رد: ارجوا المساعدة عملت حادثة قبل العيد والجنب اليمبن كله اتبهدل
 

قدر الله وماشاء فعل وربنا يعوض عليك يارب
بص اسوء حاجة فى الحادثة عندك حاجتين الباقى سهل بإذن الله
اول حاجة احتمال ان الخبطة لوحت الحوض ؟
ديه تبان من الجنب الشمال اللى انت مصورتوش ومن كشف الزوايا ومن المشى بالعربية
لو ده حصل حتحتاج تعمل زراجين فى الحوض وعلى حسب حجم الترحيل هنعرف محتاجة زراجين قد ايه واذا كانت تتعمل على كده ولا لازم الحوض يتفضى ( بمعنى يتشال منه المكنة )
وممكن ان شاء الله ميبقاش فيه ترحيل ولا لوحة فى الحوض ومتحتاجش تخش فى زراجين
تانى حاجة الخبطة اللى فى القايم ،، اسلم حاجة ليها تترد بالشد والسحب والطرق وبعدين تتمعجن فايبر
والجزء ده اهم حاجة تستلمها نظيفة من السمكرى لبتاع البوية لبتاع الزجاج علشان متبقاش باينة فى الاخر

غير كدة محتاج تشترى الحاجات ديه
رفرف امامى يمين
كرتيرة رفرفر
* فانوس امامى يمين لو حالتة تحتاج تغيير
* اكصدام امامى لو حالتة تحتاج تغيير

الشغل هيبقى :
زرجينة للحوض اذا لزم
استبدال رفرف امامى
استعدال الكبوت
استعدال القايم الامامى يمين
استعدال قضيب الاكصدام

التكاليف على حسب المكان والميزانية ممكن من 3000 ل 5000
وممكن تعملها على مهلك وتبداء بشراء الرفرف وتروح للسمكرى يظبطلك الكبوت مع الرفرف
ولو خلصت ومفيش زراجين تعمل خبطة القايم ديه على رواقة خالص لحد ما تظبط
وبعد شغل السمكرة والدق ما يخلص تروح لبتاع الدوكو تتفق معاه واذا شايف تعديلات يرجعك تانى بيها للسمكرى

المهم تتابع بنفسك الصنايعية ومتستعجلش لحد ما تتظبط ومتنساش هتروح تظبط زوايا علشان تطمن على مشى العربية

رد: ارجوا المساعدة عملت حادثة قبل العيد والجنب اليمبن كله اتبهدل
 

احب اشكر حضرتك على الرد الوافى الجميل وقبل كل حاجه الحمد الله انها جت على قد كده ومحدش اتعور او جراله حاجه بعد ستر ربنا بفضل حزام الامان لان الخبطه كانت على الطريق السريع بتاع العريش القنطرة .
بالنسبه للحوض مفهوش اى حاجه ولا ترحيل انا ورتها لسمكرى فى العريش وقالى مفيش حاجه فى الحوض او الكرتيرة تحت الرفف وانا مصور صورت الجنب الشمال وفعت صورته وفى انتظار رايك .

العربيه فعلا محتاجه زبط زوايا وخصوصا ان الجنط اللى كان ناحية الحادثة اتشرخ وده مش عارف ممكن اعمل فيه ايه ولو ممكن اشترى واحد نفس الشكل يبقى فضل من عند ربنا وخلى ده استبن للعربيه .
انا انشاء الله ناوى انزل بورسعيد ادور على الحاجه بتاعتها بالوانها وانزل بعد كده على السنبلاوين اعمل العربيه هناك واخلاصها كلها سمكره ودهان وكهربا وزويا قبل مارجع بيها وادينى بدور وبسال على حد يكون معلم هناك علشان انزل عليه على طول عشان بجد اتعذبت فى العيد من غير العربيه .

رد: ارجوا المساعدة عملت حادثة قبل العيد والجنب اليمبن كله اتبهدل
 

ربنا يجعله فى ميزان حسناتك الحمد لله مفيش حاجة فى الحوض تستدعى زراجين كبيرة
بالنسبة للجنط ممكن يتلحم وفيه متخصصين فى تجديد الجنوط استعدال ولحام ودهان كمان بس لو لقيت واحد زية يبقى احسن طبعا
وعامة حاجتها متوفره ان شاء الله مش هتتعبك جامد فى التدوير تركيزك بس يبقى فى مصنعية السمكرة والدكو ولو هتعمل تعديلات فى الشكل او احسبلها من دلوقتى فمثلا لو هتعمل حاجة فى الاكصدام شغل فايبر مثلا هتركب عتب هتعدل فى الفوانيس او الشبكة شوف هتعمل ايه علشان يترش كله مع بعض وان شاء الله ترجع احسن من الاول

رد: ارجوا المساعدة عملت حادثة قبل العيد والجنب اليمبن كله اتبهدل
 

شكرا ابو نوار على اهتمامك وردودك المفيدة .
انا النهارده روحت لبتاع زبط زوايا بيص على العربيه وقالى انا محتاج اغير الركبة كاملة بس قبل ماغيرها اخلى السمكرى يقيس الركبيتين ولو طلعت المسافة بتاعتهم شركة اغير الركبة ولو غير كده يعمل الزراجين المطلوبة الاول .
بس انا مشفاهم اقول للسمكرى ايه علشان يفهم قصد بتاع الزوايا على العموم ادينى هعمل اجازة من الشغل ان شاء الله وانزل اشوف القصة دى ايه وربنا يقدم الخير من عنده ان شاء الله .

رد: ارجوا المساعدة عملت حادثة قبل العيد والجنب اليمبن كله اتبهدل
 

ان شاء الله خير .. انت قصتك دلوقتى بين العفشجى وبتاع الزوايا .. والعفشجى وبتاع الزوايا يعرف يعمل الزراجين اللى من النوع ده لو حد محترف
فيه بتاع زوايا محترف ومحترم جدا اسمة درش ليه فروع فى المطرية وفى جسر السويس وفى الحرفيين مشهور باسم درش بتاع الزوايا ده ممكن يكشف ويعمل الزاجين ويظبط لكن معتقدش السمكرى هيعرف يقيس ولا يظبط زرجينة عفشه