مصر موتورز مجتمع السيارات - كل اللي نفسه في حاجة عن اللوجان يدخل هنا

مصر موتورز مجتمع السيارات (https://www.masrmotors.com/vb/index.php)

- رينو لوجان Logan (https://www.masrmotors.com/vb/forumdisplay.php?f=160)

- - كل اللي نفسه في حاجة عن اللوجان يدخل هنا (https://www.masrmotors.com/vb/showthread.php?t=13926)

رد: كل اللي نفسه في حاجة عن اللوجان يدخل هنا

اقتباس:

المشاركة الأصلية كتبت بواسطة yassin samir (المشاركة 100539)

شكرا علي الردود كده انا ان شاء الله ناوى احجز واحده علي اخر الشهر

توكل على الله دى عربية تحفة

أنا لسة مستلم Logan MCV جميلة جداً و سبحان الله لما سوقتها من المعرض للبيت حسيت أنى سايق أتوبيس مع أنى مش أول مرة أركب عربيات كبيرة

رد: كل اللي نفسه في حاجة عن اللوجان يدخل هنا

اقتباس:

المشاركة الأصلية كتبت بواسطة POP EL GAMED (المشاركة 100123)

احب اقول لحضرتك كلام الميكانيكى ده مالوش اى اساس من الصحه ثم هو فيه ميكانيكى بيقسم المكن بأوروبا الشرقيه والغربيه معتقدش بصراحه
غير كده انا اديت لحضرتك مثال وهو اللادا اللى ماشيه بتحفر فى الارض من سنين كل العربيات اللادا دى مواتيرها بتتعمر كل شويه
بلاش لادا حضرتك لو شفت الداتشيا ال1310 اللى هى نفس شكل الرينو 12 هتلاقيها شغاله تاكسى ومفحوته طول النهار هل برضه دى كمان مش معمره اعتقد ان هى دى العربيه اللى اتاخدت من رينو ومن داتشيا عشان تشتغل تاكسى فى مصر يعنى الشعب متأكد منها ولا ايه رأيك؟؟؟؟
وبالنسبه لوجود حاجه اللوجان استيراد احب اقولك حاجه اللوجان نزلت من حوالى سنه انما اللانوس موجوده رسمى فى مصر من سنه99 يعنى طبيعى انك تلاقى منها استيراد واللانوس كانت موجوده بره موديل 96 ودى عربيه كنت شفتها بعينى نازله معاقين
اقدم حاجه فى اللوجان بره هى موديل 2004 يبقى هل فيه مجال للمقارنه؟؟؟؟؟؟
لو عايز تلاقى حاجه اللوجان استيراد استنى عليها سنه ولا سنتين كمان وهتلاقيها موجوده وهتلاقى قطع الغيار الجديده ارخص بكتير وهتلاقى ميكانيكيه يشتغلوا فيها كمان بس العربيه لسه جديده يعنى نديها فرصه

هو طبعاً الأخوة الميكانيكية مع الأحترام الشديد لهم كثير منهم يفتى بدون علم و قلة منهم هى التى على علم لذا يجب الحذر من المعلومات المأخوذة منهم.

بخصوص الفرق بين اليابانى و الأوروبى عموماً بدون شرقى و غربى فالمحركات اليابانى معمرة قد يصل عمر المحرك بالزمن 5 ألى 7 سنوات حال الأستعمال الخفيف و بالمسافة 600 أو 700 ألف كم حال الأستعمال الكثير و لكن بعدها تبدأ المحركات فى الأنهيار التام بدون مقدمات و قد تصل حالتها للتلف التام الذى يتوجب تغييرها بالكامل.

أما المحركات الأوروبية بجميع أنواعها فهى تستمر بالعمل بشكل جيد مدة 6 سنوات متتالية أو 400 ألف كم و فى حالة العمرة تعيش نفس الزمن و لكن بشرط جودة العمرة و أجزائها تتحمل كل أجراءات العمرة من خرط و تجليخ لذا يمكن لهذا المحرك أن يتم له عمرة و أثنتين و ثلاثة قبل أجراء أء تغيير فى أجزائة التى تم خرطها من قبل مثل الكرنك أو كراسى الكرنك أو أذرع البيلات.

رد: كل اللي نفسه في حاجة عن اللوجان يدخل هنا

اقتباس:

المشاركة الأصلية كتبت بواسطة m_o_sakr (المشاركة 99706)

تسلم ايدك
الموضوع ممتاز بصراحه
بس كان عندى سؤال لكل الى جاب العربيه : هل العربيه فعلاً عجباك؟؟

جــداً جــداً جـــداً ..
مشيت بيها 2000 كيلو حتى الآن
ومش مقصرة معايا فى حاجة ، وماليش عليها أى ملاحظات سلبية

عن المميزات فهى عشرة على عشرة فى انها مابتحكش فى أى مطب حتى لو محملة ، تجميعها سريع ، عايزة تجرى، عفشة مريحة ، وثابتة على السرعات العالية (بالنسبة لى 120 عشان ماجاتش فرصة إنى أجرب سرعة أعلى)، الفرامل ممتازة وبتسعف لو عايز تهدى من سرعة كبيرة، التكييف ممتاز، وطبعاً الأسرة كلها بيقعدوا مرتاحين والعيال بيرمحوا فى الكنبة اللى ورا. رحت مشوارين للمطار أوصل قرايبى وماكنتش أقدر أعملها قبل كده عشان الشنطة ماكانتش بتاخد فكنا بنأجر ميكروباص، لكن شنطة اللوجان دولاب ماشاء الله.
مافيش عندى أى عيوب تقفيل والحمد لله ، ومافكرتش فى أى صيانة قبل المعاد لأن مافيش مشاكل.
وفيها حاجة ظريفة جداً برضه وهى ان الدبرياج بتاعها خفيف جداً ، هوااااا ، ودى كانت مفاجأة سعيدة عشان عندى مشكلة بسيطة فى الركبة الشمال.

السلبيات : موضوع ارتفاع الشنطة لأنى مش واخد عليه فى العربيات اللى سقتها قبل كده، فباتضايق شوية لما آجى آركن ركنة ضيقة، بس دى حليتها بأنى ركبت كاميرا خلفية بتورينى المسافة بينى وبين العربية اللى ورايا.

وكمان كان نفسى تبقى أوتوماتيك ، بس الحلو مايكملش ..

رد: كل اللي نفسه في حاجة عن اللوجان يدخل هنا

ممكن حد يقولي ينفع اجيب الوجان وادفع 25 الف جنيه و500قسط او اكتر سنه

رد: كل اللي نفسه في حاجة عن اللوجان يدخل هنا

اقتباس:

المشاركة الأصلية كتبت بواسطة ILOVE mitsubishi4ever (المشاركة 105272)

ممكن حد يقولي ينفع اجيب الوجان وادفع 25 الف جنيه و500قسط او اكتر سنه

بص يامعلم انت بتدفع 10% مقدمه والبقى معاك لغاية 60 شهر وانت ومقدرتك بقىptmnlo123per154

رد: كل اللي نفسه في حاجة عن اللوجان يدخل هنا

الف شكر على المعلومات الجميلة وانا فعلا حشتريها ان شاء اللة بس انا سمعت انك ممكن تحطلها بنزين80 ياريت تفيدنا فى هذة النقطة والف الف شكر ليك

رد: كل اللي نفسه في حاجة عن اللوجان يدخل هنا

نسبة انضغاط محرك اللوجان 9.5 ولذلك لا يمكن استخدام بنزين 80
من الممكن استخدام بنزين 90 ومن الافضل استخدام بنزين 92