رد: ساعدوني علشان خلاص والله زهقت
 

متشكرة جدا يا جماعة علي الاهتمام وسرعة الرد
انا برضوا كنت مع ان الماروتي حتبقي احسن علشان اجدد
بس من الواضح ان 127 سوقها احسن لو لقيت حاجة نضيفة مش كدة؟

بالمناسبة في قدامي 127 مو86 بس صاحبتها بتقول نتكلم في السعر بعد ما تشوفوها هي الرينج بتاعها اية مع فرض انها نضيفة؟

وحاجة كمان استحملوني في ناس بتبقي مجددة العربية بالكامل ده حلو ولا وحش؟

وجزاكم الله خيرا علي مساعدتكم

رد: ساعدوني علشان خلاص والله زهقت
 

ال127 فعلا افضل من الماروتي بس لو لقيتي منها حاله كويسه
انا لما رشحت الماروتي لان موديلتها اعلي و مش حتحتاج تروح كتير عند الميكانيكي زي ال 127.
لكن لو 127 حالتها كويسه توكلي علي الله.
العربيه اللي بتقولي عليها في حدود 15 الف لو حالتها كويسه جدا
و لازم تاخدي حد معاكي فاهم و انت بتشتريها ما تروحيش لوحدك .
بالنسبه للعربيه المجدده فاكيد دي حاجه كويسه و دي معناها ان مش
بيبقي فيها بارومه و البويه بتاعتها كويسه .
لكن اهم حاجه تكون دواخل العربيه سليمه متكونش رشت قبل كده
بمعني حوض الموتور و الشنطه و القوايم يكونوا بدهانها الاصلي محدش لعب فيهم
و دي واحد فاهم او ميكانيكي يقولك عليها مش حتعرفيها وانت لسه مبتدأه في العربيات.

رد: ساعدوني علشان خلاص والله زهقت
 

ميرسي جدا يا أ/ حازم علي النصيحة و المتابعة
واكيد هاعمل بيها و انا ان شاء الله هاشوف العربية يوم الاحد و اقولكوا علي الاخبار

الميكانيكي هو اللي جايب العربية دي و بيقولي صاحبتها طالبة 17 و احنا ممكن نخلصها 13-14 ولو عاجبتني هارفعها في البنزينة ان شاء الله

:waving:اشوفكوا بعد المعاينة

رد: ساعدوني علشان خلاص والله زهقت
 

العفو يا فتافيت هانم:)
يا ريت تاخدي حد معاكي و ما تعتمديش علي كلام الميكانيكي
لانه عاوز يبيع و ياخد عموله منك و منها و خلاص
شوفي حد قريبك يكون فاهم يجي معاكي و سمكري او ميكانيكي تاني يشوف العربيه
لو الميكانيكي اضايق قوليله انا حدفع فيها فلوس مش واخداها هديه لازم اطمن
لاني مش لاقيه فلوسي في الشارع.
و لما يطلب عموله ما تديلوش اكتر من 200 جنيه
و ابقي طمنينا عملتي ايه؟؟

رد: ساعدوني علشان خلاص والله زهقت
 

يا خبر 200 جنية مرة واحدة !!!!!!!

لاء لاء بصى حضرتك تعاينى العربية بنفسك عند بنزينة وتاخديها عند واحد سمكرى معرفة يكشفلك عليها فى مكانة وياخد 30 - 50 جنية بالكتير وتكونى متفقة مع صاحب العربية ان كتابة العقد بعد الكشف على العربية لكن 200 جنية حرام طبعا