مصر موتورز مجتمع السيارات - ارشيف الاستراحة 2010

السلام عليكم يا شباب المنتدى ......

لو حضرتك عضو جديد و عايش فى الكويت يشرفنا انضمامك للمنتدى
و لو حضرتك عضو قديم فى المنتدى و تنطبق عليك نفس الشروط و الاحكام :) يعنى برده عايش فى الكويت يبقى طبعا يشرفنا ارتباطك بالمنتدى الفترة اللى فاتت

و انا بصفتى مصرى و عايش فى الكويت باقترح اننا نعمل (رابطة مصر موتورز بالكويت)

و الهدف من الرابطة دى ,,, انى شايف المنتدى كل يوم بيكبر بأعضائه اللى معرفتهم بالنسبة ليا كنز و مكسب كبير جدا لأنه فعلا منتدى محترم و كل اعضاؤه بلا استثناء من أكثر الناس احتراما اللى عرفتهم فى حياتى و بما ان الهدف الاساسى من المنتدى هو تبادل الخبرات و الثقافات فى مجال السيارات خصوصا و فى شتى مجالات الحياة عموما و طبعا التعارف و اكتساب اصدقاء

و طبعا انا اكتسبت من المنتدى أكثر من صديق و كلهم اكتر من اخواتى والله سواء عايشين هنا فى الكويت او الشباب اللى عايشين فى مصر

و طبعا اعتزازى و حبى للاصدقاء دول هو اللى خلانى عاوز عددنا يكبر

ونظرا لأنى عارف ان فيه أعضاء تانيين عايشن فى الكويت فيه منهم اللى كان بينا مكالمة تليفون أو مشاركة فى المنتدى اتمنى من كل قلبى ان كلهم يشتركوا فى الرابطة دى علشان نعمل عزوة كدة و نبقى اخوة فى الغربة و نغير الفكرة اللى متاخدة عننا كمصريين فى الغربة .... هههههه

فالرابطة دى يا شباب هتكون اولا للتعارف بينا و المقابلات و تبادل الخبرات عن وكلاء السيارات بالكويت ..احسن ناس بتصلح ... مكاتب الايجار ...قطع الغيار ....كدة يعنى و اى نشاطات تحبوا تعملوها

و لا يخفى على كتير من حضراتكم اننا عملنا اكتر من مقابلة بالكويت و حضرها اكثر من عضو ... و كمان عملنا اكتر من تقرير عن مختلف السيارات بالاشتراك مع صديقى وأخى العزيز حورس الشهير بـ (شريف منسى) :)

و يا ريت كل واحد يدخل يعرفنا بنفسه مبدئيا و نتشرف بحضراتكم جميعا

و هبدأ بوضع بياناتى

الاسم : محمد كمال رضوان
السن: 31 سنة
الوظيفة: استشارى انظمة اوراكل بوزارة العدل .. دولة الكويت
العنوان : الكويت ... السالمية
نوع العربية: شيفروليه كابريس LTZ موديل 2004

و اهلا وسهلا بيكم