رد: هتجنن أجيب لوجان ولا فيرنا :(((((((
اللى اتلسع من التيريوس ينفخ فى الرينو يا ابو الداكترة ووالله الرينو مفيش ركوبة زيه عربية بشواتى وعموما لو جايبها زيرو بمشيئة الله مش هتحتاج حاجة 5 سنين
بس الفيرنا قطع غيارها فى اى سوبر ماركت واى حمار بيشتغل فيها والعربية حلوة وموتور قوى وتكييف ممتاز وسحب رائع بس انا لو مكانك ماجبهاش زيرو اجيب ماتركس 2008 حالة ممتازة بالسبعين وكاملة اتوماتيك مجرد رأى واستخير ربنا برضه يا دكترة:01FDAB~189: |
رد: هتجنن أجيب لوجان ولا فيرنا :(((((((
اقتباس:
ثانيا انا عايز أوضح لحضرتك حاجة صغننة قد كده انا كنت عايش عمري كله 18 سنة في الإمارات و والله مش بتاع بهدلة يعني و بحب الأصلي و التوكيل لكن تعرف حضرتك انا لما رحت بالتيريوس بتاعتي التوكيل عشان أغير جنزير كاتينه الفتيس قالولي ايه ( طبعا توكيل المنصورة ) ؟ قالولي معندناش قطع غيار لموديل عربيتك !! قلتلهم هوا انا جيت توكيل مرسيدس ؟ قالولي لأ توكيل دايهاتسو بس عندنا قطع غيار الجديد بس قلتلو و الله دي مش بيجو 504 موديل 1979 دي دايهاتسو تيريوس 2000 قالي ( و ركب الوش الخشب ) يا فندم عندنا قطع غيار من 2008 لحد 2012 :( طب يبقى مسابليش غير البهدلة مع الصنايعية و بوظولي حاجات كتير كانت سليمة لأن تشخيصهم بالتخمين دايما و بطريقة الاستبعاد ( يعني نغير دي و لو ماتحلتش نغير دي و لو لسه موجودة المشكلة نغير دي .. بيحلقو على العيب زي اللي عايز يمسك فرخة :) ) أنا و الله عاجباني جدا اللوجان في ركوبها و شكلها من جوه و هيا احسن من الفيرنا فكده بس الأساس عندي هوا السبب اللي انا بايع عربيتي عشانو .. خدمة ما بعد البيع .. فنفسي حد من اللي معاه للوجان يقولي إيه رأيو في توكيلها اللي اسمو ( العدوي على طريق المنصورة المحلة ) يعني إخواننا اللي معاهم لوجان في المحلة أو طنطا برضو ممكن يساعدوني |
رد: هتجنن أجيب لوجان ولا فيرنا :(((((((
والله يا باشا انت جاوبت على نفسك بمعنى انك فى المنصورة والمنتشر عندك فيرنا فالافضل تجيب اللانوس ههههههههههههههههههه انا من راى الخاص لو المقارنة بين الفيرنا واللوجان يبقى فيرنا طبعا مش هتغلب فى صيانتها نهائيا وهتبقى ملك زمانك تكيفك باورك ازازك الكهربا والواحد عاوز ايه اكتر من كدا نحمد الله وعموما انا من راى خليك فى اللانوس افضل قطع غيارها ارخص كمان من الفيرنا والاعتمادية بتاعتها عالية جدا جدا جدا وعلى فكره انا كنت فى نفس الحيرة بتاعتك بس مابين اللانوس و البى واى دى لغاية ما واحد ابن حلال قالى بص نهائيتها معاك فلوس اشترى البى واى دى على قد حالك اشترى اللانوس قلتله وضح اكتر شوية قالى بمعنى اخر البى واى دى قطع غيارها الاصلية وحشه جدا فهتضطر تعوضها بقطع غيار تيوتا او ميتسوبيشى وشوف قطع غيار الاتنين دوول بكام قالى بس اللانوس قطع غيارها متوفر بجميع الانواع كورى وصينى ويبانى وكمان استيراد وسعر قطع غيارها كان معاك 128 بل فيه قطع غيار ارخص من ال 128 وادى العربيه بقالها 13 سنه فى مصر مفيش حد جابها واشتكى والعربيه ماشية فى قارات العالم السته زى الفل شتا شغال صيف شغال ومبتقولش لا فتتعب نفسك ليه وتغامر بالبى واى دى قالى كمان فيه قطع غيار صعب تجيبها للبى واى دى مثالا الدينموا تقدر تقولى هتجيبه منين وبكام بس اللانوس تروح تجيب دينامو استيراد ب 150 وخلص الكلام وبراحه اقتنعت اووى بكلامه وقالى فى نهاية الكلام عاوز ايه اكتر من ان عربيه متهينكش وتلاقى اسعار قطع غيارها رخيصه و تلاقى فيها وسائل رفاهية غير كمان ان اللانوس تعتبر من انعم العربيات فى السواقه بس ومن ساعتها واقتنعت جدا باللانوس لانها فعلا حمالة اسيه وموتورها بعد 120 بظهر عليه قوة جبارة تخليه يسحب العربيه لل 200 لو انت عاوز وربنا ييسر للجميع الامور باذن الله :Wkiss5: |
رد: هتجنن أجيب لوجان ولا فيرنا :(((((((
اقتباس:
أنا كل تفكيري في الزيرو و هقولك ليه .. السبب حضرتك قلتو العربية اول 3 إلى 5 سنين مهما بتعمل فيها طالما معملتش حوادث مش بيبان فيها حاجة .. و انا عربيتي موديل 2000 و انا شاريها استعمال سنة 2006 و كانت عروسة لمده سنة :)) و اتطلقت :Wkiss5: و بدأت بقى مشواري معاها .. مرة 2 كوبلن أمامي ( و انزل هاتهم من القاهرة يا معلم ) و مرة مساعدين أمامي و خلفي ( و على القاهرة يا معلم ) و مرة وصلة الكردان ( بورسعيد استيراد ) و مرة كراسي المكنة ( روح دمياط هاتهم يا بيه ) و مرة بلية سير الكاتينة ( تصور القاهرة برضو :( ) و مرة و مرة و مرة باختصار انا اتعقدت و صلحتها كويس اوي عشان مش عايز اللي ياخدها مني ( يشتريها ) ابقى ضاحك عليه و هيا كويسة الوقتي ( ربنا يديمها نعمة ) بس خلاص معدش فيا حيل للبهدلة دي .. و كل صنايعي و بالذات العفشجية يقولي مبنحبش الشغل في العربيات دي ... مع ان الشغل فيها بفلوس يعني مش بديلو في الاخر سندوتش فول :( |
رد: هتجنن أجيب لوجان ولا فيرنا :(((((((
اقتباس:
بث في حاجة صغننه اللانوس دي من سنتين كانت دايو و دلوقتي بقت شيفورليه يعني ممكن بعد سنتين تبقى أوبل ؟ :shyy: بهزر بصراحة شكلها مش عاطفي معايا فعشان كده انا حاصر المقارنة بين الفيرنا و اللوجان بس انا كده هعتبر رأي حضرتك فيرنا على بركة الله :) يا رب اللي عندو معلومة قد كده ( صغيرة اوي يعني :) ) ميبخلش بيها عليا زيك كده |
الساعة الآن 06:25 AM. |
Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017