رد: اسعار قطع غيار السياره النوبيرا الاستيراد
 

متشكر أولا على الرد
ثانيا أنا نفسى اسقط نفس الموتور 1500 سى سى بتاعها عشان أستهلاك البنزين
ثالثا انا مثبوت عندى فى الرخصة سعة الموتور 1499 سى سى هل لما أسقط موتور مختلف , السعة فى الرخصة بتتعدل ولا الأفراج الجمركى مبيبقاش فيه سعة الموتور
رابعا موتور اليجنزا بيركب زى مهوا ولا بيحتاج تعديل

رد: اسعار قطع غيار السياره النوبيرا الاستيراد
 

مازلت متابع رد الشيخ طارق و باقى الأعضاء

رد: اسعار قطع غيار السياره النوبيرا الاستيراد
 

صديقي العزيز انا كان معايا الموتور 1500 كان مثبوت في الرخصة 1496 ولانة كان خفيف كان استهلاكة في البنزين من اسواء ما يكون العربية اوتو وبتعمل 160 كيلو في الصفيحة على السريع
ال 2000 استهلاكة كان احسن على نفس الفتيس 190 كيلو في الصفيحة على الطريق السريع
بالنسبة للسعة اللي عرفتة فيما بعد انة مفيس سعة موتور بتتسجل في مواتير الدايو و الهيونداي القديمة

الموتور اغلب قطعة بتركب زي ما هي مع بعض تعديلات بسيطة جدا راجعي موضوعي عن تسقيط مكنة ليجانزا في نوبيرا وانت هتعرف كل التعديلات المطلوبة

بعد ما تركب و تدعيلي حابب انوه على حاجة مهمة حيث ان العربية النوبيرا معروفة بفراملها الضعيفة نصحية مني ما تعديش 180 الا لما تكون مطمئن جدا على الطريق لأن فراملها مش بتسعفك بعد سرعة 160 ودايما اعمل ريجلاش لفرامل اليد لان الموتور بجد بيكون شديد وهتتبسط منة جدا جدا بأذن الله

رد: اسعار قطع غيار السياره النوبيرا الاستيراد
 

متشكر يا باشا على نصايحك الغالية بس أنا اصلا مش بجرى أوى يعنى اخرى لو الطريق مفتوح 120 و اعتقد الموتور ال 200 سى سى هيكون عفى اوى على العربية شايف ان الأفضل ليا 1500 سى سى
بعدين انا مشكلتى مع الموتور القديم انه بياكل زيت بس انما استهلاك البنزين الصفيحة بتعمل معايا 230 كيلو فى السريع و السحب والشد كويسين هى المشكلة فى الزيت بس

رد: اسعار قطع غيار السياره النوبيرا الاستيراد
 

واضح ان العربية اللي معاك مانيوال لان استهلاك البنزين عندك ماشاء الله ممتاز وطالما مش فارق معاك السرعة و الآداء ركز معايا
من ناحية اكل الزيت دي عيب شنابر مش خفية موتور روح لميكانيكي كويس خلية يغير طقم الشنابر و تلين المكنة ومش هتكلفك كتير
طالما السحب حلو يبقى زي ما قلتلك موضوع ان فية شنبر لازق وبيهرب زيت لغرفة الحريق
مؤقتا استخدم زيت شانبر بس متكترش علية لأنة بيضعف طرمبة الزيت لحد ما تعمل الموضوع دة
تحياتي

رد: اسعار قطع غيار السياره النوبيرا الاستيراد
 

طيب هو طقم الشنبر ده يعمله حوالى كام والمصنعية كام بعدين انا عندى المكنة بدخن جامد من الشكمان بالاضافة طبعا لنقص الزيت ايه الفرق بين كده و بين خفية الموتور

رد: اسعار قطع غيار السياره النوبيرا الاستيراد
 

من 500 جنية الي 700 بالمصنعية والمفروض دى تحل مشكلة الدخنة البضاء لنها هتمنع الزيت من دخول غرفة الحريق

المكنة بتاكل زيت في حالة كسر الشنابر او في حالة خفية الموتور
الشنبر لو متأكل يكون سحب العربية عادي ولكن في دخنة بيضا من الشكمان او من فايظ الزيت اللي موصل وش السليندر بالبوابة هتلاحظ دايما ان البوابة معرقة زيت اسود طول الوقت هتلاقي البوجيهات بتخرب بسرعة جدا

لو المكنة خفيفية زود على الأعراض اللي فوق ان السحب يكون وحش جدا وتسمع تنفيخ وفرقعة احيانا من غرفة الحريق و دوران العربية بيكون صعب جدا جدا اكتر من لو كانت الرشاشات وحشة هيعني حتى لما تدور تلاقيها بطلت بعد ثانيتين ثلاثة فمن حيث الوصف اللي وصفتة قدرت ان الموضوع عندك مجرد طقم شنابر مش اكتر و لاتنسي التليين بعدها انك تمشي عل العربية اول 500 كيلو على سرعات لازيد عن 80 وتنقل على ار بي ام لازيد عن 2ونص