري ولا يابانى لوفيها حاجة فى الموتور او العفشة او التكييف ممكن الليلة كلها تتلم ببساطة شديدة ...اما فى الالمانى عموما و الاوبل خصوصا بيكون مكلف فى الصيانة و مش اى حد بيصلحها..بل بالعكس الميكانيكية بيلعبوا فيها بيهلكوها ..فلذلك اكشف على الموتور و العفشة و التكييف لو بحالة جيدة توكل على الله و انا من ملاك الفيكترا بصراحة عربية متميزة فى ادائها جدا و هتعشقها اوى بس لو بالحالة النضيفة ..يعنى دور كويس اوى على الحالة النضيفة فى الفيكترا ..و على فكرة موديل 99 و مو 98 واحد فى كل حاجة مفيش فرق ..الحالة اهم حاجة..وربنا يوفقك

رد: بخلص فى اوبل فيكترا كنت عاوز ارائكم
 

الفيكترا اللى بتتكلم عليها اسمها فيكترا B لان نزل قبلها فيكترا A ونزل بعدها فيكترا C
امتى بقى نزلت العربية دى فى مصر
فى سنة 1996 واشتركت فى الموديل دة مع الفيكترا A
ونزل منها نوعين من سنة 1996 الى سنة 1999
نوع 1600 سي سي ونوع 2000 سي سي
الـ 1600 نزلت مانيوال فقط
اما الـ 2000 نزل منها اوتوماتك
لكن الـ 1600 و الـ 2000 كانو بنفس الموتور (الموتور الاسود ) واختلفو بس فى السعة اللترية
الموتور دة قول زى ما تقول فية من تحمل وقوة وجرى وهرى (غسيل ومكوة ) لكن عيبة انة ملوش قطع غيار جديدة ومفيش منة استيراد نهائي لانة منزلش فى دول اوربا واعتقد نزل فى البرازيل فقط
واحنا اتفقنا ان شكل العربية واحد انما العفشة ممكن تكون مختلفة شوية ما بين الـ 1600 و الـ 2000

من سنة 2000 الى سنة 2003 منصور افندى عمل اية بقى
غير شكل العربية من برة لكن تغيير بسيط جدا وسماها فيكترا B2
غير فى شكل الاكصدام الامامى والخلفى
غير شكل الفوجات
عمل عتب فى العربية
ونزل العربية بـ 3 فئات
الفئة الاولى 1600 مانيوال وهى هى نفس الفيكترا B حتى الموتور
الفئة التانية 1600 اوتو ودى الناس بتحبها اوى بس انا لا
ونزل فيها الموتور اللى بينزل فى الاسترا البرازيلى 1600 اوتو بس الموتور دة انا مبحبوش خالص
الفئة الثالثة 2000 اوتو ودى بقى احسن حاجة فيهم ( من وجهه نظرى ) موتور 130 حصان وكلام حلو اوى بقى وعربية فعلا تستاهل وزنها دهب لكن الموتور دة حساس اوى وبيحتاج صيانة دورية باستمرار وعلى فكرة الموتور دة متاخد منة للدايو ليجانزا وعدلو فية شوية ومشو دايو نوبيرا


عموما بقى سعر الاوبل متفاوت جدااااااا
انما الفئة اللى حضرتك بتتكلم فيها اللى هى فيكترا B 1600 مانيوال سعرها للحالة الكويسة اوائل الخمسينات
وتعالى نتفق ان زمن المثالية راح ومحدش بيبيع عربيتة او بيطلب فيها اقل من تمنها المتعارف علية الا لو كانت فيها مشاكل
وحتى لو فيها مشاكل الناس بتطلب السعر المتداول
طب لية بقى العربية دى اقل من سعر السوق
هاسيب الاجابة لحضرتك
ومش عاوزك تتغر فى شكل العربية لان الاوبل بالزات القالب بتاعة مهما كانت حالة العربية وحشة بيفضل ماسك نفسة وتحس انها واقفة وشدة حلها
اتانى وثق تماما ان محدش اهبل النهردة او انكة يبيع عربية وعشان خطرك انت هاينزل من تمنها
بالتوفيق .....اسف على الاطالة

رد: بخلص فى اوبل فيكترا كنت عاوز ارائكم
 

اية الكلام الكبير دة يا استاذ محمد
الي صاحب الموضوع لو انت من القاهرة ابعتك لناس متخصصة في الاوبل
بلاش ميكانيكي عادي يكشف عليها

رد: بخلص فى اوبل فيكترا كنت عاوز ارائكم
 

الكلام دة ربع اللى اتعلمتة منك
:01F577~130: