وآدى ياعم المقالة اللى تثبت لك بالدليل القاطع والبرهان الساطع ان 400 جنيه كتير علينا

400جــنــيـــه

حكومتنا الرشيدة ربنا يجعل كلامها خفيف عليا وعلى الهارد بتاعى
اعلنت بكل فخر وبلا أى خجل ان 400 جنيه حلويييييييييين ومقضيين ويكفو ويفيضو وهنحوش منهم كمان
وواضح من كلامهم كده اننا شعب فراعنة طماعين وعنينا فارغة وميملاهاش الا التراب

وكان فى واحد فى دولة فيحان لما تولى حكم فيحان جديد
قالو له / اللحمة غليت ياريس
فشخط فيهم وقال بكل جرأة / متاكلش لحمة
طب الخيار غلى
وبنفس الجرأة / متاكلش خيار
طب الزيت
طب السكر
طب الخضار
طب هناكل أيه
وهنا رد عليهم بكل براءة وجرأة (بس ف سره طبعا ) / كلو سم هارى يارب اخلص منكو واقعد لوحدى من غير شعب جتكو البلاوى وانتو كتير ومبتشتغلوش
م تشتغلو......... أبو اللى جابت ابوكو شعب طماع
والحقيقة حين درست اقل كميات يمكن للانسان ان يأكلها وتمده بكافة مايحتاجه الفرد من مواد غذائية لازمة لجسمه لكى يعيش فقط
مش لازم يتخن ويربرب زى الواد كروزير والواد محمد على اللى لولاهم لكانت اهاليهم بقيو من اصحاب الابراج العالية لكن اهاليهم صرفت كل اموالهم عليهم
او مش لازم يطول ويطول ويطول ويطول زى الواد احمد بدر او بدر بسيونى
انا مش عارف الناس دى سايبانا تحت فى الأرض و رايحين فين ؟؟؟
وفوجئت بمفاجأة عبقرية وقنبلة مدوية
هتقلب الدنيا رأسا على عقب ..... واحيانا عقبا على رأس
وهتقلبها مرة بالطول ومرة بالعرض ومرة بــ الورب ومرة على جنب
وجدت ان الانسان المصرى فقط وهو انسان أنوى نادر (على رأى يوسف وهبى فى فيلم شنبو ) جسمه غير جسم بنى آدمين كوكب الأرض التانيـين الوحشين الطماعين
جسمه يحتاج الآتى
3 جرام ونص لحمة مرة كل شهر .....ومش لازم كل شهر
خيارية واحدة بس فى الأسبوع
عودين ملوخية مرة كل أسبوع
15 حباية بسلة مرة كل أسبوع
45 حباية فول مرة كل يومين
( مش هنقدر نمنع الفول عن المصريين لانه سر تفردهم عن باقى مخلوقات كوكب الأرض)
رغيف وربع كل يوم
3 حبات طماطم ( البنادورة بالنسبة لاخواننا الشوام ) كل أسبوع
زجاجة زيت مرة كل شهرين
كيلو سكر مرة كل 3 شهور
باكو شاى 100 جرام مرة كل 3 شهور
(وكييفة الشاى زى حالاتى ينقو حيطة شكلها شيك يخبطو دماغهم فيها أو مش لازم شيك بدل م يركبو القطار يرمو نفسهم تحته)
فرخة كااااااااااااااملة مرة كل 4 شهور( انشاء الله ما حد حوش )
وماعدا ذلك فهو ترف وأكل زيادة
وعيب علينا الأكل الزيادة
هو احنا بنى آدمين والا حاجة تانية ؟؟؟؟؟؟
احم احم ........ لامؤاخذة يعنى
واكتشفت بعد هذه القنبلة المدوية والتى ستقلب الدنيا عقبا على رأس او رأسا على عقب وهتقلبها بالطول وبالعرض وبـ الورب ومن كل الزوايا
اننا شوية فراعنة طماعين متزمتين منخرطين امبرياليين بورجوازيين متهوسين ولربنا غير حامدين
ولذلك فالحكومة فعلا عندها حق
ال 400 جنيه يكفو ويزيدو ونحوش منهم كمان
والبنوك هتتملى فلوس بسبب تحويشنا من ال 400 جنيه
وهيدورو على حد يدوله قروض مش هيلاقو
اذا كان احنا بنحوش هناخد قروض ليه ؟؟؟؟؟؟؟؟
وبالتالى الحاجة سعرها هينزل الأرض لاننا هنصدر كل باقى الحاجات اللى مش بناكلها
طبعا مش مصدقين كلامى
والله شكلكو مش مصدقين
صدقونى انتو مش مصدقين
طب اجيب لكم دليل اننا شعب غنى وفيـــيــس كمان
شوفو اكوام الزبالة المرمية فى الشوارع
طب بذمتكو وعينى ف عينكو ياشعب طماع لما انت مش لاقيين تاكلو اومال الزبالة دى بتيجى منين ؟؟؟؟
مش دى بواقى اكلكو وشربكو
اجيب دليل تانى ؟؟؟
ماشى
المجارى الطافحة فى المناطق الشعبية بالذات هى اكبر دليل على ان مفيش فيكى فقير يامصر



هو انتو لو بتاكلو على اد م انتو محتاجين بس .....كنتو هتحتاجو مجارى ولا حمامات من اصله ؟؟؟؟؟

لسه مش مصدقين ؟؟؟؟
طيب دليل تالت
علشان تعرفو انكو شعب فراعنة وطماعين ومنخرطين ومتزمتين وبرجوازيين ومتهوسيين ولربكم غير حامدين
دليل قاله اخويا وصاحبى وحبيبى فى مدرسة النهب الثانوية ..... احم احم ... اقصد مدرسة النهش الثانوية ..... احم احم ........اقصد مدرسة الحياة الديمقراطيه
معلمى واستاذى ....واستاذنا كلنا غصب عننا ولايجروء حد يعترض ....
المدرس الذى ترك التدريس الى الطبلة الى الحديد
حبيب الملايين / احمد بك عز
قال بالحرف الواحد / ازاى الشعب ده مش لاقى ياكل اومال العربيات اللى زاحمة الشوارع من كل شكل ولون دى مين راكبها ؟؟؟؟؟؟؟

سؤال منطقى برضه ...... عنده حق
صحيح لو.... احنا جعانين هنركب عربيات ازاى ومنين ؟؟؟
يبقى احنا شايلين تحت البلاطة

ومن هذا المنطلق الفكرى الناتج عن البعد البؤرى المتشعب فى اللانهائية الكونية المنبثقة عن المعقول واللا معقول
وادينى فى الهايف وانا احبك يافنـنــس
اقول وبكل ثقة ياشعب مبيشكرش ولايحمدش ربنا
ادعى ربنا واقول














استر يارب عليا وعلى الهارد بتاعى والكومبيوتر والمنطقة كلها

اللهم آمين

المشاركة الأصلية كتبت بواسطة سيف الدين سعيد (المشاركة 289467) أرجو التوضيح حتى لا يحدث سوء فهم للكلام .

المشاركة الأصلية كتبت بواسطة mahranahm (المشاركة 289587) استاذ سيف باشا لو التعليق سبب لك اى تخيلات مش مقصودة اعلم كل العلم انى بحب الهزار جدا وبحب اعضاء المنتدى جدا خاصتا دوى الروح المرحة مثلك يعنى خش برجالتك يا فرج من فيلم قابل ولا الشقة شقتها من فيلم تانى وانا مستنى منك الفيلم الثالث لكن لو التعليق على مشاركتك منى ازعجك فأنى اقدم لك كل الاسف وشكرا على تعليقك الفكاهى ولك منى باقة رود

المشاركة الأصلية كتبت بواسطة سيف الدين سعيد (المشاركة 289635) لأ يا باشا ابدا التعليق ما ازعجنيش ولا ضايقنى انا بس مافهمتوش . لأن تعليقى كان عباره شهيره للفنان محمد صبحى فى مسلسل رحلة المليون ( الجزء الأول ) وكانت من اشهر المواقف الكوميديه فى المسلسل . وانا بصراحه ماعرفش الفيلم اللى انت بتتكلم عنه . فمفهمتش ردك عليا . وعموما الموضوع قيم جدا . ومعلوماته مفيده بجد . ومنتظرين المزيد دائما يا باشا .ROSE4U

المشاركة الأصلية كتبت بواسطة dr_legend (المشاركة 287254) واللى انا خايف منه انهم يلبسوهم ملكى ويدخلوهم تانى

ROSE4Uالسلام عليكم و رحمة الله و بركاتهROSE4U

MERCEDES E230