مصر موتورز مجتمع السيارات - ارشيف الاستراحة 2010

(3)

تانى يوم دخلت من المستشفى للبيت و رقدت على الفراش استريح .
نفس الصوت و بنفس الهدوء " فكرت فى اللى انا قلته "

اجبته " اللى هوا ايه "

رد بنفس الهدوء: " مش خسارة اللى انت عملته ده "

اجبته بمنتهى التحدى و الحده " طبعا لأ .... لأنى عاوز ادخل الجنه مش زيك يا رجيم "

رد : " و انت ضامن تدخل الجنه "

اثارنى هدوئه فاجبته " طبعا مش ضامن ..لكن انا باعمل اللى عليا و لو عليا ذنوب ان شاء الله ربنا يغفرها وحتى لو ما دخلتش الجنه كفاية انى عشت انسان محترم متوضى و شريف و لا اقرب الخمر أو الحرام كفاية قيمتى كانسان مش حيوان "

رد : " يعنى مش ضامن . طيب اذا كنت هاتدخل النار علشان ذنوبك طيب حساناتك راحت فين "

أجبته " اصلى انا مش زيك هاقعد فى النار و مش طالع . حسناتى هاتمتع بيها فى الجنه "

رد : " طيب و بنتك "

أجبته " مالها بنتى "

رد : " مش المفروض علشان اعمالك الكويسه فى الدنيا على الأقل بنتك تخف "

أجبته " لا مش شرط . اولا لأن ماحدش يعرف الخير فين ويمكن البنت تطلع فاسده زى قصة سيدنا موسى و سيدنا الخضر و الغلام و ثانيا لأن ربنا لو اختارها عنده هايعوضنى عنها فى الآخره و يمكن تكون السبب فى دخولى للجنه "

رد : " كويس اوى كده يبقى ربنا مش عادل "

اجبته " أخرس "

رد : " بس استنى ماتشتمش ده كلامك مش كلامى . هسألك سؤال ربنا عدله مطلق ولا نسبى "

اجبته " لا طبعا عدله مطلق يا كافر و مافيش لحظه بيبقى فيها مش عادل "

رد : " عظيم أوى .لكن انت بتقول انه الجزاء على اعمالك دى جزء منه على الأقل هايكون فى الآخره . معنى كده ان العدل هايتحقق لما تحط الدنيا مع الآخره لكن كل واحده لواحدها مافيهاش عدل معنى كده ان عدله نسبى او فيه مراحل مافيهاش عدل بانتظار مراحل أخرى تكملها "

اجبته " لأ عادل غصبن عنك "

رد : " لأ ممكن تقول قاهر... قوى ....جبار لكن عادل ... لأ "

أجبته " اعوذ بالله منك و منك كفرك "

رد " كده برضه هاتمشينى طيب انا ماشى لكن افتكر انك ماردتش عليا "

و انصرف.

جلست افكر فى هذا الكلام طوال الليل و لعدة ايام كان الملعون يأتينى خلالها يسألنى:" جاوبت على السؤال "

فاستعيذ بالله فينصرف

احسست بالعجز عن التفكير المنطقى ربما للظروف التى كنت امر بها .

اخذت قرارا بأن الجأ لمن هم اعلم منى ولكنى تضايقت من نفسى كيف اعجز عن الرد و انا ممن يلجأ الناس اليه لاستشارته فى أمور الدين و الدنيا .

لكن الظروف التى كنت امر بها منعتنى صفاء التفكير و سعة الوقت لطلب المشورة .

و ظل الملعون يطاردنى كل ليله بسؤاله :" جاوبت على السؤال " و اكاد أرى ضحكاته ....

يتبع ..............