رد: رحلة الى الصين
 

(5)

المهم …. ركبنا ميكروباس تبع الفندق و كانوا مجموعه من الأمريكان و الأستراليين ورحنا الأوتيل وفى الريسبشن مع كل واحد المندوب اللى استلقطه و انا كنت اتفقت مع المندوبه على سعر الغرفه و كان 90 دولار فى الليله و الفندق كان اربع نجوم و هو اوتيل كويس لكنى اكتشفت انه كان ممكن احصل بنفس السعر على اوتيل اقرب للمعرض لكنى لم اهتم لسببين الأول انه الأنتقالات من و الى المعرض تتم بمعرفة الأوتيل و هناك اتوبيس كل ساعه و الثانى ان بعد الأوتيل سيعطينى فرصه للفرجه على البلد .

موظفى الأستقبال يتحدثون الأنجليزيه بركاكه لكن يمكن التفاهم معهم . المهم طلعت الغرفه فى الدور 11 و كانت غرفه مريحه و جميله و بها كل ماهو موجود فى اى فندق محترم و فى الطريق للغرفه يوجد مكتب تجلس عليه بنت بالتناوب لمدة 24 ساعه.

بدأ الفار يلعب فى عبى فماهى وظيفة هذه البنت بالضبط ؟ فكلما ترانى امامها تروح منطوره قيام و تعظيم سلام و اكتشفت أن مهمتها هى ترتيب غرف النزلاء كلما خرجوا من الغرف.
اى نعم كلما خرجوا . فاذا خرجت من الغرفه 10 مرات يتم ترتيب الغرفه 10 مرات و بأسلوب يغيظ. فعند ذهابى للغرفه أول مره طلبت بطانيه احتياطى علشان مش عارف الجو بالليل هايكون ايه و كمان علشان ما بحبش التكييف الدافى . المهم بعد اول ليله رجعت البطانيه للدولاب و هنا كانت الطامه الكبرى . فكلما ادخلت البطانيه و خرجت من الغرفه دخلت هى أو النبطشيه بتاعتها و اخرجت البطانيه تانى و تصوروا كل مره اخرج و ارجع لو 5 مرات فى اليوم و لكل يوم لما كان هايجيلى انهيار عصبى . و حاولت افهمها انى عاوزها فى الدولاب فهمت هى انى عاوز بطانيه تانيه .
حتى الورق و المستندات ترتب الأوضه كلها و تيجى عند الحاجات بتاعتك فتنضف تحتها و ترجعها بنفس الترتيب بالضبط و كانها صورت الأوضه لدرجة انى عملت اختبار عجيب لترتيب الورق رجعته بنت الأيه بالضبط .

اول ما وصلت اعطيت الولد حامل الشنط بقشيش 10 دولار لأن مكنش معايا عملة الصين . الولد بص لى و شكله كان هايموت من الفرحه . و عرفت فيما بعد ان ده بقشيش مبالغ فيه جدا المهم نزلت الأستقبال تانى و سألت اغير فين الدولارات فشاوروا لى على الجهه المقابله و كان مبنى شكله زى بنك كده غيرت من هناك بعملة الصين و اسمها رمم بى لكنهم فهمونى ان حساب الأوتيل لازم بالدولار و انى ممنوع اتعامل مع اى صينى بالدولار و ممنوع اغير الا من عندهم او من اى بنك مش من السوق السودا ء لأن دى عقوبتها شديده جدا .

بعد شويه ابتديت اجوع فسألت على المطعم فأخبرونى بأنه بيقفل الساعه 11 مساء لكن الكوفى شوب شغال طول الليل فطلبت شاى و لأنى كنت عامل حسابى وواخد معايا شوية جبنة رومى و لانشون و بسطرمه و مربى و جبنه كيرى ( الحكومه هى اللى اصرت انى اخدهم معايا ربنا يخليها لى يارب كنت اصبحت مجرد ذكرى لمعده متقلصه )

المهم عملت ساوندتش كيرى على مربى http://www.egyptiantalks.org/invb/st...ault/laugh.gif ( جربوه و بعدين اضحكوا ) و رومى على بسطرمه و رميت اللانشون لأنه باظ و كلتهم و نمت .


يتبع .........

رد: رحلة الى الصين
 

(6)

صحيت تانى يوم و فكرت انى اطلب مصر و مع ان فرق التوقيت حوالى 8 ساعات يعنى الساعه ثمانية الصبح تبقى فى مصر 12 بالليل المهم طلبت و طمنت الحكومه و طلبت الفطار و كان فطار كونتننتال شاى و زبده و جبنه و مربى سيبت طبعا الزبدة لأنى مش عارف معموله من ايه و استخدمت مكانها الكيرى و التهمت المربى و الشاى كالارستقراطيين ( فين طبق الفول و البيض بالزبده ) .

المهم نزلت خدت اتوبيس المعرض و رحت المعرض . فى البدايه يجب ان تذهب للأستقبال و هناك يطلعوا على جواز السفر و دعوة الحضور و بعدين يعطوا لك تصريح بالدخول . هذا التصريح مهم جدا جدا لدرجة انهم فهمونا انه مافيش حد هايتكلم معانا بدون هذا التصريح ولازم نعلقه طول ماحنا صاحيين خارج الفندق و قد كان. كمان المعرض للأجانب و سكان هونج كونج و تايوان بس و غير مسموح لباقى الصينين بدخوله و الباقى بيسموهم ما معناه سكان mainland او الصين الأم .

المعرض نفسه مكون من عدة مبانى كل مبنى من عدة ادوار و يتم توزيع كتيبات و اسطوانات ارشاديه للزوار تضم كل ما يوجد فى المعرض و بالتفصيل. يضم المعرض كل ما تنتجه و تصنعه الصين اى انه يضم كل شىء ممكن تتخيله فى العالم شيىء حقيقة يفوق التصور.

طيب لماذا نرى المنتجات الصينيه عندنا كأسوأ المنتجات . السبب هم المشترين المستوردين . هناك فى الصين اسلوبان للشراء : الأول أن تحدد المواصفات و هم يحددون السعر ثم تناقش انت فى السعر و الثانى ان تحدد انت السعر و هم يحددون المواصفات . المصريين بلا استثناء يستخدمون الأسلوب الثانى ( السعر ) و لأن السعر يكون منخفض بشكل كبير لا يكون تقريبا هناك اى مواصفات . و التاجر الصينى لا يوجد عنده فى القاموس كلمة ماعندبش او ماينفعش كله عنده و كله ينفع المهم الزبون يتعاقد. مثلا مكواه كهربائيه بمواصفات تفوق المكواه الناشيونال سعرها 10 دولار و نفس المكواه بمواصفات لمصر يصبح سعرها 3 دولار .

ايضا هم يعملون باسلوب المناطق الصناعيه و كل منطقه لها العديد من شركات التسويق التى تسوق منتجات المنطقه الصناعيه . و لذلك تجد بائع الدراجات يبيع دراجات لكن لو سألت عن ادوات مكتبيه أو لنشات بحر او طائرات هليوكبتر ستجده يقولك ثانيه واحده و يديلك سعر و مواصفات ووووووو ولن تخلص.

كمان كل المنتجات الأوروبيه و الأمريكيه بلا استثناء بها اجزاء كثيره جدا صينيه و ليس لديهم اى حساسيه فى كتابة أى شيء على السلعه يعنى لو قلت له اكتب عليها صنعت فى موزمبيق يقولك اوكى …

كمان مندوبين الشركات جميعهم يتخذون اسماء غربيه بمجرد تعيينهم يعنى مستر وو زى بينج يصبح تانى يوم مستر بيل و كل الشركة تعرفه باسم بيل و حتى لو ساب الشركه وراح شركة تانيه يصبح برضه بيل علشان الأجانب يفتكروا الأسم بسهوله.

عندما سألت عن أجر العامل الشهرى قيل لى لا يقل مرتبه عن 100 – 120 دولار فى الشهر لكنى اشك فى صدق هذا الكلام و ممكن يكون دعايه او شيء من هذا القبيل .

عندما سألت عن شيء يحتاجونه هناك لكى نصدره لهم مقابل ما نستورده بص لى الشخص اللى سألته بصه فهمت منها انى عبيط و روح ياشاطر العب بعيد و أفهمنى بأسلوب غايه فى الأدب ان الصين لا تستورد الا لأغراض سياسيه ( يعنى مثلا زى صفقة السيارات المرسيدس المصرى من عدة سنين كانت علشان نقول صدرنا للصين بكذا و استوردنا بكذا بدل مانقول صادراتنا للصين صفر )


يتبع .....

رد: رحلة الى الصين
 

صوره من داخل اوتيل فيوراما حيث كنت اقيم ( الصوره من النت و ليست من تصويرى )


http://www.sinohotelsite.com/image/F...0Guangzhou.jpg

رد: رحلة الى الصين
 

http://billhocker.com/china5/gwangchow2.jpg



The New China
Guangzhou, China 2002

رد: رحلة الى الصين
 

اسلوبك في الكتابة شيق جدا
لدرجة اني زعلت لما الموضوع خلص