مصر موتورز مجتمع السيارات - خلاصة الكلام فى ظبط فيشة الاوكتان ( بالصور )

اقتباس:

موضوع مهم جدا جدا ...خصوصا لاصحاب الانوس ولغيرهم كمان
جزاكم الله كل خير .. والف شكر لاستاذ عصام على الموضوع المميز
بس هو انا عندي استفسار .. المفروض ان المحركات بيكون ليها نسبه انضغاط Compression ratio
وده بيحدد نوع البنزين المفضل للعربيه
فمش فاهم ازاي الجمبر الصغنن ده بيتحكم في العمليه دي ... يعني هو بيشتغل ازاي ... بيظبط كهربه العربيه مع الحرق ولا بيغير زمن فتح الصمامات ولا ايه بالظبط ؟؟
__________________

جزاك الله خيراٌ

الموضوع بسيط اوى

المحركات تختلف فى تصميمها التكنولوجى بالنسبه لحكاية ظبط الموتور على درجة الاوكتان

فيه 3 انواع رئيسيه

1 العربيات القديمه
بتتظبط يدوى من الاسبراتير بنقدم ونأخر الشراره على حسب درجة الاوكتان

2 العربيات الاحدث شويه
زى الانوس واكتر عيلة الاوبل ( تكنولوجى واحد ) فيها جمبر مخفى جنب وحدة التحكم المفروض ان اللى يظبطه مهندسين التوكيل على درجة الاوكتان اللى حضرتك ماشى عليها ( فى صيانة الالف كيلو الاولى ) وبما انا المهندسين معندهومش خلفيه عن الموضوع اصلاٌ ( لضعف التدريب والخبره ) فمبيتعملش اصلاٌ

لذلك المصنع فى مصر بيمسك العصايه من النص وبيظبط الجمبر على وضع 87 اوكتان
بحيث لو مونت 80 ماشى ( وتكركر) لو مونت 90 ماشى و ( مبتستفيدش من طاقته كامله ) لو مونت 92 تبقى بتضيع فلوسك لأن (الموتور مش هيستفيد منه اى حاجه )

اللانوس المستورد بتبقى فيشة الاوكتان مظبوطه فيه على وضع 92 اوكتان

الجمبر مش بيتحكم فى وقت فتح الرشاشات ( دى وظيفة حساس الماب ) لأ هو بيتحكم فى وقت حدوث الشراره يعنى الشراره تصدر من البوجيه والبستم فين بالظبط ( وده طبعاٌ بيفرق كتير فى الاستفاده القصوى من الطاقه الكامنه فى كل درجة اوكتان )

كومبيوتر العربيه جواه 4 منحنيات احتراق ( 83 , 87 , 91 , 95 ) مسبقة الضبط

اللى انا بعمله انى بختار المنحنى المتوافق مع درجة الاوكتان اللى انا بمشى بيها بس

3 العربيات الحديثه
فيها حساس تسقيف بيركب على البلوك وبيحس بدرجة اهتزاز الموتور وبيظبط وقت الشراره على انسب وضع يكون المحرك فيه مستفيد من كل قطرة وقود اى كان درجة اوكتانه ( طبعاٌ فى حدود المبرمج عليه مسبقاٌ )

يعنى محدش يحط 80 ويقول حساس البتسقيف هيظبط الموضوع

لأنه اصلاٌ ميعرفش ال 80 ولا يعرف يتعامل معاه

بدليل ان فيه عربيات زى الباسات TSI بتزعل من ال 92 فما بالك بال 80

ارجو ان اكون قدرت أجوبك على سؤالك

لو عندك اى استفسار تانى

تحت امرك